سون سئچه‌نک

1. دییر: سون سئچه‌نگیم بودور و نظره گلیر ان یاخجی سئچه‌نگیم اولاجاق!

2. اورگیمده دییرم چوخ آغیر و آنلاملی سؤزدور بو. کئشگه بؤیله اولماسایدی ...

دمیر آتمیش حسرتلر قلبیمه...

1. اورگیمه بیر آغیر بیر شئی اوتورموش دا دورمور! چوخ آغیردی چوخ... سانکی حسرت یوکلی بیر یئکه گمی‌نین لنگری دوشموش اورگیمه!

یارپیز

1. سحرچاغی بابام دمله میش گیگیتگن* و پولک چاینیکینین اوستونه آپارمیشام آنام بیرآز یارپیز، بیرآز گینه پولک، بیرآز گینه گیگیتگن، بیرآز توکلوجه و سایر آتیپ گنیریپ آتمیشام قاز اوسته. بایرامین دوز اوول گونی بیر سویوق دییپ، دوزلمک بیلمیرم. ایکی گوندور بیرآز شیدتی آزالیپ اما هله یاخجی دگیلم.

2. دونن یوخ ایسیراغاگون فرهاد گؤچر گلمیشدی "محمتین گزه گنی"نه، پروگرام چوخ گؤزل اولموشدی، ضبط ائله دیم. فرهاد گؤچر آهنگلرین جانلی ایفا ائتدی. فوق العاده ایدی.  گرگ بیر داها گینه باخام. بو آرادا فرهادین شخصیتین چوخ بگندیم و محمت لاپ گؤزومدن دوشدی!

----

* گزنه

95ین سون پستی

1. 1395 ین سون ساعات لارینداییق. بو ایل پیسدن یاخجیدان بوتون اولایلاری لا بیتدی. منه گؤره بو ایل نسبتا یاخجی ایلیدی. البته پیس و آغیر گونلریم ده آز اولمادی بو ایلده، آما اوست اوسته پیس اولمادی. آما هله بوتون لهشمییپ. ائی تانریم اؤز لوطفونله چوخ تئز بو اولایلاری بوتون له شدیر...

2. ائی تانریم 1396 ایلینده هاممییا اوچ شئی ایستیرم: 1) ساغلیق، 2) شادلیق، 3) باشاری. یئر اوزونده ساغلیق دان اؤنملی بیر شئی یوخدور. ساغلیق اولوپ دا شادلیق اولماسا، یاشاییشین آنلامی اولماز. ائی تانریم شادلیق لا بو جیسم لریمیزه روح باغیشلا و غم غصه دن آییر. سونوندا بوتون اینسانلار گؤردوکلری ایشلرده باشاریلی اولسونلار. البته بو اوچ شئی ساغلیق، شادلیق و باشاری بیر بیریندن آیری دگیللر. بلکه ایچ-ایچه دیرلر. بیر بدن ده بیری اکسیک اولورسا، او بیری ایکی دانا دا یاواش یاواش کؤچر! ائی تانریم بو ایلده هر کسین اورک ایستگین اؤزون لوطف ائله.

3. یئنی ایلینیز قوتلو اولسون.

تشکورلر...

1. بیر چوخ مهم قرارا گئده جاغیدیم، چووووخ مهم. طرف تئزه وقت وئرمیشدی. ائوده بیر کیچیک مشورتدن سونرا تصمیم توتدوم تاکسی تلفنی ایله گئدم بلکه قرارا وقتینده یئتشم! «بو بایرام قاباغی ترافیکینده اؤزوی وقتینده یئتیرنمزسن» آتام دئدی. تئز چیخدیم ائشیگه، نگرانیدیم تاکسی یوبانا، قارشی خیاباندا دگیلدی. ایکی قدم بو یانلیق تاکسینین اوردا ساخلادیغین گؤردوم سئویندیم.

2. چوخ جوان بیر اوغلانیدی شوفئر. «فیلان یئره گئده جاغام. اورانین دالیسیندا تازا آچیلمیش خیاباندا». «اوکی» دئدی. «فقط بیرآز ته له سیرم. 11ه 15-20 دقیقه قالان اوردا اولام گرک»! «ایندی خیابانلار بتر ترافیکدی، هر یئر باغلیدی. بیرآز چتیندی» دئدی. دئدیم اولسون باخ گؤر بیه گئده بیلدین. یولا دوشمه دن قاباق، ذهنینده ترافیکی آز اولان مسیری مرور ائله دی. مندن سوروشدی کی یاخجی دی دا. «یاخجیدی، آما سن مندن یاخجی بیلرسن هر حالده» دئدیم.

