بو گونلر2 ...

1. بو گونلر یازماغا هئچ حالیم یوخ! یانی یازمالی قونوم دا یوخ "سن"دن خاریج!!! و "سن"ی بوندان آرتیق یازماق قونونو لوث ائده‌جکدیر دییه دوشونورم. بودور کی "سن"دن یازمیرام ایندیلیک! بو قدر.

زامان قاتیلی

1. نئچه گون اینتئرنتیم یوخیدی، آزاد وقتیم ائله چوخالمیشدی کی. آما نئینییم کی اینتئرنتسیز اولمور. بو اینتئرنت منیم وقتیمین قاتیلیدی. گرک بونا بیر چاره قیلام. یوخ بوجور اولماز.

میلیونلاردان بیری

1. بوگون ده سنی دوشوندوم، داها هر گون کیمی! بوگونلر سنی دوشونمک اؤنجه‌کیلر کیمی دگیل! فرقلی بیچیمده دوشونمک‌دیر. سانکی قبول ائتمیشم کی بو ایلیشکی اولومسوزدور. بو جمله‌لر وازگئچمیشلیگیمین آنلامیندا دگیل، سنی گینه ده دلیجه سئویرم. آما نه ائدیم کی بوندا سونرا بیر ایش گلمیر الیمدن!

2. ایندیلر هر سئری غملی سئودا شارقیلاری قولاق آسدیقجا داها دا قبول ائلیرم کی بوجور بیر شئی انسان باشینا گلر! چوخ انسان باشینا گلیپ، بو آهنگلر او اوزدن واردیلار، بو شعرلر او اوزدن واردیلار، یا بو متنلر... منده اونلاردان بیریم سادجه، بو قدر!

17/02/1395

قادین!

1. گئچن هفته بیر اوزاق یئره گئدیردیک، ماشیندا اوتورموشدوم دوکتور ا. یانیندا. یانی اوولده دوکتورون یانیندا دییلدیم سورا ماشینا گاز ووران زامان کی یئندیک آشاغی، دوباره میننده اوتوردوم دوکتورون یانیندا. سؤز قونوسو ائله اوولده ماشینا مینندن باشلامیشدی: ائولنمک! دوکتور ا. و دوکتور خ. گیر وئرمیشدیلر کی سن یوبانمیسان! سورا کی دوشدوم دوکتور ا. یانینا، حدودا 40-50 دقیقه منه مشورت وئردی کی گئت قاباغا، قورخما. نم ایندیدن باشلاسان بیر ایل چکه‌جک، بیلمیرم ایمکانی وار 10 نفرینن جور دئمیه‌سیز و 11جی ایله جور دییه‌سیز. بیلمیرم اؤزووه معیار نظرده آل، مثلا قد، قیافه، خانواده، تحصیلات، اخلاق و ...

2. دوکتور ا. دییردی قادینلارین اخلاقلارینین یوزده 80ی مشترکدی! یاخجی بیلمه‌دیم اخلاقلارینی یوزده 80ی مشترکدی یا قادینلارین یوزده 80ی بیر بیرینه تایدی! :) آما خلاصه بو کی بیر بیرلرینه بنزیرلر. دییردی قادینلاری تانیماق اولماز! هئچ اؤزلری ده اؤزلرین تانیمیر!!!! :) دییردی مثلا ایمکانی وار خانیمین سنین شالواریندان خوشو گلمیه آما اونو مستقیم بیله‌وه دئمیه و آیری بیر شئیه ایراد توتا مثلا موبایلیوا. دییردی اوندا سنده هئی باخاجاقسان موبایلین او طرفینه، بو طرفینه، دالیسینا، قاباغینا و هئیساد گؤرمینده حئیران قالاجاقسان کی آلله بونون نه‌ییدی؟!!! هئچ فیکریوه خطور ائله‌میه‌جاق کی شالواریندان ناراحاتدی!!!!

3. الله انصاف وئرسین!

4. ایندی کی بونو یازیردیم ذهنیمه گلدی کی شاید من و «سن» آراسیندا اولانلار دا بو جور بیر شئی دی؟!!! الله بیلیر.

