دردلره درمان...

1. «ایغدیرین آل آلماسی
  یئمه گه باغ آلماسی،
یار گلندن سونرا، آی بالام
یارامین ساغالماسی!»

سن رویامدا

1. «سنی گؤردوگوم رویالاری

قورخومدان کیمسه‌یه آچیقلامیرام

پیس یورماسینلار دییه،

سنی منه چوخ گؤرنلر!»

«من»

2. بوگون گ.ده سنی گؤره‌جاغام دییه قویولموشدی اورگیمه! حتی اوردان دؤننده بیر نفری گؤردوم و بیر آن سنه بنزتدیم، او آن دیزلریم سوستالدی و آز قالدی بوکولسون!  بیلیسن ندن؟ قورخودان، حسرتدن، یوخلوغوندان ...

3. ...آما نه ایسه، سؤز چوووخ اؤنملی!

بیر گئجه، ایکی یوخی

1. بو گئجه ایکی دانا یوخی گؤردوم و هر ایکیسینده ده سن واریدین! حتی بیرینده گول اوزونی ده گؤروردوم. سحر یوخودان دوراندان سونرا یوخولار یادیما دوشموشدی و تعجب ائله میشدیم! ایکی یوخی بیر گئجه‌ده، اؤزوده من؟!!! اؤزوده سنین قیافه‌ن ده واریدی اوردا بو سفر. یئریمین ایچینده الیمی آتدیم موبایلی گؤتوردوم و ساعاتا باخدیم: یئتدی‌نی، یئتدی دقیقه گئچیر (7:07)!

2. سویوق دیمه اوچ گوندور یاتیردیب بیله‌می...

اؤلوم دور!!!

1. عجیب هفته‌ایدی! اؤل ها اؤل! عراقدا پاتلاما یوز نفره یاخین اؤلدوردی. سونرا قاتار اولاییندا 50 نفر ده اوردا کول اولدولار. دونن بیر باشقا قاتار تصادوفوندا ایکی نفر باشقاسی اؤلدی و نهایت بوگون اوچاق دوشمه‌سی سونوجوندا، گونئی آمئریکا توپچولارینین اؤلومی، 75 نفر... اؤلوم دور!

2. و بیز نه قدر اؤلوم خبرینه عادت ائتمیشیک... بو دا اورتادوغو اؤزللیگی‌دیر. اورتادوغولونون آلنینا یازیلمیش ظلم و اؤلوم، هر ایکیسینه ده آلیشمیشق متاسفانه.

3. الله اؤلن‌لره رحمت ائله‌سین.

تقدیر

1. هردن باش وئرن اولایلارا دقت وئرنده بیر عجاییب و اینانیلماز سئیری گؤرورم. یانی اتفاقلار ترتیبی صورتده بیر زنجیر کیمی دال با دال دوشور و آخیرده بیر اولای باش وئریر، مثبت یا منفی! هردن بو اولایلار او قدر اینانیلماز شکیده بیربیرینین آردیندا اتفاق دوشورلر کی آدام فیکر ائلیر بیر برنامه اوزونن بو ایشلر اولور! بیر قاباخجادان تؤکولموش برنامه. بو اولایلار زنجیری تصادفی صورتده او قدر دقیق زمانبندی اولورلار کی اگر بو زنجیردن بیری دقیق و دوز زامانیندا اتفاق دوشمه‌سه، امکانسیزدیر کی زنجیرین سونو اتفاق دوشسون! بو زنجیری اولایلارا «تقدیر» آد وئرمیشم.

----

 1 و 2. ...

علی: کاظم آقا نین اوغلی حسین ده کربلایا گئتدی هااا.

کریم: پییی، اوغلان بو ایل هاممی کربلیا گئتدی هااا، بی بیز قالدیق تبریزده!

افشین: سن اونی نیه دییرسن! کوکه‌چی شاهبازین اوغلی بئهزاد دا گئتدی باااا.

کریم: گده بیر بیز قالدیق هاااا! اوغلان باغریم چاتدادی. گلین بیز ده برنامه تؤکاخ کربلیا گئدنمه‌دیخ هئچ اولماسا 28 صفری گئداخ مشهده. نجوردی؟

علی: دؤره جمع اولسا بتر یاپیشار هااا... دؤره جمع اولسا من وارام.

