1. لوپدا قولاق آسیلاجاق بیر آهنگ. بیر آهنگ نه قدر احساسلار آداما یاشاتا بیلرمیش؟!
بو آهنگ:
آدامین اورگینه توخونور...
آدامی دوشوندورور...
فولوتون تیترمه‌سی آدامی روحون اوخشور...
آداما آرامش وئریر...
آدامی حزن‌لندیریر...
آدامی آغلاتیر...
آدامی اؤزونه قاپاتیر...
...
----
1. بیر شعر تبریزلی صرافدان*
من ترک-ی شراب-ی لب-ی یار ائیله‌دیم اولدی
زهر-ی غم-ی هجریله مدار ائیله‌دیم اولدی
ای شیخ-ی بهشتی دئمه ترک ائیلییه‌ن اولماز
من ترک-ی سر-ی کوی نگار ائیله دیم اولدی
اؤز جانینی ترک ائیلییه‌ن اولماز من اؤزومدن
روحوم کیمی جانانی کنار ائیله‌دیم اولدی
----
* میرزا رضا صراف تبریزی
1. بیر فیلم دانلود ائله‌میشدیم. بیرآزینا باخدیم. یاریسیندا قالمیشدیم. او گون ایشیم اولدی داها آردینا باخانمادیم. ساباهیسی گون (جوماخشامی) ایشیم آزیدی ناهاردان قاباخ بیرآز دا باخدیم. گینه ائشیکده ایش گلدی قاباغا، گئتدیم اونون دالیسیجا، فیلم قالدی. ناهاردان قاباخ گلدیم ائوه، بیر ساعات زات سورا ایکی حدودوندا آنام گیلی بیر تویا آپاراجاغیدیم. آنام گیل حاضیرلشیرکن بیر پیالا توخوم گتیردیم اوتوردوم تلویزیون قاباغیندا انگلیسی آهنگلره قولاق آسماغا. نئچه دانا اوخودی و من تلگرامدا دولانا دولانا توخوم چیتدیردیم. بیر ربع، ایگرمی دقیقه چکدی. آنام دئدی دور آیاغا. آیاغا دوراندا، ائشیگه چیخماق ایستینده، بیر آهنگ سالمیشدی، منی چوخ ایلگیلندیردی، اؤزللیکله ده ناکاراتلاری. آیاق اوسته باش تاپمیردیم نه دییر. ناکاراتلاری سسین زیر ائلیردی و نم نمنه‌نی چوخ گؤزل بیر ریتمنن اوزادیردی "اییی ایییییی اییییییی ایییییی اییییییی"*. چوخ بگندیم. اؤز-اؤزومه دییردیم کاش بیلئدیم کیمدی کی گلندن سورا دانلود ائلیه‌یدیم. آما حیف کی تانیمیردیم گروهی، هئچ آهنگین آدین دا بیلمیردیم. هئچ سؤزلرین ده آیدین بیلمیردیم. ائله بو فیکیرلردئدیم کی قاپیدان چیخیردیم، بو گینه یئتیشدی ناکاراتا "اییی ایییییی اییییییی ایییییی اییییییی". اؤز-اؤزومه دئدیم «باخ شانسا» و قاپیدان چیخدیم ائشیگه.
2. آنام گیلی یئتیردیم. قاییتدیم ائوه، اؤزومه آنام دئدیگی ناهاری قیزدیردیم، بیرآز دا آیران گتیردیم ایکی قاپاخ دا ککلیک اوتی عراقی تؤکدوم و ناهاری یئدیم. دوغی ایشدیم. قوتاراندان سورا دئدیم ناهار و دوغدان سونرا بیرآز اوزانماق یاپیشار، اما یاتماق ایسته‌میردیم. بو آرادا دئدیم قوی ائله اوزانا-اوزانا فیلمین قالانینا دا باخیم. اوزاندیم فیلمین قالدیغی یئردن آردینا باخدیم. چوخ گؤزل فیلم ایدی، لاپ گؤنلومجه‌ایدی. کیت وینسلت** فیلمین باش رولوندا ایدی، سئوه‌رم. فیلم چوخ رومانتیک بیتدی. شاهانه. فیلمین سون تیتراژی باشلیندا، بیر ایکی دانا یازی یازمیشدی، بیرآز آهنگ ایستیردی باشلاسین ووردوم دایاندی. تلگرامی چک ائله‌دیم، بئش-آلتی دقیقه چکدی. ایستیردیم ائله اوردا کامپیوتری قاپاتام و دورام آیاغا. نم-نیه ووردوم تیتراژ ادامه تاپسین. تیتراژ گئتدی قاباغا، یازیلار اکثرا چوخ کیچیک‌ایدیلر، کامپیوترده اوخونموردولار. طرف تیتراژدا آرام آرام اوخودی اوخودی، منده چوخ فیکیر وئرمیردیم. فیکریم قالمیشدی فیلمده، فیلم منی اؤزویله گؤتورموشدی. آهنگ بیردن-بیره بیر یئرینده یئتیشدی ناکارتا "اییی ایییییی اییییییی ایییییی اییییییی"، فیلم روحومی بدن ده ائله‌میشدی، بونی ائشیدنده اؤز-اؤزومه دئدیم «باخ شانسا!» و روحوم تام بدندن قوپدی!...