----

ی س: بورانی راست گله تاپدیم و بولار یادیما دوشدو یازدیم.

ی س 2: هردن یادیما دوشدوکجن دوکتورون مشورتلرین خلاصه صورتده بوردا یازارام کی یادیمنان چیخماسین، اگر او زاماناجان یادیمدان چیخماسا! :)

دومان؛ حسین منزوی

1. قافلان و آی یازیسینی دونن گئجه حسین منزوی‌نین بیر مصرع سی ایله یاتماق واختی یازدیم*. بوگون سحر بیر تلگرام پستو گلدی بیر کیتاب** تانیتدیریر، کیتاب کیمدن اولسا یاخجیدیر؟! حسین منزوی...

2. ... و من تعجب ایچینده.

----

* گئجه یاتمادان اؤنجه سئریسیندن :)

** «دومان»؛ "حسین منزوی"نین تورکجه شعرلری.

ی س: blog.ir بوگون قاتمیشدیر. عکس قویانمادیم. الله رحم ائله دی پست لار سیلینمه دی!!!

قافلان و آی

«خیال خام پلنگ من به سوی ماه پریدن بود...»
حسین منزوی

1. دییرلر دونیانین ان مغرور حئیوانی پلنگ دیر. پلنگ یالنیز یاشاماغی سئور، تک باشینا. گروپ اولاراق یاشاماز. دییرلر پلنگ او قدر غرورلی دیر کی اؤزوندن اوجادا دوران هئچ بیر شئیی چکنمز. اونا گؤره ده، چالیشار اوجا یئرلرده دورسون، اوجا آغاجلار باشیندا، اوجا داغلارین ان تپه‌ده‌کی قایالاریندا.

2. افسانه، آی بوتون اولان زاماندان باشلیر. دولون آی گؤیلرده ان بؤیوک و پارلاق اولان زامان، پلنگ آیین اؤزوندن اوجالیقدا اولماغینین فرقینه وارار و غروروندان دولایی بو اولایا قاتلاناماز! پلنگ، آیی گؤی اوزوندن یئره سالماغا گؤره گئدر چئوره‌ده‌کی ان اوجا داغ باشینا و چالیشار آیی توتسون. ال آتار، پنجه آتار، دیشلری ایله توتماق ایستر، آما الی آیا چاتماز. باشلار آتیلماغا. آتیلار آتیلار گینه الی آیا چاتماز! باشلار نه گوجو وار آتیلماغا. آتیلار آتیلار و اؤزوندن چیخار! بو آتیلماقلارین بیرینده، آتیلماغین شدت‌یندن و اؤزونو داها بیلمه‌مه‌کدن دولایی قایا باشیندان دوشر دره‌نین تکینه. سوموکلری سینار، بدنی ازیلر و ائله اوردا آیا باخا باخا جان وئرر.

3. افسانه‌نین آردین بوردان اوخویا بیلرسینیز، سید حیدر بیات دیلیندن.

4. «سن» منیم آی‌یمسان. دوغروسو سنین عئشقین منیم آییمدیر. هم اؤزون آیسان و هم ده آدین. آی اوزلوم...

----

ی.س.1 : بو افسانه آذربایجان فولکولورونا عاییددیر و حسین منزوی بیر زنجانلی اولاراق بو افسانه نی شعره چئویرمیش.

ی.س.2: بونو یازاندان سونرا یادیما دوشدو کی حدودا ایکی آی قاباق «آی اوزلوم» آدلی بیر داها یازی یازمیشام، بوردان باخین. نه ماراقلی...

تمرکز

1. سحردن ائوده مطالعه ائلیردیم، آما قاباغا گئتمیردی! نه اینکی مطلب چوخ چتین اولا، بلکه ذهن دا چکمیردی. چیخدیم ائشیکده بیر دؤر ووردوم و گلدیم ایندی ذهنیم ائله دورودور کی ها.