3. اوغلان ماشینی قازلیر ایندی، بیر دانا چراغی لاپ آخیر لحظه قیرمزی اولاندی رد ائله دی! ماشینلارا چراغ وئریردی، سسی یاخجی چیخمایان سیگنالین چالیردی، دنده عوضلیردی و او جوانلیق قازلاماق و لایی چکمک شوق ون، ترسه سیبقت آلماق هوسین منیم مقصدیمه تئز یئتیشمک اوغروندا سئوه سئوه و سانکی قانونی ایش گؤرورجه سینه یاپیردی و من هئی «گؤزله و مواظب اول دییه اویاریردیم»! یولون یاریسیندا موبالیندان بیر سیم چکدی تاخدی ضبطه و تلگرام کاناللاریندان قاباقجا ایندیرمیش اهنگلری آچیردی، تانیمادیغیم آهنگلر و آهنگ سونا یئتیشمه دن دگیشیردی!*

4. مقصده آز قالیردی، سون چهارراه دا چیراق قیرمیزی اولدی و بیزدن قاباق بیر نئچه ماشین واریدی. اوردا مجبورا ساخلادی. ساعاتا باخدیم. ایسته دیگیم زامان یئتیشه بیلردیم. آهنگی عوضلیه عوضلیه یئتیشمیشدی مصطفی جئجئلی نین یئنی آلبوموندان «قیمتلیم» آدلی آهنگ. سانکی او دا وقتینده یئتیشه جه گیمیزین فرقینه وارمیشدی و خیالی راحاتلامیشدی. دوداغینین آلتیدا مصطفی ایله با هم آهنگی فیسیلدییردی: «باشقاسینی سئومه مک وار، اؤلوپ ده هیچ گؤرمه مک وار، باغیر چاغیر سؤیله مک وار، قیمتلیم بانا گوری دؤن».

5. مقصده یئتیشنده نئچه اولدی دیه سوروشدوم. فیلان قدر دئدی. پولی وئردیم. اؤز پولونی چیخیپ قالانین قایتارماق ایستیردی. منی بو اؤنملی، اؤزوده چوخ اؤنملی قرارا بو ترافیکده، تصادوف ریسکینی گؤزووه آلیپ دا وقتینده یئترماغیوا گؤره تشکورسوز بوراخماییم دییه، «ایسته مز» دئدیم. آما نیه ندن دیله گتیرمه دیم!
----
اوولکی آهنگلر فارسجا ایدی، تانیمادیم. آما آهنگ لرین بیرینین موزیکین تانیدیم. سئزن آکسونون شاه اثری «گئری دؤن، گئری دؤن». اوستونه فارسجا شعر یاراشتیرمیشدیلار.

تولکی

1.

[ماشین دان یئندیک آشاغیا، بیر سیگار یاندیردی، من ده قیچلاریم آچیلسین دییه، بیرآز او ال بو اله اییلیردیم، قیچیمی آتیردیم...]

-ایسیراغا گون بیر تولکی قاچدی ماشین آلتینا!

-ماشین دگدی بیله سینه؟

-هن بابا، سیپر پاتدادی!

-اؤلدی؟!

-هن!

-سحر دگدی یا آخشام؟

-آخشام

2.

-سیپر اوچ یوز آلتمیش مین تومندی! آلله شاهیددی دگن گئجه سی سیپرین فیکریندن سحره جن یاتمادیم!

=ایکی اوچ گون سحردن آخشاما ایشله دیغیوی گرک بونا وئره سن!

-50 مین ده آلیر آچیر باغلیر؛ 400 مین

-ائله یول کناریندا گئدیردی، من یئتیشنده بیردن بیره قاچدی ماشینین قاباغینا!

شنبه نیزی نجور گئچیردینیز؟

1. سحر آلتی دا یوخودان دوردوم. هاوا هله قارانلیق ایدی. احساس ائله دیم سوسوزام و بیرآز دا شیرین بیر شئی وورموشدی قافاما. دوردوم دونن دن قالان چایی و چایدانی آتدیم قاز اوسته تا قیزیشسین. تورکیه دن سوغات گتیریلمیش لوکوم* شیرنیلریدن ایکی دانا گؤتوردوم. بیری آغ بیری ده کاکولی. لوکوملاری سئویرم. بیر خاص دادلاری وار. اؤز لاتیکوموموزا بنزیرلر. گلیشمیش لاتیکوم! چای قیزیشاندان سونرا بیر ایستیکان چای لا جمعه مراسیمیندن قالان بیر شیرنی ده گتیردیم. گیردیم یئریمین ایچینه اینترنتده دولانیم دییه.

2. ساعات 8 ده گئتدیم کوکه آلدیم. شانسدان تندیرین آخیر کوکه لری میز اوسته قالیردی. تئز یئتیشدیم ایکی دانا آلدیم و ائوه قاییتدیم. قاییت باش ایسته دیم گلدیگیم یوللا قاییتمیام و اوبیری یوللا گلم سورا وازگئچدیم.

