سئومک: شوق کیمی، اؤزلم کیمی.
گئجه‌دیر. هاممی یاتیپ، منیم هله یوخوم گلمیر. یئریمین ایچینده رادیو آوایا قولاق آسیرام و دوشونورم. هر آهنگ بیتندن سونرا یورقون کیشی‌نین پندآمیز سؤزی آداما یاتما دییه بیر دومسک وورور! گئجه بو ساعات دوشونمه‌میم عامیلی سن‌سن. سه‌شنبه گونی بیله‌وی اوزگون گؤرندن سونرا یئنه‌ده قلبیمده بیر قارماشیق حیس وار! سنه ایلک وورولدوغوم گون‌لری خاطیرلادیر، حیس مشابه‌دیر شدتی فرقلی‌دیر فقط. بیلمیمرم بو حیس نیه یئنیدن ایجاد اولدی! سه‌شنبه‌دن سنی سئومک یئنیدن جانلانیپ. البته دئمه‌لییم گؤنولده‌کی بو قارماشیق حیس باشقا بیر دویقو دا گئچیریدیپ منه. گؤزل بیر دیقو، آداما انگیزه وئریر. آداما شوق وئریر و خلاصه یاشییرسان دییه بیر شئی‌لر اولور. عئینی اؤلونون دامارلاریندا یئنیدن آخان قان کیمی. اولایین باشقا طرفی، ایستر ایسته‌مز منده سنه اولان انتزاعی سئوگی بیر طورلی سنی صاحیبلنمک کیمی ائیلمه گئچمک ایستیر! و ایشلر ائله بو نقطه‌ده کورلانیر! بیرینه اولان سئوگی‌نی صاحیبلنمک کیمی ترجمه ائدیپ‌ده، صاحیبلنه‌مینده، ایشلر قاریشیر! سوسوز بیرینه بیر لیوان دوزلی سو وئرمک کیمی، سوسوزلوغون شیددتین چوخالتمیش اولورسان! آدامین روح-ی روانی داغیلیر. کئشگه باشقا بیر جور ده سئوه‌بیله‌یدیم. آما ایشین یاخجی یئری بورادیر کی بو سئوگی و صاحیبلنمک گوجی، اسکیلر کیمی دگیل. اونجا بؤیوک. اونجا ییخیجی! بو باعث اولور سنی سئومگی صاحیبلنمک‌دن باشقا آلتئرناتیولره طرف سوروکلمه‌مگی دوشونه‌بیلم. چیتن‌ده اولسا، زور و بلایلا دا اولسا.
باشقا آلتئرناتیولردن بیرین بوجور دوشونمک اولار کی، مثلا ایندی من سنی سئویرم. اینسان سئودیگی بیرین شاد و خوشبخت ایستر. اگر سن باشقا بیری ایله شاد و خوشبخت اولاجاقسان، نه موتلی منه! چتین اولسادا بیله! اصلینده بو منه یئتیر کی سن سئودیگین اینسان‌لا اولاسان و شاد اولاسان. بو منیم اورک سئوینجیم‌دیر، قاتلاشماق چتین اولسادا بیله!
----
*بو یئنیدن اویانمیش قارماشیق حیس‌ده، سنه یئتیشمک، سنی گؤرمک، سسینی ائشیتمک آرزوسی اورگیمده کؤزه‌رییر. بو کؤزون گئچمیشده‌کی اولدوغی کیمی فیشقیرتیلی یانار داغ اولماسیندان قورخورام!
16 آذر 1396