سحر تئزدن

1. بوگون سحر ساعات بئشه 5-10 دقیقه قالان یوخودان دوردوم. بیرآز ایسته دیم خیمیمی چکماغینان یاتام آما سورا تصمیم توتدوم دورام.  ائله او حین‌ده محله‌نین مسجیدیندن اذان سسی گلدی. یاتمادیم چایدانی آتدیم اوسته تکینده بیر ایکی استیکانلیق سو واریدی، یاریم ایستیکان نسکافه‌یه یئتردی. گلدیم ایشه باشلادیم. بیرآز چالیشدیم و بیر نیسبی ایش قاباغا گئتدی. آنام 8ه یاخین گئتدی صبحانه‌یه کوکه آلدی و گتیردی منه صبحانه وئردی. یئدیم و گؤردوم ایندی یوخوم گلیر. ائله اوردا یاتدیم تا ساعات 10:30.

قیرخ بیر گون سونرا گینه سن

1. سون سنی گؤرمم قاییدیردی 41 گون قاباغا. او کذایی گون. او تپ چئویر اولدوغوم گون. او «آه»لار قلبیمه دولدوغو گون. او گوندن سونرا اؤزومو «سن»له ایلگیلی اولان چوخ شئی‌دن اوزاق ساخلاماغا چالیشدیم. فیکریندن باشقا. فیکرین گلنده، سئل کیمی، سونامی کیمی گؤتور آپاریر و بیلینمز بیر یئرلرده خرابالیق ایچینده بوراخیر، تک باشیما...

2.  41 گون سونرا گینه سن. قاپینی چالدی و ایچری گیردی باشیمی بیرآز قاپییا طرف چئویردیم تا کیمین ایچری گیردیگینی گؤرم و اونی گؤرونجه قلبیم اظطرابلا دولدی. آما چالیشدیم اوزومه گتیرمه‌یم. چالیشدیم بیر لحظه‌دن چوخ بیله‌سینه باخمایام. او لحظه فرض توتدوم کی او باشقا بیریسین گؤرمگه گلمیش اورا. ان کؤتو فرض!  گنلده هئچ اصلا قیسقانج بیری دئییلم آما بو شرایطده اونون باشقا بیر ایله دانیشماغین هئچ اصلا چکنمیرم!... ان کؤتو فرضی گؤزومه آلدیم و باشیمی سالدیم اؤز ایشیمی گؤرمه‌یه. او ایکی قدم قاباغا گلدی و اوردا دوروپ منه باخاراق «وقتینیز واردی؟» سوروشدی. «بویورون» دئدیم. گلدی و منیم میزیمین سول طرفینه گئچنده‌ن سونرا کاغاذلارین منیم میزیمین اوستونه قویدوی. «ایلشین» دئدیم. اوتورمادی. صندل بیرآز اوزاقدایدی بیلمیرم اوندان دولایی یا دا بیر مشخص «ذهنی فاصله»‌نی قوروماقدان اؤتوری اوتورمادی، بیلمیرم! بیر مقاله‌نی منه توتاراق «بو مقاله‌نی اوخوموسوز؟» سوروشدی*. اؤنجه‌لر او مقاله‌نی منه وئرمیشدی. اوندا اوخویارام دئمیشدیم. سورا باشیما ایشلر گلدیگیندن دولایی اوخویانمادیم.  «یوخ، اوخومامیشام» دئدیم. ادامه‌ده ایستیردیم دییم «دئسه‌...» کی همزمان اودا سؤزون ادامه وئرمک ایسته‌دی. سونرا من اونو دانیشماغین و او منیم دانیشماغیمی گؤرنده، من اونا «بویورون» دئدیم و او منه «بویورون» دئدی. آما نهایت او دئدی کی «بویورن». «دئسه‌یدینیز اوخویاردیم» دئدیم. جواب اولاراق بیر سؤز دئمه‌دی و سوالین ادامه وئردی. اشکالی واریدی. بیرآز باخدیم . بیرآز اشکالینا گؤره سوال سوروشدوم و نهایت دئدیم کی اوخویوپ، گلیپ دییه‌رم و چیخدی گئتدی...

3. ... و اورگیم قان بوراخیلدی، گینه هئچ کیمسه بیلمه‌دن، اوزومه گتیرمه‌دن...

