سیرادان بیر آخشام

1. افطاردان سونرا چکیلمیشم سفرادان کنارا، باجیم یئرده دییه‌سن قاریشقا گؤروپ. دییر: "من همیشه قاریشقادان قورخارام!". دییر "ماللا قاریشقادی، قاناتی وار!". دینمیرم، جواب وئرمیرم. "ماللا قاریشقا" ترکیبی خوشوما گلیر. باجیم گئچیر فلسفی فازا، دییر: " ماللا قاریشقا اوچار؟". دییرم: "هن دا به!". دییر: "گؤر نمنه دوزلدیپ!، گتیر قاریشقانین بئلینه ایکی دانا قانات قوی!!!، یانی نمنه؟!". باجیمین فلسفی فازا گئچمه‌سی منه ایلگینج گلیر. آللاهی خطاب قرار وئررک "گؤر نمنه دوزلدیپ" دئمه‌سی ده هم ایلگینچ گلیر هم ده خوشوما گلیر. قاریشقانی اؤلدوردو باشماغینان. تعجب له دییرم: "اؤلدوردون؟!". تعجب له و قورخاراق دییر: "اؤلدورمویوم؟!!!".

2. افطار یئماق تام بیتمیش. هره اؤز ایشینه قاییتماقدادیر. مودئمی آچیرام، تبلئتی ایشلدیرم و بو سئری تراسدا تلگرامی چئک ائتمک ایسته‌ییرم. آلتیما بیر دؤشکچه آپاریرام و بئلیمه بیر بالیش. اوتورورام و تبلتی آچاندان سونرا بیر وئبلاگ صفحه‌سینین آچیق اولدوغونو گؤرورم و تلگرام تام یاددان چیخیر! بو وئبلاگا ایکی ساعات اؤنجه راست گلدیم. یازیلارین چوخ سئودیم. منجه یوخاری سطحده یازیر. سون پوستوندان علاوه، باشقا گئچمیش پوستلارینا دا گؤز دولاندیریرام و قیسا اولانلاری اوخورام. هن چوخ سئودیم بو وئبلاگی. بو وئبلاگی اوخوماق منی ده یازماق هوسینه گتیریر و بو پوست یارانیر.

3. گئت-گئده سئودیگیم وئبلاگلار چوخالیر. فقط بیر پارا ملاحظاتدان دولایی بوردا لینک وئرمیرم. بیر یئرده آدرسلرین یازیرام کی یاددان چیخماسینلار، بلکه بیر گون لینک ائتدیم.