3. یئتیشدیم آنام چای دملیردی و ایستیردی منه صبحانه حاضیرله سین. بوگون ایسته دیم اوبیریلری صبحانیه گؤزلمیم وبیرآز تئز ییم. یئدیم و اوستوندن ایکی دانا چای و حاضیرلشدیم یولا دوشدوم.

4. یولدا خط واحیدده ائله اوولده بوش صندل واریدی اوتوردوم و بیرآز گئچندن سونرا هدفون تاخدیم قولاغیما و آهنگ قولاق آسدیم: سئزن آکسو.

5. یئتیشدیم ایشلری گؤردوم. اوشاقلارین بیری منه بیر بسته یوللامیش. او بسته نی سوروشدوم. هله یئتیشمییپ.

6. ناهاردان سونرا قاییتماغا قرار وئردیم. خط ده اوتوراندان یوخی توتدی و یئتیشماغا آز قالاندا یوخودان دورودوم. بیر خانیم باخیردی. ایندی دییردی «بو یازیق دا نه یوروقون دوشوپ، مینندن یاتیپ!» :)

7. گلدیم ائوه. ائوده هئچ کیم یوخیدی. چاینیک و چایدان اوردا ایسسی ایدی. بیر ایستیکان چای تؤکدوم و بیرآز اوزاندیم. تلگرامی چک ائله دیم. ایکینجی ایستیکانی لوکوملارینان ایچدیم گینه. هم آغ، هم کاکولی و هم ده قیرمیزی.

----

*lokum

ایش!

1. ایکی آی اؤنجه بیر نفره ایله بیله‌سینه بیر مطلب یازماغیما داییر دانیشمیشدیم. آما سؤز وئرمه‌میشدیم. اوولده بیر ایکی قونو ذهنیمده واریدی، ایسته دیم یازام آما نهایت بیرآز ایشلریمین دولاشیقلیغیندان دولایی بیرآز دا کسین سؤز وئرمه‌دیگیمه گؤره داها یازماق ایسته‌مه‌دیم. «بیر خبر چیخمازسا وازگئچمیشمدیر» دییه دوشونر، بیله‌سینه خبر وئرمه‌دیم. ایکی هفته قاباق اصرارینی گؤرونجه، یازماغا قرار وئردیم و نهایت بیرآز قاباق بیتیردیم. زنگ وورماسین گؤزلورم تا یوللویام بیله‌سینه.

2. بیر آیری یازمالی ایشیم واریدی، گئچن هفته بیتیررم دییه دوشونوردوم آما بیر هفته تاخیر ایله بوگون بیتیردیم.

3. ایشلری قووالامادیقجا، ایش ایش اوسته ییغیشیر!

بیرآز پاپ بیرآز سئزن

1. بئش گون اؤنجه شانسان سئزن آکسو یئنی آلبوم وئریپ دییه اؤیرندیم. «بیرآز پاپ بیرآز سئزن» آدیندا. ایشیم او آن چوخ اولسایدی دا ایندیردیم. سئزن ین آهنگ لرین چوخ بینرم. تا اینکی ایکی گون قاباخ دان آهنگ لری قولاق آسماغا وقت تاپدیم. اوول سئری آهنگ لری بیرآز اوزدن قولاق آسدیم، نه وار نه یوخ دییه آنلایام. ایلک قولاق آسماقدا بعضی آهنگ لرین اینسترومئنت تئماسی ین «دوش باغچه لری» آلبومونون تئماسینا بنزتدیم. آما بو آرادا ایکی دانا آهنگین موزیکین چوخ فرقلی گؤردوم: «کؤز» و «عصیانجی»، و داها دا بگندیم.

2. سئزن آکسو تورکیه ده و گئنل اولاراق تورک دونیاسیندا موزیک استانداردلارین یئنیدن تعریفه مکده دیر و بو یئنی آلبوم ایله گئچمیشدن داها دا باشاریلی اولموشدور دییه دوشونورم. بولوتلار اورتاسیندا قالمیش قوجامان اوجا داغلار اولار. ایشته سئزن آکسو اوجور بیر داغین زیروه سیندن موزیک دونیاسینا باخیر.

3. بو آرادا انسانلارا اورک وئرن مهربانلار دا ساغ و وار اولسونلار...

سنی سئودیگیم ایچین عؤذور دیلرم...

1. «...

مانا بیرآز زامان لازیم،

سس سیز قیامت کیمی ام.

کندیمدن قورتولمام لازیم،

...»

2. هر دن بعضی اوخوماقلاری اورکدن سئورم. هر شئی یئرینده اولار. سس، سؤز، موزیک و نهایت اولسا کلیپ. یوخاریداکی سؤزلر جئیلان ین یئنی اوخوماقیندان دیر. بیاخدان دورمادان قولاق آسیرام!

----

* جئیلان - بانا بیرآز زامان لاریم