بؤرکومو قویدوم قاباغیما ...

هردن اوتوروپ و دخل خرجیمی حئساپلارام، بوگون ده بؤرکومو قویدوم قاباغیما و دخلیمی یوخ دا فقط خرجی حئسابلادیم! اولده دئییم کی اوقدر ده خرجلی بیریسی دییلم و گلیریمی گؤز اونونه توتاراق اوراجان کی ایمکانی وار خرجیمی آزالتماغا چالیشارام. حئساب کیتاب ائدن‌دن سونرا اونلارا ایکسئل‌ده بیر چارت چیخاتدیم. جالیب نتیجه‌سی اولدو. بورا قویاراق سیزلرله پایلاشیرام.

اوجور کی بللیدیر ان آغیر خرجیم حمل و نقل‌دیر، بئل سیندیریر. ایکینجی رده ده کیلاس مخارجیمدی بو دا چوخدور، اوچونجو رده ده یئمک خرجیم وار و آشاغی رده‌لرده اینترنت و کیتابدیر کی، اینترنت هر آی بؤیله‌دیر آما کیتاب چوخ آیلار اولماز، سئورم کی اولسون آما ایکی مسئله وار. بیری الکترونیکی مطالعه دیر کی کیتاب آلماق قاباغین آلیر و ایکینجی کیتابلارین یئریدیر، گرچکدن ده بؤیوک بیر مسئله اولوپ منه گؤره!

----

*"داشینماق" تحت اللفظی ترجمه‌دیر transportationه!، ساده دئسم حمل و نقل هزینه‌سی :)

**کیتاب مخارجیم هر آی ایچون گئچرلی دییل (متاسفانه) !!!

***بو آی باشقا مخارجیم ده اولدو کی دا اونلاری یازمادیم، مثلا بیلگی‌سایارین بوردو یاندی!!!

بیر روزگار اسدی

1. دونن تعطیلیدی، ناهاردان سورا یاتدیم. گئجه یوخوم گلمیردی! بیر فیلمه باخدیم آدی "پولی ایله بیرلیکته*" کمئدی بیر فیلمیدی. سئودیم، گولدوردو بیرآز. فیلمین بیتمه سی گئجه ساعات بیره چکدی و یاریم ساعات دا اؤزومون یوخوم توتمادی. اودور کی سحر یوخودان دورانمیردیم. موبایلین ایکینجی زنگین بیله‌رک 6:20 قورماسایدیم شاید یوخویا قالایدیم.

2. یوخودان دوراندا قلبیمده بیر آغیرلیق حیس ائتدیم، الله آخیرین خئیر ائله‌سین.

3. گئتدیم اما اوشاقلار گلمه‌میشدی. زبان رشته‌سینده اولان بیری ایله قاییتدیم، عدنان شنسس آهنگی آچمیشدی، من میننده بیردن اوخوماغا باشلادی آزالتدی سسین. آدین بیلمیرم هئچ!

4. قاییدارکن یول اوسته ایکی دانا سنگک آلدیم گتیردیم، 9:40 دا سئوینجک ائوه گیرنده آتامین او همیشه‌کی ناراحات قیافه‌سین گؤرنده بیلدیم کی گینه همان تیکراری برنامه‌میز وار. تانریم دا من یورولموشام ...

----

* Along Came Polly 2004

داشیندیق

بیزیم بو وئبلاگ آچماغیمیزدا بیر فیلم اولدو! اوردان اورا، اوردا اوبیریسینه و داها اوبیریسیندن بورا و هاممیسیدا شیکست له مواجه اولدو. تام بیر تراژدی! اومارام بورداکی بلاگ دا باشاریلی اولسون ایشلر.