وای-فای خطرده!
شنبه, ۷ فروردين ۱۳۹۵، ۰۳:۲۱ ب.ظ
1- دونن گئتمیشدیک بیر اوزاق یئرده بایرام گؤروشونه، اوزاق اولدوغونا گؤره بوتون فامئل بیرلیکده هماهنگ گئتدیک کی اولارین دا تکلیف‌لری بیر یوللوق بیلینسین ده گؤزلری یولدا قالماسین کی فیلانی گلدی و فیلانی گلمه‌دی. ائو صاحابینا بیرآز چتین اولور آما اؤزونه گؤره یاخجیلیقلاری دا وار. او جومله‌دن هاممینی بیر یئرده گؤرمک لاپ اؤنملیسیدیر. خوش گئچدی. اما هم گئدیشی و هم گلیش من ماشین سوردوگومه گؤره، بتر یورولموشدوم. بوگون ساعات 10جان یاتدیم! چوخ ماشین سورمگه عادتیم یوخ.
2- اوردا جمعیمیز جمع اولدوغونا گؤره چوخ فرقلی قونولاردان دانیشدیق. بیر قونو کی ایستیرم بوردا دانیشام و باشلیقدا دا گتیرمیشم: وای-فای خطرده! اوردا سؤز دوشدو کی ایندی بیر اَپ گلیپ، فرق ائله‌مز وای-فایین رمزی نجور چتین اولور اولسون، پروتوکولو نقدر زور اولور اولسون، هئچ بیر زامان سورمهدن وای-فای رمزین تاپیر و اینترنت طرفه اولور مفته! اؤنجه‌لرده بونو ائشیتمیشدیم آما چوخ اؤنمسه‌مه‌میشتیم. آما دونن ادامه‌ده بحث اولدو کی بی بی اوغلوم او گون بیزیم ائوده بو یولدان بیزیم اینترنتی ایشلدیپ! بی بی اوغلو اینترنتی ایشلتمک هئچ مسئله دگیل، ایسته‌سیدی رمزی اؤزوم وئرردیم. او زامان مسئله اولور کی بیزیم محترم قونشولاردان بیری ایسته‌یه بو تکنیک‌نن بیزیم اینترنتیمیزدن ایشلده! هم ده اوزون بیر مدت بوجور اولا و سن مجبور اولاسان بیر آی، ایکی آی گئچمه‌میشدن 6-7 سئری بیر گیگ-بیر گیگ اینترنت آلاسان. بوجور اولدو کی بوگون ووردوم دیبینه، و بو ایشی کؤکوندن قاباغین آلدیم. یازیرام بورا کی اگر سیزده قونشولاریزدان نیگران اولساز، شاید سیزین ده دردیزه دیه.
3- مودم-روتئرلرین بیر اؤزللیگی وار کی ائلیه‌بیلرسیز تعریفلیه‌سیز کی هانکی دستگاها وصل اولماق ایمکانی وئرسین یا دا وئرمه‌سین. گوشی‌لرین بلک‌لیستینه تای بیر شئی. ائلیه بیلرسیز ائوده‌کی وایرلئس دستگاهلاریزین مک آی پی* لرین بو لیسته وئرمه‌گینن بیر لیست دوزلده‌سیز و فقط بو لیسته ایجازه وئره‌سیز کی اینترنت ایشلده. بو قدر ساده و بوندان سونرا داها نیگرانچیلیق لوزوموسوزدور. آما بو ایشی نجور گؤراخ:
بیر- مودم-روتئرینیزین مدیریت بؤلومونه گیرین (قوللانیجی آدی و شیفره مودم-روتئرین آلتیندا اولار معمولار، اگر دگیشمه‌سز)
ایکی- آشاغیداکی عکسده اولان مرحله‌لرین بیر بیر گئدین شاید سیزین مودمینیزین مدیریت بخشی فرقلی اولا. اگر فرقلی اولسا Wireless MAC Address Filter آدلی بؤلومو آختاراجاقسینیز.
اوچ- اؤز دستگاهلاریزین مک آدرسلرین تاپاجاقسیز و بئشیمجی مرحله ده دؤره سینه یاشیل کادر سالینان یئرده گیره‌جکسینیز. یاددان چیخماشین کی دؤردونجو مرحله‌ده Allow Association سئچیلسین تا بو لیست مجاز لیست اولاراق بو لیستین دیشی غیرمجاز اولاجاق.
دؤرد-گوشی‌لرین مک آدرسین اندرود سیستم‌لرده بوردان چیخاردا بیلرسینیز کی12 رقملی بیر شماره‌دیر (ایچینده حروف دا وار) کی ایکی-ایکی «:» ایله آیریلیپ‌لار:
