بو گونلر3

1. بوگونلر ائله ایلشیپ قالمیشام کی، ایشلر بیر ذره قاباغا گئتمیر. آما گینه چوخ شوکور دوروموم او قدر ده پیس دگیل. بو آرادا روحیه باخیمیندان دا بیر حالته دوشموشم کی بیلمیرم آدینا ایلگیسیزلیک دئسم یاخجی دئمیشم یا یوخ! بیر جورم! گؤنلوم بیر شئی ایستیر. بیر سئویندیریجی بیر شئی. آما نه؟ بیلمیرم.

2. یاشام فلسفه سین ایتیرمک چوخ کؤتو بیر شئی. انسانین یاشامدا گرک بیر فلسفه سی اولا. بیر آماجی اولا. اونا یئتیشمگه چابالامالی بیر شئی اولا مجازی یا حقیقی. بو اولماسا انسان یولون ایتیرر. دوز یا ایری. ایری یولی دا دوز گئدنمز. تام اوقیانوس اورتاسیندا قالان بیر یئلکنسیز گمی یه بنزر. سو آخیمی سئودیگی یئره چکیپ آپاراجاق.

یکنواخت

1. محسن نامجو: ایرانلی 25 یاشیندا پیشیر! دیش گؤرونوشو دگیل. بو پیشمه ایچ گؤرونوشونده اولور. ایرانلی 25 یاشیندا بیر 50 یاش انسان کیمی اولور. بو پیشمه تصمیم لری دوزگون اولماق آنلامیندا دگیل. بلکه 25 یاشینداکی ایرانلی داها یاشامدان بیر اؤدول بیر جایزه گؤزله میر.
2. یولداشیمدان ایللر اؤنجه «نه وار نه یوخ؟ نه خبر؟» سوروشاندا دییردی کی «هر گون کیمی! هئچ تازا بیر شئی اولمور داها، یاشاماق داها یکنواخت اولوب»

عئینی ساعات کیمی

1. بیمارستان دا بیر نفرین ملاقاتینا گلمیشدی. دییردی «منیم ده تیروییدیم دوز ایشلمیر. گئتمیشدیم دکتره دییردی تیروییدین آز ایشلیر. بیر داوا یازیپ بیر ذره، اوندان بیر پارچا آتارام. دکتر دییپ گونده آت، جمعه لر آتما! منده هردن آتیرام، هردن آتمیرام.» «اولسون انشالله داوالاری آتارسان دوزلر» دئدیم. دئدی «بیلیرسن نجوردی؟! تیرویید نه گرک چوخ ایشلیه نه ده آز ایشلیه! گرک دومبلم-دوز ایشلیه». بونلاری دییندن سونرا چالیشیردی بو سؤزی بیر مثالینان یئرینه سالا، بیر ایکی لحظه سورا آرتیردی «عئینی ساعات کیمی، نه گرک دالیا قالا نه ده قاباغا گئچه. عئینی ساعات کیمی دوز ایشلیه». و سونرا گوله گوله دئدی «منیم تیروییدیمین باتری بیرآز ضعیف لییپ!».

آمان تانریم

1. تام هر شئی حل اولموش کن، بیر دولاشیق شرایطه دوشموشم سانکی.

2. بعضی لری ان ساده بیر شئی او قدر دولاشدیرار اؤزونه و اطرافینا بؤیوک بیر پرابلم چیخاردار. ایندی من اؤیله بیریسیله طرفم. باشقاسی اولسایدی منیم بو ایندیکی دورومومدان چوخ سئوینردی اما او بونو بیر بؤیوک درد ائله دی اؤزونه ده منه ده. سئوینجی، غم غصه یه چئویردی! اؤیله بیریسیله طرفم.

بیر گئجه...

1. گئجه ساعات 10 دان یوخوم گلرکن، ساعات 3:30 دان یوخوم قاچیپ و دورموشام!

