بیرینجی کیشی: بو داش 300 وات دی، آپاریپ زورا سالسان یانار!
ساتان: یوخ! بوردا کی ائله قدرتین یازیپ برقه سالسان نجور اولسا ایشلر، یانماز! [ادامه وئریر] هن! دئمیرم آپاراسان سالاسان آهنه گیر ائله‌دیپ یاندیراسان، او باشقا ماجرادی.
ایکینجی کیشی: داشی آلیر آپارا دمیر کسه دا، خانیم دؤشی کسمیه‌جاق کی...
1. بوگون تدریگین گؤردوم بیله‌وی. کندینی بیر مطلب اوخورکن گؤسترمک ایستیردین، آما تک یاپمادیغین شئی اوخوماق! بیر قیپیرتی واریدی ایچینده، بیر دؤزومسوزلوک، بیلمیرم بلکه فرقلی باش وئرمیش بیر اولایین قایغی‌سی. بلکه بیر باش وئره‌جک بیر اولاین دوشونجه‌سینین اورک تیتردن استرسی!
2. گئتدیم. گلدیم.بو سفر گؤزلرینی یاشلی گؤردوم! تام گؤروشمه‌سه‌ده!
3. گئتدیم. سون ائوه طرف چیخاندا، هاوا شئحلییردی یاواش یاواش، سسیزجه، چوخ نارین، توز کیمی، کیمسه‌نی اینجیتمه‌سین دییه. گؤزلرین تکین...
4. اورگیمین سنله ایلگیلی سون آرزوسو: خوشبخت اول. یولون آچیق...
----
* قافام دییر یازما آما گؤنلوم دؤزمور. بونونلا بئله چوخ‌دا درینه گئتمک ایتسه‌میرم.
13 آذر 1397
1. اوزاقدا بیری، هئچ تانیمادیغین، هئچ گؤرمه‌دیگین، اورتاقینیز نه وار؟! بیلمیرم. بلکه چوخ شئی، بلکه هئچ نه!
2. اوزون زاماندان سونرا بیر کیچیک شئی یازیرسان، چوخ چوخداندان بری باش وورمادیغین یئره گئدیرسن، نه وار؟: بکله‌مه‌دیگین، اورتاق ایزلر...
1. تئلئگراما گئدندن، یازیلاریمین نوعی عوض اولوپ! یازیلاریمین حجمی ده دگیشیلیپ! یازیلاریمین تئزلیگی ده (آیلیق فئرئکانسی) دگیشیلیپ! دئمک یئنیلنمیش چوخ شئیم اولوپ بو مدتده، آما نکته بوردادیر کی بو یئنیلیکلرین هئچ بیرینی سئومیرمممممم...
2. بو یازینی یازاندا، اؤنجه‌لر گؤروپ اوخودوغوم مطلبی خاطیرلادیم: «اونلو یازارلارین یازدیق یئرلری». اوردا نئچه اونلو یازارین هارادا یاراتدیقلارینی توصیف ائدیپ و بیر عکس ایله گؤسترمیشلر*. باشقا سؤز دئمک ایسته‌میرم. دئمک ایسته‌دیگیم شئی بو: یازماغین دا بیر اصولی وار. هره اؤزنه گؤره بیر محیطده اولاندا داها یاخجی یاراتابیلر و امکانی وار روحیه‌سی باشقا یئرده بیر باشقا جور اولسون.
----
* البته بونا قیاس مع الفارق دییرلر. اولار کیم من کیم؟! :)
«راه‌های پیشرفت اقتصادی» کیتابیندا بیر گؤزل نکتهیه ایشاره ائدیر.
دییر کی «گئری‌یه قالمیش اؤلکه‌لر گلیشمک ایسترلرسه، احتمالا ایقتصادی ائوریمده (تحول) الده ائده‌جک‌لری سونوجلار، باتی اؤلکه‌لرینین گلیشمک یولوندا یاپدیقلاری ایقتصادی ائوریملر ایله چوخ فرقلی اولمامالی» بیر باشقا جور ایضاح ائتسم دییر کی گئریه قالمیش اؤلکه‌لر همان ایندیکی کیمی ایشلرینه و ایقتصادلارینا دوام ائتسه‌لر بیر خاص گلیشیمه اولاشمایاجاقلار. ترسینه، گئریه قالمیش اؤلکه‌لر گلیشمک ایسترلرسه مجبورا ایقتصادلاریندا ائوریم (تحول) یاراتمالیدیرلار و نظره‌گلیر یوخاری احتمال‌لا گئریه‌قالمیش اؤلکه‌لرده بو یاراناجاق ائوریم، باتی اؤلکه‌لرینین اؤنجه‌لر یاراتمیش ائوریملر ایله فرقی چوخ آز اولمالیدیر.
