قیرخ بیر گون سونرا گینه سن

1. سون سنی گؤرمم قاییدیردی 41 گون قاباغا. او کذایی گون. او تپ چئویر اولدوغوم گون. او «آه»لار قلبیمه دولدوغو گون. او گوندن سونرا اؤزومو «سن»له ایلگیلی اولان چوخ شئی‌دن اوزاق ساخلاماغا چالیشدیم. فیکریندن باشقا. فیکرین گلنده، سئل کیمی، سونامی کیمی گؤتور آپاریر و بیلینمز بیر یئرلرده خرابالیق ایچینده بوراخیر، تک باشیما...

2.  41 گون سونرا گینه سن. قاپینی چالدی و ایچری گیردی باشیمی بیرآز قاپییا طرف چئویردیم تا کیمین ایچری گیردیگینی گؤرم و اونی گؤرونجه قلبیم اظطرابلا دولدی. آما چالیشدیم اوزومه گتیرمه‌یم. چالیشدیم بیر لحظه‌دن چوخ بیله‌سینه باخمایام. او لحظه فرض توتدوم کی او باشقا بیریسین گؤرمگه گلمیش اورا. ان کؤتو فرض!  گنلده هئچ اصلا قیسقانج بیری دئییلم آما بو شرایطده اونون باشقا بیر ایله دانیشماغین هئچ اصلا چکنمیرم!... ان کؤتو فرضی گؤزومه آلدیم و باشیمی سالدیم اؤز ایشیمی گؤرمه‌یه. او ایکی قدم قاباغا گلدی و اوردا دوروپ منه باخاراق «وقتینیز واردی؟» سوروشدی. «بویورون» دئدیم. گلدی و منیم میزیمین سول طرفینه گئچنده‌ن سونرا کاغاذلارین منیم میزیمین اوستونه قویدوی. «ایلشین» دئدیم. اوتورمادی. صندل بیرآز اوزاقدایدی بیلمیرم اوندان دولایی یا دا بیر مشخص «ذهنی فاصله»‌نی قوروماقدان اؤتوری اوتورمادی، بیلمیرم! بیر مقاله‌نی منه توتاراق «بو مقاله‌نی اوخوموسوز؟» سوروشدی*. اؤنجه‌لر او مقاله‌نی منه وئرمیشدی. اوندا اوخویارام دئمیشدیم. سورا باشیما ایشلر گلدیگیندن دولایی اوخویانمادیم.  «یوخ، اوخومامیشام» دئدیم. ادامه‌ده ایستیردیم دییم «دئسه‌...» کی همزمان اودا سؤزون ادامه وئرمک ایسته‌دی. سونرا من اونو دانیشماغین و او منیم دانیشماغیمی گؤرنده، من اونا «بویورون» دئدیم و او منه «بویورون» دئدی. آما نهایت او دئدی کی «بویورن». «دئسه‌یدینیز اوخویاردیم» دئدیم. جواب اولاراق بیر سؤز دئمه‌دی و سوالین ادامه وئردی. اشکالی واریدی. بیرآز باخدیم . بیرآز اشکالینا گؤره سوال سوروشدوم و نهایت دئدیم کی اوخویوپ، گلیپ دییه‌رم و چیخدی گئتدی...

3. ... و اورگیم قان بوراخیلدی، گینه هئچ کیمسه بیلمه‌دن، اوزومه گتیرمه‌دن...

----

ی.س.:

* گؤزومدن قاچمادی کی گؤزلیمین استرسی واریدی. بیرآز سسی و بیر آز دا اللری تیتریردی. بلکه بو اوزون آرادان سونرا منیم ترسه بیر عکس العمل گؤسترممدن قورخوردی بیرآز!... نه بیلیم. بلکه منی اوجور تانییپ!!!... :)

28/01/1395

بو گونلر

1. بو گونلر باشیم شولوغدی و یازماغادا هئچ حالیم یوخ! نه فقط یازماغا، بلکه هئچ ایشه حالیم یوخ. فقط بیاخ بیر ساعات چرخ سوردوم. خیاوانلار خلوتتتتت. ایکی گون دالبادال تعطیل باعث اولوپ میللت بو باهار گونلرینده اویان بویانا چکیله بیلسینلر.