----

ی.س.:

* گؤزومدن قاچمادی کی گؤزلیمین استرسی واریدی. بیرآز سسی و بیر آز دا اللری تیتریردی. بلکه بو اوزون آرادان سونرا منیم ترسه بیر عکس العمل گؤسترممدن قورخوردی بیرآز!... نه بیلیم. بلکه منی اوجور تانییپ!!!... :)

28/01/1395

بو گونلر

1. بو گونلر باشیم شولوغدی و یازماغادا هئچ حالیم یوخ! نه فقط یازماغا، بلکه هئچ ایشه حالیم یوخ. فقط بیاخ بیر ساعات چرخ سوردوم. خیاوانلار خلوتتتتت. ایکی گون دالبادال تعطیل باعث اولوپ میللت بو باهار گونلرینده اویان بویانا چکیله بیلسینلر.

2. دونن یولداشلارین بیری بیر فیلم* دانلود ائله‌میشدی دییردی «بو ایل بو فیلم بتر سس سالیپ!» دییردی «بو فیلمین اویونجوسی بو ایل، بو فیلیمه گؤره اوسکار آلدی. آدی نمنه دی!». فیلمی دالی قاباخ ائلیردی و اوینجونون آدی یادینا گلمیردی. منیم ده یادیما گلمیردی، آما بیرآز فیکیرلشندن سونرا دئمیشم «دیکاپریو». دییپ «جک**». دئدیم «همان جک! :)». دئدیم منه ده وئر. فلشی وئردیم بیله‌سینه و اینگیلیسیجن دئدیم «گیو ایت تو می، گیو ایت تو می». دییپ «بیلیسن بونون اینگیلیسیده آیری معنی‌سی وار؟!!! اؤزوده لهجه‌ن گونئی آمریکا لهجه‌سینه اوخشور!!!» دئدیم «وای ده ده، اوندا کپی ایت تو می» گؤردوم بو دا یاخجی معنی وئرمیر دالیسیجا تئز دئدیم «کپی ایت تو مای فلش» گولموشم. ذهنیم گئدیپ گونئی آمریکا قاچاقچیلارینا! آما ادامه‌ده دئدی «ائنریکه کیمی». بیلمیرم ائنریکه‌نی دئدی کی ناراحات اولمویام یا یوخ ائله واقعا! نه ایسه من بوجور بیر شئیلردن ناراحات اولمارام هئچ واخت. بیله‌سینه دئدیم بو آخشام بونا باخاجام.

3. آخشام سکیزده ائوه یئتیشدیم بیرآز چؤرک یئدیم و گؤردوم کی من گئدیرم! آنام دئدی دور گئت گیر یئرنده یات. ساعات دوققوزدان یاتدیم تا سحر بئش. بئش ده دوردوم ایکی دانا میوه یئدیم بیر موز و بیر آلما و بیرآز رادیو اف ام ده، رادیو آوایا قولاق آسا آسا تلگراما باخدیم***. آهنگلرین هئچ سئومه‌دیم. رایونو باغلادیم و اؤز آهنگلریمی آچدیم. چنگیر قورت اوغلونون 7 دانا سئچیلمیشی. ساعات آلتی نی 10 دقیقه گئچیردی گؤردوم گینه آهنگ هاواسینا من گئدیرم، اویورام. یاتدیم تا ساعات سکیزه‌جن.

... و نهایت فیلیمه باخانمادیم! :)

----

ی.س.:

*فیلمین آدی: The Revenant (دؤنموش یا دا قاییتمیش، دؤنوپ گلمیش. بو آنلاملاردا)

**دیکاپریونون آدلیم تایتانیک فیلمینده‌کی شخصیت آدی. من دیکاپریونو او فیلیمده تانیدیم. چوخ بتر زامانیدی. اوندا دوم راهنمایی اوخوردوم و ویدیو تازا گلمیشدی! او زامان بو فیلم دییه بیلرم بیر-ایکی آیای یاخین ذهنیمی قاتمیشدی...، او قدر «نیه؟» واریدی ذهنیمده کی ... او قدر غریبه احساسلار واریدی کی قلبیمده ...

*** سئوگیلیم دئمک لازیم دئییل کی نئچه سئری ده گیزلیجه سنین پروفایلیوا باخدیم. عکسین اوردا اولماسادا بیله! بو قدر ...