----
1. سحر ائودن چیخدیم. گئتدیم اصلی خیاوان طرفینه مینم ماشینا. خیاوانا یئتیشمه‌میش، اوزاقدان بیر بوش پئیکان منه سیقنال چالدی، بیر شئی دئمه‌دیم. بیر آز گلدی قاباغا گینه سیقنال چالدی، بو سئری الیم‌له مستقیم دییه ایشاره ائله‌دیم. ساخلادی. میندیم. قاباغدا اوتوردوم. موبایلیندان آیوکس کابلی ضبطه وصل ائله میشدی و آهنگ آچمیشدی. سئزن آکسویدی. ایندی اوخوماغی یادیمدا دگیل. بیرآز گئدندن سورا دئدیم: "نه بتر اولار هفته‌نین اوول گونی، اوول تاکسیه مینه‌سن و اوول آهنگ سئزن آکسو اولا"...
بو ایل اوچ فرقلی یئرده چیلله مراسیمینده اولدوم. هر مراسیمده خاص بیر شئی‌لر گؤردوم.
1. بیرینده فرهنگیمیز سؤز قونوسی اولدی. اینانیلماز! هئچ اوممادیغیم آداملاردان بو سؤزلری ائشیدیردیم! سورا بلکه بیر پست بونا گؤره یازدیم.
2. بیر باشقاسیندا جمع حافظین فالین بیریسینین شرح-ی حالینا اویقون اولماغین دویوپ دا سس‌سیزلشمه‌نی گؤردوم. اوخویان دا بونی دویوپ دا ایکی بئیت یئرینه شعرین بوتونون اوخوماغی گؤردوم و نهایت همان آدامین گؤزلرینین یاشارماسین گؤردوم.
3. دونن ایکی دانا فیلمه باخدیم: آی‌ایشیغی و گئجه حئیوانلاری. آی‌ایشیغی‌ن7-8 گون اؤنجه باشلامیشدیم. دونن ناهارچاغی قالانینا باخدیم و بیتیردیم. قشنگ فیلم ایدی. فیلمین موضوعسی بیرآز آنورمال گلسه ده منه، آما قشنگ ایدی. آما بو آرادا گئجه حئدوانلارین چوخ بگندیم. فیلم اوچ فرقلی ماجرانی نقل ائتمکده. بیری بیر کیتابین داستانی، بیری کیتابی اوخویان خانیمین ایندیکی یاشامی و بیریده کیتابی اوخویان خانیم‌لا کیتابی یازان کیشی‌نین 20 ایل اؤنجه ائولنیپ، یاشاییپ و بوشانماق زامانلاری. بو فیلم هله ده منی دوشوندورور...
1. «...
سنی من ایچیمه
اؤیله بکله‌میشیم کی
اؤلوروم نفسینه!
ساریپ سارمالا منی
گؤزلیم گول تنینه!
بیر داها دوشرمییز کی؟! بیلمم.
سئودانین بؤیله‌سینه...
...»
1. بیر اوزون دیزینی نئچه مدتدن سونرا بیتیردیم. بو دیزینین ایلک سئزونون 7-8 ایل اؤنجه باخمیشدیم. دؤرت سئزون داها گلمیشدی، آما داها باخمامیشدیم. گئچن ایکی اوچ آیدا آز-آز باخدیم. بو بئش سئزوندا اوست-اوسته 50 بؤلوم واریدی. دونن دیزینی بیتیردیم و بیتیرندن سونرا بیر خاص حیس یاراندی منده! او لحظه چوخ فیکیرلشدیم کی بو احساس نمنه‌دی، اما چوخ آیدین دگیلدی، بیلمه‌دیم...
2. ایللر اؤنجه teenager چاغلاریندا استراتژیک اویونلار اویناردیم بیلگیسایاردا. استراتژیک اویونلار چوخ سورر بیتسین مثلا 4-5 ساعات. 4-5 ساعات دان سونرا دوشمنلری یئنیپ و بوتون نقشه‌نی آلاردیم. او اویونی بیتیرن زامان بیر خاص حیسسیم اولاردی! چوخ اوینویوپ بیتیردیگیمدن دولایی او احساسی بیرآز آنلامیشدیم و "بوشلوق" دییه آد وئرمیشدیم.
3. ایشته بو حیس او حیس‌له تام دا یابانجی دگیل، آما عینی ده دگیل...
----
ی.س.: ایندی بیلدیم کی بو حیس‌ده یالنیز دگیلم! بعضی‌لرینده ده وار.
1. من ایله ب. نین بیر قیسا دانیشماسی:
-بوگون لاپ یورقون ایدیم، زورونان گلدیم.
-هن، پنج شنبه هفته‌نین آخیر گونودور، بیر هفته چالیشماقدان سورا آدام یورولور.
-هن، لاپ ظولومدور. بیر بو پنج شنبه بیر ده شنبه!
-[گوله گوله] هن، شنبه‌نی ده باشلاماق چتین اولار!
2. باجیم کرمان زلزله سینین خبرین وئریر. آبام ائوده ائشیدیر.«زلزله نه بتر دادانیپ گینه!» دییر آبام. نگران اولور. دییرم «کرمان بو دؤره-بر ده دگیل، اوزاقلاردادیر، بوردا گلمز». «نولار هامی مسلماندیر دا» دییر.
----
*کرماندا 6.1 ریشتر زلزله اولدی بو سحر.
