ایلک قار

1. ایلین ایلک قاری بوگون یاغدی. انشالله که خئیرلی اولار. ائی تانریم ائولری سویوق اولانلاری ائوین ایسسیت، و ائولری ایسسی اولوپ دا اورکلری سویوق اولانلارین، اورگین!

2. ایلک قار یاغما مناسبتی ایله بئینیمه ووردی بیرآز قارا گؤره شعر اوخویوم! و ژاپون هایکولاریندان گؤزل نمنه؟!

بیر.

آغ قیروو

بؤیورتلن تیکانلارینین هر بیرینده

قیروو داملاسی

بوسون (Buson)

ایکی.

بیر ایل داها گئچدی؛

و من هله گینه

حصیردن بؤرک و دمپایا گییریم.

باشو (Basho)

اوچ.

قیش گؤلون یانیندادیر

قومساللیق آغاجیندان بوز آسلانیر

قورباغالار هارا گئتدیلر؟

دین (Dean)

دؤرت.

یایین ایلک گونودور-

من فیکیرلشیرم هله

پاییزین سون گونونه

بئش.

قیشین ایلک آیینین سویوق گئجه‌سی

آی و اولدوزلار دؤشنیپلر گؤیه

سولموش و ضعیف اینجی و الماسلار

آلتی.

قیش یالنیزلیغی--

تک رنگلی دونیادا

یئل سسی.

ماتسو باشو (matsu basho)

یئدی.

ایلک قار دون گئجه...

سحر کؤرفز قارشیسیندا

بیردن داغ-آغ

شیکی (shiki)

سگیز.

قارلی مسیر

قوشلارین آیاق ایزی بیتیر

من یاخینلاشاندا

پولونا (polona)

دوققوز.

ایلک قار

قونشولارین آیاق ایزی

هئچ گؤروشمه‌میشیک بوراجان آما!

----

چئویریلر: اؤزومدن

هدفون...

1. قدیمنن بیر هدفونوم واریدی، سیمی قیریلمیشدی. دوزلتمه‌میشدیم. آتمیشدیم بیر کنارا اوردا قالمیشدی. بیر گون اینترنتده بو هدفونون آدین آختاردیم و نسبتا یاخجی بیر مارکاسی اولدوغونی آنلادیم.

2. آیلار سورا تصمیم توتدوم دوباره او هدفونی دوزلدیم. بو هفته باشی گئتدیم 1.5 مئتیر هدفون سیمی آلدیم و بیر دانا هدفون جکی (تاخیلان فیش وار ها). اوچ- دؤرت ساعات اللشندن سونرا هدفونی دوزلتدیم و اینید هدفون قولاغیمدا مصطفی جئجدلی اوخوماقدا و من سیزه یازماقدایام!

----

* اوولده بیر دانا 530 کلمه‌لی بیر یازی یازدیم. سورا دوشوندوم بو قدر جزئیاتا گیرمک گرکمیر. بونی یازدیم. 72 کلمه!

** ایندی حئییفسه‌نیرم کی کئشگه 2 مئتیر سیم آلمیشدیم!

ایکی رویا...

1. جمعه گونی بیر یوخی گؤردوم. ساعات 6 دا یوخودان دوردوم و رویانین وسطینده یوخودان دوردوغوما گؤره تام هر شئی یادیمدا قالدی. دوراندا سورا هئی بونا فیکیرلشیردیم کی من نیه بو رویانی گؤردوم؟ سانکی الیمده‌یمیش کیمی! چونکی او موضوعنی گرچک حایاتیمدا بیر ذره بیله فیکیرلشمیرم، بو دوشونجم بونونلا ایلگیلی اولابیلر!*

2. شنبه گونی ایلک یوخوملا ایلگیلی بیر آیری یوخی گؤردوم! عجبا! بونون بیر آنلامی می اولمالی؟! گنلده یوخولارا اعتمادیم اولمامیش، بیر مهم یوخی بونون ترسین گؤسترینجه بیرآز ایناندیم دئسم؟! اؤنجه‌لر بو مهم یوخی‌نی یازمیشام، لینک وئرمیرم داها.

----

* بیر پایلاشیلمامیش پوست دا بولاری یازاجاغام.

سیرادانلیق...

