هئچ سنده منی دوشوندون مو؟

1. بوگون نیمه شعباندی و ایندیکی یازیرام، گئجه یاریسیدیر دوز. ایکی گوندور فیکرین عجاییب بیر شکیلده قافامدان چیخمیر. چیخمیر کی چیخمیر دا! ایسته‌میرم سنه فیکیرله‌شم! آما الیمده دگیل، نئینییم؟!!

ایکی گوندور بوتون لحظه‌لریمده سنه فیکیرلشیرم! "فیکیرله‌شیرم" دئمک دوز دگیل، فیکیرلشمک ارادی بیر شئیدیر آما سنینکی فرقلی، سنینکی بیر باشقا! فیکرین زورونان قافامدادیر. فیکرین ذهنیمی اسارته توتموش.

2. هئچ سنده منی دوشوندون مو بو اوچ آیدا؟!!!

01/03/1395

----

ی.س.: برات گئجه‌سی، رحیم، آتا، آهنگ، سن، من

* متنی چوخ آبستراکت اولاراق یازدیم، یوخاریداکی کلمه‌لر اؤزوم ایچون گئچرلی‌دیر، آچار کلمه‌دیلر.

سئرچه‌لر چیخاندان سونرا...

1. بوجور آهنگلری چوخ سئورم. شعر ده اؤزوموزدندیر. شاعیر ده اؤز خیاوانلاریمیزدا دولانیپ. اوخویاندا اؤزوموزدندیر. بلکه ده بیر خط واحیده مینمیشم بولارینان، آللاه بیلیر. بوجور غیر رسمی آما درین احساسلی آهنگلری کی ساده شکیلده بیر اوتاقدا اوخونور، سئویرم. بلکه بیر ساده گؤروشدن سونرا چوخ ساده و پلانلانمامیش اولموش بو ایش، آما او قدر گؤزل اولموش کی قولاق آسماقدان دویمورام ...

بیرآز قال،

بلکه بیرآز سونرا گئدرسن،

یاغیشلار کسندن سونرا،

سئرچه‌لر چیخاندان سونرا.

ایندی گئتمه نه اولور،

بیرآز قال

قال، یازیلمامیش شعرلر

قال، یازیلمامیش رومانلار

اوخویورام گؤزلرینده

ایندی گئتمه،

نه اولور بیرآز قال،

چالینمامیش ماهنیلار

دینله‌ییرم...

----

- یانیلماسام "دومان اردم‌"ین شعرلریندن‌دیر.

-چالیپ اوخویانلاری دا تانیمیرام متاسفانه!

بیرآز قال (ویدیو)

بیرآز قال (سس)

بو گونلر2 ...

1. بو گونلر یازماغا هئچ حالیم یوخ! یانی یازمالی قونوم دا یوخ "سن"دن خاریج!!! و "سن"ی بوندان آرتیق یازماق قونونو لوث ائده‌جکدیر دییه دوشونورم. بودور کی "سن"دن یازمیرام ایندیلیک! بو قدر.

زامان قاتیلی

1. نئچه گون اینتئرنتیم یوخیدی، آزاد وقتیم ائله چوخالمیشدی کی. آما نئینییم کی اینتئرنتسیز اولمور. بو اینتئرنت منیم وقتیمین قاتیلیدی. گرک بونا بیر چاره قیلام. یوخ بوجور اولماز.

میلیونلاردان بیری

1. بوگون ده سنی دوشوندوم، داها هر گون کیمی! بوگونلر سنی دوشونمک اؤنجه‌کیلر کیمی دگیل! فرقلی بیچیمده دوشونمک‌دیر. سانکی قبول ائتمیشم کی بو ایلیشکی اولومسوزدور. بو جمله‌لر وازگئچمیشلیگیمین آنلامیندا دگیل، سنی گینه ده دلیجه سئویرم. آما نه ائدیم کی بوندا سونرا بیر ایش گلمیر الیمدن!

2. ایندیلر هر سئری غملی سئودا شارقیلاری قولاق آسدیقجا داها دا قبول ائلیرم کی بوجور بیر شئی انسان باشینا گلر! چوخ انسان باشینا گلیپ، بو آهنگلر او اوزدن واردیلار، بو شعرلر او اوزدن واردیلار، یا بو متنلر... منده اونلاردان بیریم سادجه، بو قدر!

17/02/1395

قادین!

1. گئچن هفته بیر اوزاق یئره گئدیردیک، ماشیندا اوتورموشدوم دوکتور ا. یانیندا. یانی اوولده دوکتورون یانیندا دییلدیم سورا ماشینا گاز ووران زامان کی یئندیک آشاغی، دوباره میننده اوتوردوم دوکتورون یانیندا. سؤز قونوسو ائله اوولده ماشینا مینندن باشلامیشدی: ائولنمک! دوکتور ا. و دوکتور خ. گیر وئرمیشدیلر کی سن یوبانمیسان! سورا کی دوشدوم دوکتور ا. یانینا، حدودا 40-50 دقیقه منه مشورت وئردی کی گئت قاباغا، قورخما. نم ایندیدن باشلاسان بیر ایل چکه‌جک، بیلمیرم ایمکانی وار 10 نفرینن جور دئمیه‌سیز و 11جی ایله جور دییه‌سیز. بیلمیرم اؤزووه معیار نظرده آل، مثلا قد، قیافه، خانواده، تحصیلات، اخلاق و ...

