یاشاماغا دایر
بوگون ماشیندا گئدیردیم، یول کناریندا راست گله بیر قویون سوروسو گؤردوم. بیر قهوه‌ای رنگلی، عضله‌لی، کؤک و یئکه بیر چوبان ایتی ده واریدی. سورو دؤره‌سینده دولانیردی. بیرآن ذهنیمه گلدی کی اگر ایندی بیر قورت بو سورویه سالدیرسا نه اولار؟!
طبیعی‌دیر، بو سئناریودا قورت قویونلارا حمله ائده‌جک و ایت چالیشاجاق قورتو توتسون یا قووالاسین. برکه دوشسه قورت ایته ده سالدیراجاق. ذهنیمه گلدی کی هانکیسی داها باشاریلی اولابیلر و نیه؟! بوردا ایتین یا قورتون باشاریلی اولماق قونوسون بوجور فرضی فرضی دئمک اولماز. دوروما باغلیدیر. کؤکوندن دوروما باغلیدیر. ایکیسی‌نین ده گوجونه و قدرتینه باغلیدیر. من دئمک ایسته‌دیگیم شئی «دورم» و یا «گوج» ایله ایلگیسی یوخ. هئچ ایت و قورتون دا اؤزلوگو ایله ده ایشیم یوخ. ایت و قورتو ذهنین‌دن آت و یئرینه ایکی اینسان قوی همان نقشده آما عئنی ایت و قورت گودولرینده (انگیزه). اینسانلارین بیری سورونو گؤزلویور، قورویور و اوبیریسی قویونلارا و قورویوجو اینسانا سالدیریر و گودولری ایت و قورت کیمیدیر عیناً. آما یازینی ایت و قورت ایله باشلامیشام دییه، ائله اونلار ایله ده دوام ائدیرم. دئمک ایسته‌دیگیم شئ گودو و نیت ایله ایلگیلیدیر. قورت، قویونلارا یا ایته سالدیریرسا، نیه سالدیریر؟ ایت قویونلاری قوروماق ایستیرسه، نیه قورویور؟! یانی ایت و قورتون گؤردوکلری ایشدن، گودولری و ذهینسل آلت‌یاپیلاری نه؟!
سانیرام بیر ایشده باشاریلی اولماغین ان اؤنملی فاکتورلارین بیری، او ایشی یورودن نیت، گودو و آلت‌یاپیدیر. ایتین اینسانا و سورویه روحسل باغلی اولدوغونو قویالیم اونون غریزی مدافعه ائتمک کاراکتئرینین یانینا. سانیرام بولار ایتین قوروماق گودولری و ذهینسل آلت‌یاپیلاری‌دیر. او الده، قورت‌دا روحسل باغلیلیق یوخدور. غریزی اولاراق ییرتیجیدیر. بونون یانینا اونون آجلیغین قویون. آجلیق یانی اؤلوم. غریزی ییرتیجیلیق و آجلیق بیر-بیری ایله قاریشیرسا، بو ایشی قورت ایچین بیر اؤلوم یاشام ساواشی سانماق اولارکن، ایت ایچین بیر اؤلوم یاشام ساواشی فرض ائتمک اولماز. ایت ایچین داها چوخ هابی‌دیر (hobby) دییه دوشونورم من.
سانیرام اؤلوم و یا یاشام تهلوکه‌سی و جیددیتی ایله آتیلان هر بیر آتدیم، داها کسکین، داها صلابتلی، داها گوجلو آتیلار. بو دوروملاردا اینسان سانار کؤکسونده آتان قلب، داماریندا آخان قان بوشونا دگیل. قورتون ایشینده کسکینلیک و گوجلولوک، ایتین ایشیندن داها چوخدور و سانیرام قورت داها باشاریلی اولابیلر. آما دئمک ایسته‌دیگیم شئی قورتو قوتلاماق دگیل، بلکه اینسانلاردیلار، اینسانلار. اینسان گؤردوگو هر بیر ایشی یاشام ندنی بیلیرسه (حقیقی آنلامدا، قورت کیمی) او ایش ایش اولار. اینسان یاپمادیغی هر بیر ایشی اؤلومه سبب اولاجاغینی سانیرسا، او ایش یئرده قالماز. بیر اینسان عؤمور بویو بوتون ایشلری بؤیله‌سی یاپیرسا، سونوجدا «یاشادیم» دییه هایقیرا بیلر.
چهارشنبه 3 اردیبهشت 1399