1. تلگرامدا بیر یاخجی مطلب اوخودوم، سئودیم و ایتیرمیم دییه و سورا گینه اوخویابیلیم اؤزومه فوروارد ائله‌دیم. چوخداندی بو ایشی گؤررم. بیر آن دوشوندوم کی من بوراجان بولاری اوخومامیشام! فقط اوول سئری اوخویوپ فوروارد ائلینده اوخوموشام و او نهایی هدفه گؤره -- کی دوباره اوخوماقدیر--، هئچ بیر سئری ده اوخومامیشام!

2. هارا گئدیرم من؟! او قدر روزمرگی ده گرفتار اولموشام کییییی...

----

روزمرگی‌نین تورکجه‌سین ایندی اؤگرندیم: سیرادانلیق.

بیرآز اوشویورم...

1. بوگون سحر احساس ائله‌دیم بیرآز سویوق دییپ. حالیم تئز دوزلسین دییه سحردن ائوده کاپشئن گیمیشم. اوولده قیزیشماق بیلمیردیم. آز سوار بیرآز قیزیشدیم. بیرآز قاباخ یاریم دانا سویوق دیمه داواسی آتمیشام. ایندی ده ذهنیمه ووردی دورام بیرآز یارپیز دملییم ایچم. 

سیرادان بیر گون

1. اوتورموشام. گؤرمه‌لی چوخ ایشیم وار. آما تک اولمادیغیم شئی حوصله! تلگراما باخیرام. قدیم یولداشلاردان بیری گروها اوغلونون بیر یاش اولماسینین عکسین قویوپ. بیله‌سینه تبریک عرض ائلیرم. آنلایندی. بیرآز کئف احواللاشیپ، دانیشیروخ. قدیمنن دانیشیروخ. ایندیدن دانیشیروخ. باهالیخدان گیلئیلیک ائدیر. دییرم نه خبر؟ دییر هئساد ایش و ایش و ایش! دییرم یاشاماق تکراری اولوپ! جواب وئرمه‌میش دالیسیجا یازیرام هاممیمیز اوجوروق. یازیر یوخ بابا منیم اوغلوم گونده بیر اویون بازلیخ چیخاردار! بیر گون ائوین وسطینه ایشر*. بیر گون منیم بونورما وورار*. بیر گون توکلریمی یولار. 

2. داریخیرام. stingین La amouer آهنگیه یئتیشیر اوخوماق. بیلمیرم نه دییر آما ریتمین سئویرم. اؤزلم قوخور بو آهنگ. تام منیم ایندیکی احساسیم.

3. گؤرماغا ایش چوخ، آما حوصله یوخ. فئیس بوکی آچیرام. بیرآز باخیرام. امره آیدینین تازا ویدیو کلیپی گلیپ. دانلود ائلیرم گؤرم نجور ایشدی. انشالله کی قوی ایش اولار.

----

* افعالی بیرآز تلطیف ائله‌دیم!

قیرمیزی خودکار

1. دیشیم آغریردی، دکتردن وقت آلمیشدیم. گئتدیم اورا، عکسه باخدی و دئدی عقیل دیشیندی، عقیل دیشی دولدورماریق. چکدیرمه‌لیسن! ایگنه‌نی ووردی، اتاقدان چیخدیم ائشیگه بیحس اولسون، چکسین. آز سونرا بیر 20-21 یاشیندا بیر قیز منیم گؤزلریمین قاباغیندا بیردن بیره دالی دالی ییخیلدی. بیر لحظه حالی خراب اولدی دییه‌سن. اولده دالی قایماغین گؤردوم و اؤز ذهنیمده ارادی‌دیر دییه ساندیم و اؤز اؤزومه دییردیم "کی بو قدر دالییا قایسان حتما ییخالارسان نه ایش گؤروسن؟!" کی بیردن بیره تاپپیلتینان دگدی یئره. حئیوانین باشی ائله شاققیلدادی هااا. دکتر تئز گلدی آیاقلارین اوجادا ساخلادی، قان باشینا گئتسین دییه...