2. رادیودا نم هانکی حاجی 10 دقیقه دی گیر وئریپ کی خلخالی یازان «زاهد شهر» دوز دگیل ده «حافظ شهر» دوزدور. یاسسی یاسسی، یاواش یاواش دا دانیشیر، تام بیر سنتی ادبیات استادی شیوه سی کیمی. حاجی بو 10-15 دقیقه ده ایکی دانا دلیل گتیرسئیدین داها یاخجی اولمازدی می؟!

3. قونشوموزون اوشاغینین آغلاماق سسی گلیر بورا و فیکریم حاجینین سؤزلریندن آیریلیر. اوشاق بؤیوتمک ده چتین ایشیمیش.

آواتار

1. بوگون آواتار فیلمینه بیر داها باخدیم. ان سئودیگیم فیلملردن بیریدیر. بوراجان چوخ آز اولوپ کی بیر فیلمه بیر سئریدن اضافه باخام. آما آواتارا 4-5 سئری باخمیشام. فیلمده گؤزل مفهوملار وار. او جمله دن «نشانه» مفهومی فیلمین بؤیوک موتیف لریندن بیریدیر. اؤنجه لر ساعات نشانه سینه اشاره ائتمیشدیم. آما نشانه نین بیر فیلمده استفاده ائدیلمه سی هئچ یادیمدا دگیلدی. آواتاردا آنا آغاجین توخوملارین چوخ گؤزلجه نشانه اولاراق قوللانمیشدیلار.

دردلره درمان...

1. «ایغدیرین آل آلماسی
  یئمه گه باغ آلماسی،
یار گلندن سونرا، آی بالام
یارامین ساغالماسی!»

سن رویامدا

1. «سنی گؤردوگوم رویالاری

قورخومدان کیمسه‌یه آچیقلامیرام

پیس یورماسینلار دییه،

سنی منه چوخ گؤرنلر!»

«من»

2. بوگون گ.ده سنی گؤره‌جاغام دییه قویولموشدی اورگیمه! حتی اوردان دؤننده بیر نفری گؤردوم و بیر آن سنه بنزتدیم، او آن دیزلریم سوستالدی و آز قالدی بوکولسون!  بیلیسن ندن؟ قورخودان، حسرتدن، یوخلوغوندان ...

3. ...آما نه ایسه، سؤز چوووخ اؤنملی!

بیر گئجه، ایکی یوخی

1. بو گئجه ایکی دانا یوخی گؤردوم و هر ایکیسینده ده سن واریدین! حتی بیرینده گول اوزونی ده گؤروردوم. سحر یوخودان دوراندان سونرا یوخولار یادیما دوشموشدی و تعجب ائله میشدیم! ایکی یوخی بیر گئجه‌ده، اؤزوده من؟!!! اؤزوده سنین قیافه‌ن ده واریدی اوردا بو سفر. یئریمین ایچینده الیمی آتدیم موبایلی گؤتوردوم و ساعاتا باخدیم: یئتدی‌نی، یئتدی دقیقه گئچیر (7:07)!

2. سویوق دیمه اوچ گوندور یاتیردیب بیله‌می...

اؤلوم دور!!!

1. عجیب هفته‌ایدی! اؤل ها اؤل! عراقدا پاتلاما یوز نفره یاخین اؤلدوردی. سونرا قاتار اولاییندا 50 نفر ده اوردا کول اولدولار. دونن بیر باشقا قاتار تصادوفوندا ایکی نفر باشقاسی اؤلدی و نهایت بوگون اوچاق دوشمه‌سی سونوجوندا، گونئی آمئریکا توپچولارینین اؤلومی، 75 نفر... اؤلوم دور!

2. و بیز نه قدر اؤلوم خبرینه عادت ائتمیشیک... بو دا اورتادوغو اؤزللیگی‌دیر. اورتادوغولونون آلنینا یازیلمیش ظلم و اؤلوم، هر ایکیسینه ده آلیشمیشق متاسفانه.

3. الله اؤلن‌لره رحمت ائله‌سین.