ادامه‌ده دییر «بو او آنلاما دگیل کی گئریه قالمیش اؤلکه‌لر، گلیشمیش اؤلکه‌لرین یئنی یوزایلده یاپدیقلاری بوتون ایقتصادی ایشلری، عئیناً تقلید ائتمه‌لیدیرلر! بلکه، گئریه قالمیش اؤلکه‌لرین یاپاجاقلاری ائوریمین دوغاسی (ماهیتی)، گلیشیم آشامالاری (مراحل پیشرفت) و چئوره ایله تطبیق بولمالاری، گلیشمیش اؤلکه‌لرین بو یولدا تجروبه ائتدیکلری ایله گئنل (کلی) فرقلی اولماسی دوشونولمور.» دییر کی یانی همان باتی اؤلکه‌لرینین یاپدیقلاری ائوریملری بیر بالاجا دگیشسه‌لر، ایشلرینه یارار.
ادامه‌ده بو ایکی پاراگرافدان نتیجه آلیر و دییر کی «و نتیجه‌ده، گئریه قالمیش ملت‌لر گرک داها آز چابا و داها آز سوره‌ده گلیشیم یولون گئچسینلر». بو سون جومله‌نی بیر باشقا جور توضیح وئرسم، یانی بو کی چون گلیشمک یولونون آشامالاری اؤنجهدن گلیشمیش اؤلکه‌لر طرفیندن بولونموش و تجروبه ائدیلمیشدیر، نتیجه‌ده گئریه قالمیش اؤلکه‌لر گلیشمک ایچون یئنی بیر شئی بولمامالیدیرلار، یئتر کی همان اؤنجه‌کی بولونموش ایشلری تطبیق ائتسینلر و بو دا چوخ چتین بیر ایش دگیل. باتی اؤکله‌لری ایکی یوز ایلده گلیشمیش اولسالار، گئریه قالمیش اؤلکه‌لر داها آز زاماندا و مثلا اللی ایلده بو ایشی گؤره بیلرلر!!!
بلکه آغلاماغین دا همان ایشلمی واردیر...
البته کی جینسیته باغلیدیر بیراز، یادا بوجور تعریفله‌نیپ.
1. بیر سیرا اولایلارا گؤره حالیم یاخجی دگیلدی. اولای دئمک اولسا اگر! فرقلی ناراحاتلیق بو. بیر پیس اولای باش وئره و اوندان مستقیم ناراحات اولاسان، اوجور دگیل! اوندا آدامین تکلیفی مشخص اولور. بیر ساده و شاید هئچ ایلگیسی اولمایان بیر عمل/ایش باش وئریر. چوخ ساده، بلکه (؟) ده چوخ ایلگیسیز*. او ایش یاواشجا، چوووخ یاواشجا گیریر ذهنیوه. بلکه «سیزیر» دئسم داها یاخجیدیر. چوخ کیچیک و گیزلی بیر دلیک، دنیز اورتاسینداکی قاییق کیمی. او یانا دؤنورسن، او سندن قاباخ دؤنور. بو یانا گئدریسن، او سنله یولداش اولور! کیچیک فیکیر اؤزی بیر شئی دگیل، اصلی سورون اونونلا اویانان مین بیر قوشقو، شک و شایدلردیلر. بیر بیر اویانیرلار، خبرین اولمادان، یاواش یاواش سیزیلار جانیوا. جانیوی شبهه‌لر و کئشگه‌لر آلیر. بیر آن اؤزوه گلیسن، گؤروسن قاییق باتماق ایستیر!
2. ناهاردان تام سونرا چیخدیم ائشیگه. داها بیر دقیقه دایانامازدیم. ذهنیمده چوخدان گئتمه‌دیگیم بیر مسیری سئچدیم. یولا دوشدوم. یولدا اؤنومه باخیرام، هدفون قولاقلاریمدا دینلیرم و آیاق وورورام. گئت ها گئت. هدف یئتیشمک دگیل! سونرا، قاییدیرام، گل ها گل. بو سفر هدف یئتیشمک‌دیر. چون چوخ یورولموشام. یورقونلوقدان، سوسوزلوقدان اؤلورم. ائوه یئتیشندن سونرا، سو ایچیپ و اوزانیپ، یاتیرام...
3. اویانیرام، هر شئی یئرینده. هئچ بیلمه‌دن، بو سفر بو نسخه چوخ یارارلی اولدی. ایندی تام یئنی بیر قاییق کیمی هر شئی...
----
*گؤره‌سن او ایش تام ایلگیسیز ایدی؟! یوزده بیر ایلگیسی اولسا اگر ... (بو ی.س.نی یازاندان سونرا دوشوندوم بلکه یوخاریدا بعضی جمله‌لره «هله‌لیک» سؤزجوگون آرتیرماق دا اولاردی...)
----
لود اولونجا بیر ایکی دقیقه چکیر...