افشین: هن دؤره دوز اولسا من ده وارام. ماشین دا منن با، اؤزوزدن سورا بیر نفر ده تاپین، امین ده واردی، بئش نفری با هم گئداخ بیر زیارت ائلیاخ، خوش گئچر.

کریم: اولان ناصر اولماسا خوش گئچمز!

افشین: اوندا ماشینا یئرلشمه‌روخ!

علی: گلین ائله ناصیره ده دییاخ، مصطفی یا دا، گئداخ بیر کوپه‌نی دربست توتاخ قاطار نان گئداخ مشهده، بو لاپ بتر یاپیشار.

کریم: به به ...

3. قاطاردا:

-اولان دؤره‌میز نه جوردی، بوراجان کی بتر خوش گئچیپ فقط بیرآز هاوانین سویوقلوغی کیریخدیریپ، انشالله هاوا دا تئزلیغینان قیزیشار اوردا بیر ترپشه بیلروخ.

-هن، بتر خوش گئچیر، قوی بیر سئلفی سالاخ قویوم گروها آخشام اوستی اوبیری اوشاخلار دا بیزی گؤرسون . هاممی باخسین بورا .... شاک

4. هاوا سابقه‌سیز سویوق اولور. اولور 15 درجه صفردن آشاغی. تاریخده سمناندا بوجور بیر شئی اولمامیشدی! هاوا شخته‌سینه گؤره قاتارین ترمزلاری دونور. ایستگاها بئش کیلومئتر قالان خلوت بیر یئرده ساخلیرلار کی اونا باخسینلار و کنترل مرکزینه اطلاع وئریرلر شرایطی.

کنترل مرکزی او خطین وضعیتین قرمز ائلیر تا خطر قاباغا گلمه‌سین

5. سحر ساعات یئتدی اولور و کنترلچی نین شیفتی قوتاریر. شیف دگیشیلیر و اوبیری کنترلچی یئتدی ده گلیر ایش اوسته.

6. تازا گلن کنترلچی گؤرور قرمز خطر چراغی یانیر فیکر ائلیر بو سابقه‌سیز سویوقلارا گؤره اشکالی اولدوغونا گؤره یانیر. اولاری خاموشلور (اول اشتباه)

7. دالیدان گلن قاتار کنترل صفحه سینده چراغلارین یئشیل اولماسین گؤرور و کنترلچی نان بیر تماس تاپیر.

8. کنترلچی یئشیل اولماغی تایید ائدیر و دییر کی اشتباه امیش

9. دالیداکی قاتار نهایی تاییدی گرک گؤزلیه کی گؤزله‌میر و نهایی تایید اولمادان یولا دوشور (ایکینجی اشتباه).

و بیزیم اوشاقلارین سون یولجولوغی، اؤلوم قاتاریندا اولور.

----

* عکس و آدلار گرچکدیر آما متن داستاندیر.

* عکس گؤره توضیح: آخرین سلفی. #قطار_مرگ.!
علی وهابی، ناصر باغبان، کریم جنتی، افشین شکوری، امین شکوری، مصطفی علیزاده/روحلاری شاد!

یاواش یاواش سورکلی

1. انسانین صبری و دؤزومی ذاتا آزدیر. گؤردوگی هر بیر ایشده، دؤزومسوزلوکله ته‌له‌سیر تا سونوجون گؤرسون. سونوج و نتیجه‌نی ملموس گؤرمه‌ینده تئز مایوس اولور، ایشدن ال چکیر و باشقا بیر قولدا چالیشماغا گیریشیر. آما باشاری‌نین تک یولو بیر ایشی یاواش یاواش یورولمادان سورکلی (مداوم) گؤرمک‌دیر. امکانی وار نتیجه‌نی بو تئزلیگه گؤرمیک یا نتیجه‌نی گؤرک ده ایسته‌دیگیمیز دوزئده (سطح) اولمایا، بونا باخمایاراق ایشی سورکلی دوام ائده‌جه‌ییک و بیر گون، بیر لحظه‌ده، دوشوندوگوموزده بوگونکی دورومی زامانلار اؤنجه‌ ایله مقایسه ائدنده، آراداکی فرق بیزیم باشاریمیز دئمک‌دیر.

----

* صبر ایله حالوا پیشر ائی قورا سندن/بسله‌سن اطلس اولور توت یاپراغیندان (آذربایجان خالق ماهنیسی)

** رهرو آن نیست که گه تند و گهی خسته رود/رهرو آنست که آهسته و پیوسته رود (سعدی)