1. بوگون 1993 ایلینده دوزلمیش بیر فیلمه باخدیم: "تپه‌نین کرالی". یاشامین تام گرچک اوزو. فیلم یوخسوللوغو آدامین تام اوزونه چیرپیر. آدامی بیر لحظه گؤیلردن، رؤیالاردان یئره یئندیریر.
2. فیلمده‌کی باش رول اوینایان اوغلانی سئودیم: جئس بردفورد. گوگل دا آختاردیم ایندی یئکه بیر اوغلان اولوپ!
3. فیلمین آدی ایله اولان ایلگینی آنلامادیم! هانکی تپه؟ هانکی کرال؟
1. سحردن ائوده‌ایدیم. بیر مسئله اوزرینده ایشلیردیم و جواب آلمیردیم. مسئله چوخ یورموشدو بیله‌می. او یئتمزده، آرا-سیرا سنین او عجاییب داورانیشین گلیردی فیکریمه! بیر مسئله‌نین حل اولمازلیغی، بیر سنین عجیب رفتارین. بیر او، بیر سن. سینوس کیمی.
2. ناهاری بیرآز بئواخت یئدیم و قوتولار قوتولماز، مسئله‌نین اوستونه قاییتدیم. 10-15 دقیقه واخت قویموشدوم کی مسئله چؤزولدو. ایچیم سئوینجله دولدو. مسئله چؤزومون قوتلاییم دییه، "ائشیگه چیخیرام" دئدیم. گونون ایسسی‌سینده! "بو ایسسی ایله هارا گئدیرسن؟" آنام دئدی. "هئیسات ائله‌مز، قوی گون وورسون، بدن برکیسین" دئدیم :). بئشه اون دقیقه قالیردی چرخی گؤتوردوم و دوشدوم من یوللارا. بیر ساعات گونون ایسسی‌سی بیر یاندان و تحرک قیزیشماسی دا بیر آیری یاندان. بتر ترله‌میشدیم...
3. ... بیر ساعات دان سونرا ائوده‌ایدیم. حالیم یاخجی ایدی.
1. گئچن هفته‌لرده بیر یئردن بیلمیشدیم کی جمال ثریانین سئچیلمیش شعرلری فارسجایا ترجمه اولوپ. ایکی یئردن کی احتمال وئریردیم اولا سوروشموشدوم و "یوخدور" ائشیتمیشدیم.
2. دونن آخشام اوستو ائشیگه چیخماق ایسته‌دیم چرخ‌نن. سورا بیردن بیره دئدیم قوی گئدیم بیر آیری کیتاب ساتان وار اوردا اولار حتمن، اوردان آلیم. میندیم خطده و مستقیم گئتدیم اورا. اول سئری ایدی کی بو کیتابچی یا گلیردیم. گیردیم ایچریه کیتابین آدین دئدیم. دئدی وار آما گرک تاپام! سئویندیم. کیتابچی چوخدان‌نان بری گؤرمه‌میش یولداشینان شیرین-شیرین دانیشیردی، دوردو دالی قفسه‌لرده کیتابی آختارماغا. گوله گوله دئدیم "قیمتی نئچه‌دی؟ گؤروم هئچ پولوم وار!!" دئدی "قدیم چاپدی، ائله قیمتی اولماز" آختارا-آختار منده بویلاندیم بیر باخدیم دالیا، هله آختاریردی و دییردی ائله بیر دانا شاید قالیر. سورا بیردن بیره دئدی "هن! فارسجا کیتابلار آراسیندا اولمالیدیر، ترجمه اولوپ"، دئدیم "هن". گلدی بو الدن آختاردی و کیتابدان قالان سون نسخه نی ده منه وئردی، گئچدی میزینین دالیسیندا اوتوردی. کیتابی میز اوسته قویدی. قیمتی اوردان اوخودوم، 4700. دییردی بو گونلرده تخفیف وئریریک آما گرک سیستمه گیرم بو کیتابین دا قیمتی 2700 دی، هئچ سیستمه گیرمک ارزشی یوخ (کیتابین قیمتین اشتباه گؤرموشدی). دئدیم کی 4700 دی. دئدی اوندا قوی سیستمه وارد اولوم. دئدیم کی "ایسته‌مز". دئدی "بیزه بیر منتی یوخ کی" دؤلت وئریر. دئدیم "اولسون، نیاز دگیل". دئدی پس اوندا سن 4500 وئر. وئردیم و بیر نایلون ایسته‌دیم کیتابی سالدیم نایلونا "اللریز آغریماسین" دئدیم و چیخدیم ائشیگه.
3. پاساژدان ائشیگه چیخدیم و پیاده رودا کیتابی چیخارتدیم بیر وراقلادیم گؤز دولاندیردیم. راست گله بیر صفحه نی آچدیم و بیر بئیت اوخودوم:
"می‌دانم تمام راه‌هایی که به سوی تو می‌آید بسته است
تازه، تو هم هیچ وقت دوستم نداشتی"
یانی قیامت! باشقا بیر سؤز دئمک اولماز، قیامت قوپدو ایچیمده...