2. دونن یولداشلارین بیری بیر فیلم* دانلود ائله‌میشدی دییردی «بو ایل بو فیلم بتر سس سالیپ!» دییردی «بو فیلمین اویونجوسی بو ایل، بو فیلیمه گؤره اوسکار آلدی. آدی نمنه دی!». فیلمی دالی قاباخ ائلیردی و اوینجونون آدی یادینا گلمیردی. منیم ده یادیما گلمیردی، آما بیرآز فیکیرلشندن سونرا دئمیشم «دیکاپریو». دییپ «جک**». دئدیم «همان جک! :)». دئدیم منه ده وئر. فلشی وئردیم بیله‌سینه و اینگیلیسیجن دئدیم «گیو ایت تو می، گیو ایت تو می». دییپ «بیلیسن بونون اینگیلیسیده آیری معنی‌سی وار؟!!! اؤزوده لهجه‌ن گونئی آمریکا لهجه‌سینه اوخشور!!!» دئدیم «وای ده ده، اوندا کپی ایت تو می» گؤردوم بو دا یاخجی معنی وئرمیر دالیسیجا تئز دئدیم «کپی ایت تو مای فلش» گولموشم. ذهنیم گئدیپ گونئی آمریکا قاچاقچیلارینا! آما ادامه‌ده دئدی «ائنریکه کیمی». بیلمیرم ائنریکه‌نی دئدی کی ناراحات اولمویام یا یوخ ائله واقعا! نه ایسه من بوجور بیر شئیلردن ناراحات اولمارام هئچ واخت. بیله‌سینه دئدیم بو آخشام بونا باخاجام.

3. آخشام سکیزده ائوه یئتیشدیم بیرآز چؤرک یئدیم و گؤردوم کی من گئدیرم! آنام دئدی دور گئت گیر یئرنده یات. ساعات دوققوزدان یاتدیم تا سحر بئش. بئش ده دوردوم ایکی دانا میوه یئدیم بیر موز و بیر آلما و بیرآز رادیو اف ام ده، رادیو آوایا قولاق آسا آسا تلگراما باخدیم***. آهنگلرین هئچ سئومه‌دیم. رایونو باغلادیم و اؤز آهنگلریمی آچدیم. چنگیر قورت اوغلونون 7 دانا سئچیلمیشی. ساعات آلتی نی 10 دقیقه گئچیردی گؤردوم گینه آهنگ هاواسینا من گئدیرم، اویورام. یاتدیم تا ساعات سکیزه‌جن.

... و نهایت فیلیمه باخانمادیم! :)

----

ی.س.:

*فیلمین آدی: The Revenant (دؤنموش یا دا قاییتمیش، دؤنوپ گلمیش. بو آنلاملاردا)

**دیکاپریونون آدلیم تایتانیک فیلمینده‌کی شخصیت آدی. من دیکاپریونو او فیلیمده تانیدیم. چوخ بتر زامانیدی. اوندا دوم راهنمایی اوخوردوم و ویدیو تازا گلمیشدی! او زامان بو فیلم دییه بیلرم بیر-ایکی آیای یاخین ذهنیمی قاتمیشدی...، او قدر «نیه؟» واریدی ذهنیمده کی ... او قدر غریبه احساسلار واریدی کی قلبیمده ...

*** سئوگیلیم دئمک لازیم دئییل کی نئچه سئری ده گیزلیجه سنین پروفایلیوا باخدیم. عکسین اوردا اولماسادا بیله! بو قدر ...

سونسوز!

1- بوگونلر کیلیدله‌میشم «جمال ثریا»یا. هردن شعرلری معنی وئرمیر آما بیر نئچه گون سونرا قاییدیپ اوخویاندا سانیرام کی بو سفر معنی وئردی! بعضی بئتلری هردن چارپاراق آدامی دوندورور قالیر مثلا:
«گئت ایسترسن جزام قاپ بیر یئرلردن،
گؤرمک ایسترسن، نئجه‌دیر، توتقونلوغومو.»
یانی ای آدام من سنه توتولموشام بیر اینسان جزام توتدوغو کیمی! جزامی آدام درمان اولان زامان منده سندن قورتولاجاغام! هااااایییییی آنلاسانا...

گئدییوروم گوندوز گئجه...