2. قاییداندا ائوه مستقیم گئتمه‌دیم، مسیر دؤندردیم بیر آیری یئره گئتماغا گؤره. شلوغ چهارراه دان رد اولموشدوم، ماشینلارین آراسیندا پیاده‌روا یئتیشیردیم کی بیر 35 حدودوندا اولان خانیم منه دئدی "آقا بو اله گئدیرسیز؟"، من دیشیمه گؤره دانیشانمیردیم آما باشیم ایله اشاره ائله‌دیم "هن". سورا دئدی "منه کمک‌ایخ ائلیه بیلرسیز؟ وساییلیم آغیردی آپارانمیرام!" باشیم ایله اشاره ائله‌دیم کی "حتما". بیر نئچه کیف و نایلون وسایل آلمیشدی بازاردان، تورشی وسایلینه بنزتدیم، بیر کیف و بیر نایلونی ساغ الیمده گؤتوردوم. او اؤزی ده بقیه‌سین گؤتوردی کی گئداخ، اونون وسایللری منده چوخ اولموشدی، اصرار ایله بیر آغیر کیفین ده آلدیم سو الیمده گؤتوردوم. احساس ائله‌دیم کی منیم دانیشماماغیمدان راحاتسیز اولابیلر کیفی الیندن آلاندا بیله‌سینه دئدیم کی دیشیمه گؤره دانیشانمیرام.

3. یولدا گئدیردیک، نئچه سئری "حاجی باغیشلایین، حاجی گذشت ائله‌یین" دئدی منه، منده هاممیسیندا "خواهش ائلیرم" دییردیم. "حاجی خطاب اولدوغوما گؤره بیرآز نم نجور اولوردوم" :). آخیرده هانکی خطه میندیغین دئدی. خطه یئتیشنده دئدی "حاجی الله بالالاریوی ساخلاسین!" اؤز اورگیمده تعجبنن "هله آنالارین تانیمیرام هئچ!" D:

4. یول اوستونده بیر گینه 35 یاشیندا بیر خانیم گؤردوم اوتورموشدی یئرده بو هاوادا و قاباغیندا 10-12 دانا آبی و قیرمیزی بیک خودکاری قویموشدی. اورگیم یاندی بیله‌سینه بیر آن دوشوندوم کی کئشگه یاردیم ائدم بیله‌سینه. آما بیر وسایل آلماغا گئتدیگیمه گؤره دئدیم شاید پولوم آز گله اوردا. گئتدیم وسایل آلماق دا جور گلمه‌دی، قاییت باش گینه گؤردوم. 3-4 آتدیم بیله‌سین رد اولموشدوم کی دئدیم قوی کمکلیک ائدیم. قایتدیم و بیر قیرمیزی خودکار آلدیم بیله‌سیندن و پولون بقیه‌سین آلمادیم و چیخدیم گلدیم ائوه...

بیر فیرتینا توتدی بیزی

1. بیر فیرتینا توتدی بیزی دریایه قاردی*

او بیزیم قوووشمالاریمیز یاریم؛ محشره قالدی

 محبوسانه‌ده یاتا یاتا یانلاریم چورودی، یاریم

پنجره‌دن باخا باخا یاریم،ائلا گؤزلر سوزولدی!

----

*قاردی: قاریشتیردی

آکوستیک موزیک

1. تلگرامدا بیر کانال آچدیم "آکوستیک موزیک" آدیندا. لینکین پیوند‌ها دان تاپابیلرسیز. بوردا هابی اولاراق بیر خاص کلاسا متعلق اولان آهنگلری قویاجاغام. اومارام ایلگی چکر.

سؤز اولور قلبه دگر...

1. درسه باخیردیم، یورولدوم بیر آهنگ آچدیم. چوخدانلار قولاق آساردیم، گئچن بیر-ایکی ایلده تویقار ایشیقلی‌یا قولاق آسمامیشدیم. دونندن باشلامیشام گینه قولاق آسیرام. منه کی بتر یاپیشیر. سئودیگیم آهنگلریندن بیرین بورا قویورام.

2. «من کوسدوم قیریلدیم حایاتا

بیله‌مم آلابیلر می گؤنلومی

او مانا نه وئریرسه وئرسین

...»

3. دوغردان دا اینسان بعضی سؤزلری بعضی اینسانلاردان ائشیدنده، سانکی اینسانین سونی گلیر!

----

تویقار ایشیقلی - سؤز اولور