----
ی.س: عکس اؤزومدن دیر. بو عکسی چوخ بگندیم :)
1. بیر نئچه گون اولار دوربین آلماق ووروپ بئنیمه، بیر مبتدی دی. اس. ال . آر. عکس گؤزل بیر شئی دیر، بیر دوربین کی سئودیگین آنلاری دوزگون ثبت ائله‌سین چوخ یارارلی اولا بیلر. موبایل مارکی نه قدر یاخجی و باهالی اولسا بیله (توت 20 مگا پیکسل)، گینه ضعیف دوربینلر قاباغیندا دئماغا سؤزو یوخ و گؤزل آنلار حیف اولارلار. ووروپ کله‌مه کی بیر دوربین آلیم و اویان بویانا گئدنده، داریخاندا، ائوده، ائشیکده و مراسیملرده کئفیتلی عکس سالام! آما نه یازیق کی سئودیگیم دوربینلر بیر تومن دن اویانادیلار ...
2. بیر نئچه گون اولار مختلف دوربینلره باخمیشام و بیر ایکیسین خطده میشم، او جمله‌دن بیری بو یوخاریدا عکسین قویدوغوم دی.
1. دونن آخشام اوستو کامپیوتر له ایشله‌مکدن یورولدوم تبلتی آلدیم الیمه گئتدیم تلویزیون قاباغیندا اوتوردوم ووردوم آهنگ کاناللارینین بیرینه اوردا اوزاناراق دینجه‌له دینجه‌له اینترنتته دولاشیم و آهنگلری ده ائشیدیم. کانالدا قاریشیق اینگیسی و تورکی آهنگلر سالیردی. تبلت الیمده اولان زامان آهنگ آچسام معمولا فیکریم آهنگدن اوزاق اولار، فیکریم آهنگده اولماز. کانالدا قاریشیق انگلیسی و تورکی چالدی چالدی بیردن بیره بیر آهنگه یئتیشدی، آهنگین ریتمین سئودیم، آما فیکریم گینه آهنگده دگیلدی، اوخویانی دا تانیمیردیم، سسین ده تانیمادیم، اؤنجه ده گؤرمه‌میشدیم تازا اوخوماغیدی. اوخودو اوخودو بیردن بیره یئتیشدی بیر یئرهه کی دییری "ائپ ائیجه یاکلاشمیشیم، دویویوروم، آنلاتامیورووووووووم..." سانکی او آن اهنگی سوخدولار منیم قافاما. هن، من بو سؤزلری تانیرام، اؤنجه‌لر اوخوموشام بولاری. بونلار اورهان ولی‌دن دیر ...
2. ... بیر یئر وار، بیلییوروم؛
هر شئیی سؤیله‌مک مومکون؛
ائپ ائیجه یاکلاشمیشیم، دویویوروم؛
آنلاتامییوروم.
«اورهان ولی کانیک»
----
ی.س.: آهنگین کلیپیینده ده اورهان ولی دن چوخ ایلگینج و گیزلین ایپاوجلاری وئرمیش یؤنتمن.
دونن گئجه یوخووو گؤردوم! شاشیرتیجیدیر! چوخ نادیر بیر ایش اولموش...
یوخودا گول اوزونو گؤرمه‌دیم. ماجرا بوجور ایدی کی یانی نئچه مدت‌دن* سونرا منه یازیردین! نه‌لردن دانیشدیقیمیز یادیما گلمیر آما هر شئی یولوندایدی، منه یازماغین چوخ سئویندیریجی ایدی، سئوینیردیم او آن. فقط یادیمدا کی دییردین ساباه حتمن یا سن منه و یا من سنه گینه یازاروق.
----
ی.س.
1: ... گوندن سونرا گینه سن
2: یوخولارا اعتقادیم اولمامیش آما بو قونودا دوشونجه‌لریم دییشدی. دوغرو اولماغین دیله‌ییرم تانریدان. رویامدا سنی منه گؤرستدیگینه گؤره تانریدان چوخ ممنونام.
3. او قدر کی یوخو یورما (تعبیر-ی خواب) مطالیبلرینه باخدیم...
4. یوخو دوغرولدو!، چهارشنبه گئجه یوخو گؤردوم، شنبه یا یکشنبه اکانتی سیلمیش!
5. یوخولار ترس یورولارمیشلار اسکی‌دن... حئیف!
1. اینترنتیم قوتاردی و تصمیم توتدوم داها آلمیام. اینترنت اولمایاندا داها فایدالی ایشلر گؤرورم. نئچه گون اینترنتسیز اولماق پیس ده اولمادی، دئدیگیم کیمی داها یارارلی ایشلر گؤره بیلدیم.
2. بوگون "فایل"ی تحویل وئرمک ایچون حضوری گئتمه‌لیدیم. اوسته‌لیک تحویل وئرمگین سون گونویدی. گئتماغا تئز اولماقدان دولایی، سئریالین بیر یئنی بؤلومونه باخاندان سونرا زنگ وروپ و یولا دوشه‌رم دئدیم. سئریالین اونوجو قیسمتی ایدی باخیردیم وسط ده بیردن تلفن زنگ ووردی کی فیلانی فایلی نجور تحویل وئره‌جاقسان؟ دئدیم ایستیردیم ائله زنگ وورام و یولادوشم. دئدی حضوری گلمک ده لازیم دگیل. تلگرامدان یوللا گلسین. سئویندیم و اینترنتین ده یارالی اولا بیله‌جگینی دوشوندوم.
3. بیر گیگ داها اینترنت آلدیم و فایلی سون کز یوخلادیم سورونی اولماسین دییه و تلگرامدان یوللادیم.
----
ی.س.: اینترنتی قورالسیز ایشلتمک فایداسیز اولماغی بیر کنارا آدامی لاپ ایشدن گوجدن قویور. چالیشاجاغام آماجسیز اینترنت ایشلتمیم. گؤرک نه قدر سؤزومو توتا بیله‌جاغام.