1- عؤمور کروانی گئدیر، یاواش یاواش آما سورکلی. او قدر یاواش گئدیر کی هئچ بیلمیریک هاردان گلیپ هارا گئدیر. بیلمه‌مه‌میز بیر کنارا، هئچ فرقینده بیله دگیلیک! گونده‌کی ایشلریمی گؤرورم. هردن دوروموما اویقون اولان شعرلری آختاریرام داریخاندا. هردن فرقلی قونولارا متمرکز اولاراق گوندوزو گئجه و گئجه‌نی گوندوز ائلیرم و بیردن-بیره گؤز آچیرام گؤرورم کی یولون یاریسیندایام! هن؛ من یولون یاریسیندایام و بو کروان او قدر یاواش گئدیر کیییییی،  هئچ بیر شئیی آلدیرمادان گئدیر...

کیم؟

1. سنی کیم آلدی مندن؟

2. «اوزاقدان سئویرم سنی»

جمال ثریا

سن هر زامان منیمله سن

1. بو اوزون یوللار سنین عئشقین شوقی ایله گئچردی.

ایندی سنین عئشقین خاطیره‌نله گئچیر!

یوخ،

اونوتماق ممکن دگیل!

سن هر زامان وارسان...

«من» 1395/01/17

----

*میانا جادده‌لرینده

گؤیلره یاخین...

1. ائوده حالیم او قدر یاخجی ایدی کی گل گؤره‌سن. هر گون بؤیله اولسون ایستردیم. اوست اوسته قیسسا زامانی اولمایان بیر چرخ سوروش سونراسی. آزجا ایسلاندیم دا، بیرآز اوشودوم ده، و چیله‌ین یاغیش‌دان دولایی بوندان چوخ ایسلانیپ و اوشومویوم دییه قاییت باش نه گوجوم واریدی سوردوم. قان-تر ایچینده. یاغیش داملا‌لاری آلتیندا. سانمازدیم او سوروشدن سونرا بوجور اولام...

1395/01/15

آلدانمیش اولدوزلار

1. گون یاواش یاواش باتماقدایدی و آخشام اولوردو داها. اوسته‌لیک گؤیده‌کی قارا بولوتلار و هردن بیر سپه‌له‌مک‌لری انسان‌لارین آیاقلارین خیاوانلاردان بیرآز داها تئز ییغیشتیرمیشدی. چرخ ایله ایکینجی ال کیتاپ ساتانلارین اوردان گئچیردیم. اورا یاخینلاشاندا اؤزوم اؤزومه سؤز وئره‌رک: "یوخ، کیتاپ زات آلمیاجاغام!" دئدیم. هاوا دوروموندان دولایی، کیتاپچیلارین دا بیرآزی باغلییپ گئتمیشدی. ایکیسینین دوزدوگو کیتابلارا چرخ اوسته باخا باخا تئز گئچدیم. اوچونجوسو کیتابلارا قیمت ده وورموشدی: 2000. اوردا کیتابلارین آدینا باخیردیم کی رد اولام گئدم. بیردن بیر کیتابین آدی و حجمینین آز اولماغی نظریم جلب ائتدی: «آلدانمیش اولدوزلار*؛ میرزا فتحعلی آخوندزاده. ترجمه جمال سید طاهری». آچدیم تصادفی وسطدن بیر پاراگراف اوخودوم. اؤزومو ساخلاشتیرانمادیم...

1395/01/15

----

* ستارگانی که گول خوردند

آنام

1. «...

ساچلارینا اولدوز دوشموش،

قوپارما آننه، آغلاما.

...»

احمد کایا

----

آنالار گونو قوتلو اولسون (دونن 11/01/1395).

فرقینده‌میسن؟

1. بوردا بوتون پستلاریمدا «سن»ین آیاق ایزلریوین اولماسی، سنی چوخ سئودیگیمدن‌دیر. سن یادیما دوشنده «جمال ثریا» اوخودوغومدا چیلدیردیغیمدان‌دیر. یازماغا گؤره بیراز کاغاذ کؤینک‌یمین جیبینده دولاندیرماغیم، ذهنیمی بوتون اسیر توتدوغوندان‌دیر. "اونو سیزلره آنلاتماغا چالیشمام، اونو اونوتماق ایسته‌مه‌دیگیمدن‌دیر"*.

2. کئشگه بیلسئیدین کی «منیم دونیامسان**»  ...
----
* کیچیک پرنس (شازده کوچولو)

**  اورهان گنجه‌بای - بنیم دونیام

     اورهان گنجه‌بای - بنیم دونیان (دنیز سکی سسی ایله)