2. دوکتور ا. دییردی قادینلارین اخلاقلارینین یوزده 80ی مشترکدی! یاخجی بیلمه‌دیم اخلاقلارینی یوزده 80ی مشترکدی یا قادینلارین یوزده 80ی بیر بیرینه تایدی! :) آما خلاصه بو کی بیر بیرلرینه بنزیرلر. دییردی قادینلاری تانیماق اولماز! هئچ اؤزلری ده اؤزلرین تانیمیر!!!! :) دییردی مثلا ایمکانی وار خانیمین سنین شالواریندان خوشو گلمیه آما اونو مستقیم بیله‌وه دئمیه و آیری بیر شئیه ایراد توتا مثلا موبایلیوا. دییردی اوندا سنده هئی باخاجاقسان موبایلین او طرفینه، بو طرفینه، دالیسینا، قاباغینا و هئیساد گؤرمینده حئیران قالاجاقسان کی آلله بونون نه‌ییدی؟!!! هئچ فیکریوه خطور ائله‌میه‌جاق کی شالواریندان ناراحاتدی!!!!

3. الله انصاف وئرسین!

4. ایندی کی بونو یازیردیم ذهنیمه گلدی کی شاید من و «سن» آراسیندا اولانلار دا بو جور بیر شئی دی؟!!! الله بیلیر.

----

ی س: بورانی راست گله تاپدیم و بولار یادیما دوشدو یازدیم.

ی س 2: هردن یادیما دوشدوکجن دوکتورون مشورتلرین خلاصه صورتده بوردا یازارام کی یادیمنان چیخماسین، اگر او زاماناجان یادیمدان چیخماسا! :)

دومان؛ حسین منزوی

1. قافلان و آی یازیسینی دونن گئجه حسین منزوی‌نین بیر مصرع سی ایله یاتماق واختی یازدیم*. بوگون سحر بیر تلگرام پستو گلدی بیر کیتاب** تانیتدیریر، کیتاب کیمدن اولسا یاخجیدیر؟! حسین منزوی...

2. ... و من تعجب ایچینده.

----

* گئجه یاتمادان اؤنجه سئریسیندن :)

** «دومان»؛ "حسین منزوی"نین تورکجه شعرلری.

ی س: blog.ir بوگون قاتمیشدیر. عکس قویانمادیم. الله رحم ائله دی پست لار سیلینمه دی!!!

قافلان و آی

«خیال خام پلنگ من به سوی ماه پریدن بود...»
حسین منزوی

1. دییرلر دونیانین ان مغرور حئیوانی پلنگ دیر. پلنگ یالنیز یاشاماغی سئور، تک باشینا. گروپ اولاراق یاشاماز. دییرلر پلنگ او قدر غرورلی دیر کی اؤزوندن اوجادا دوران هئچ بیر شئیی چکنمز. اونا گؤره ده، چالیشار اوجا یئرلرده دورسون، اوجا آغاجلار باشیندا، اوجا داغلارین ان تپه‌ده‌کی قایالاریندا.

2. افسانه، آی بوتون اولان زاماندان باشلیر. دولون آی گؤیلرده ان بؤیوک و پارلاق اولان زامان، پلنگ آیین اؤزوندن اوجالیقدا اولماغینین فرقینه وارار و غروروندان دولایی بو اولایا قاتلاناماز! پلنگ، آیی گؤی اوزوندن یئره سالماغا گؤره گئدر چئوره‌ده‌کی ان اوجا داغ باشینا و چالیشار آیی توتسون. ال آتار، پنجه آتار، دیشلری ایله توتماق ایستر، آما الی آیا چاتماز. باشلار آتیلماغا. آتیلار آتیلار گینه الی آیا چاتماز! باشلار نه گوجو وار آتیلماغا. آتیلار آتیلار و اؤزوندن چیخار! بو آتیلماقلارین بیرینده، آتیلماغین شدت‌یندن و اؤزونو داها بیلمه‌مه‌کدن دولایی قایا باشیندان دوشر دره‌نین تکینه. سوموکلری سینار، بدنی ازیلر و ائله اوردا آیا باخا باخا جان وئرر.

3. افسانه‌نین آردین بوردان اوخویا بیلرسینیز، سید حیدر بیات دیلیندن.

4. «سن» منیم آی‌یمسان. دوغروسو سنین عئشقین منیم آییمدیر. هم اؤزون آیسان و هم ده آدین. آی اوزلوم...

----

ی.س.1 : بو افسانه آذربایجان فولکولورونا عاییددیر و حسین منزوی بیر زنجانلی اولاراق بو افسانه نی شعره چئویرمیش.

ی.س.2: بونو یازاندان سونرا یادیما دوشدو کی حدودا ایکی آی قاباق «آی اوزلوم» آدلی بیر داها یازی یازمیشام، بوردان باخین. نه ماراقلی...

تمرکز

1. سحردن ائوده مطالعه ائلیردیم، آما قاباغا گئتمیردی! نه اینکی مطلب چوخ چتین اولا، بلکه ذهن دا چکمیردی. چیخدیم ائشیکده بیر دؤر ووردوم و گلدیم ایندی ذهنیم ائله دورودور کی ها.

سحر تئزدن

1. بوگون سحر ساعات بئشه 5-10 دقیقه قالان یوخودان دوردوم. بیرآز ایسته دیم خیمیمی چکماغینان یاتام آما سورا تصمیم توتدوم دورام.  ائله او حین‌ده محله‌نین مسجیدیندن اذان سسی گلدی. یاتمادیم چایدانی آتدیم اوسته تکینده بیر ایکی استیکانلیق سو واریدی، یاریم ایستیکان نسکافه‌یه یئتردی. گلدیم ایشه باشلادیم. بیرآز چالیشدیم و بیر نیسبی ایش قاباغا گئتدی. آنام 8ه یاخین گئتدی صبحانه‌یه کوکه آلدی و گتیردی منه صبحانه وئردی. یئدیم و گؤردوم ایندی یوخوم گلیر. ائله اوردا یاتدیم تا ساعات 10:30.