ساعاتلی بومبا...!
1- بیر فیلمه ایکینجی سفر اولاراق باخیرام. هله بیتیرمه‌میشم. چوخ گؤزل فیلم‌دیر. آما فیلمین گؤزللیگینه گؤره یازمیاجاغام بوردا. فیلمده یؤنتمن بیر خاص تکنیک ایشلدیر، سؤز قونوسی اونداندیر. بو تکنیکین آدین بیلمیرم، هئچ بیر یئرده ده اوخومامیشام بونا گؤره. آما اؤزوم، بو فیلمده بوتون وجودوملا بونی لمس ائتدیگیمه گؤره بوردا یازیرام و ادینا دا تکنیک دییرم!
2- تکنیک بؤیله‌دیر کی فیلمین یؤنتمنی و یازاری اوول سئکانسدا بیر قارا قوطی* ایچینده بیر نسنه اکیر آدامین بئینینده. آچیلمامیش بیر قوطی. ایچیندن خبرین اولمور، چوخ دا چالیشیسان آنلایاسان آما بیر شئی باش تاپیلمیر. بو سئکانس بیتیر. بوندان سونرا 2-3 سئکانس دا گلیر گئدیر و او قارا قوطی تام اونوتولور. اون دقیقه‌دن سونرا بیر باشقا سئکانسین هیجانین و بحرانین یاشیا یاشیا، سئکانسین سونوندا او قارا قوطی‌نی خبرین اولمادان بیردن-بیره آچیر! آچماق دییرم ها، نه آچماق.... تام بیر ساعاتلی بومبا کیمی آچیر...
3- دقیقا بو یازینی یازمادان بیر دقیقه اؤنجه بو ساعاتلی بومبا منیم بئنیمده پاتلادی! وجودومون بوتون توکلری بیز-بیز دورموشدی! فیلمین قالانینا کندیمی توپارلادیقدان سونرا باخابیلرم! بو ساعاتلی بومبانین تاثیری نه قدر اولاجاق گؤره‌سن؟
----
* black box
* بو یازینی 1396/12/26 تاریخینده تلگرامدا یازمیشدیم. بورا دا ووردوم بوگون 1397/01/02.
