بیر قادین

بیر قادین دوغار دونیایا گلرسن
بیر قادین باخیب گولومسه‌یر
اوشاقلیقلا وداعلاشیب بؤیویرسن
بیر قادین دوداغینی بوزوب باشینی چئویریب گئدر
قوجالارسان

یاپا یالنیز
تک باشینا
اؤلرسن

حئیدر بیات

دایوئرت

1. آخشام اوستو گون باتا باتدا ائشیک‌دن گلدیم، ائوده هئچ کیم یوخ. بیرآز او ال بو ال چای دمله‌دیم. چای دم آلاندان سونرا بیر استیکان چای تؤکدوم گئتدیم تئلویزیون قاباغیندا چای ایچه ایچه تلویزیونادا بیر گؤز آتام. چایی ایچیردیم، تئلویزیون‌دا دا خاص بیر برنامه اولمادی. اوستونده دیرسکلندیگیم بالیشین کناریندا بیر جیلیدسیز کیتاب واریدی. کیتابین آدی کشکول‌دی. قدیمی کیتاب. جیلیدی نم هاواخت جیریلیپ! ایکینجی چایین بیرآز سویوماسین گؤزلوردوم. کیتابین راست گله بیر صفحه‌سین آچدیم تا قیسسا مطالبین‌دن اوخویام کی بو آشاغیداکی مسئله ایله اوزلشدیم:

2. بو آرادا، یازینین سبکین چوخ بگندیم. فارسجا یازیپ، اؤنملی و پوف نقطه‌لرده عربجه. عربجه‌لر بیر شکیلده یازیلیپ کی تقریبا هر کس اوخویابیلر. بو یؤنتم (تکنیک) ایله اهمیتلی و تاکید اولونمالی نقطه‌لری قاباردیپ.

----

ی.س.
* خصیه‌نی تورکجه کلیمه ساناردیم. دئمک دگیل‌میش ده عربجه ایمیش!
** ایندی بونو اوخودوقدان سونرا بیر باشقا مسئله ذهنیمی قاتیپ، اسکی‌لردن ائل دیلینده دایوئرت* ایچون ایشلنن بیر سؤز وار، اهمیتی اولمایان قونولاردا و یا قونویلا ایلگیلی آدامین اهمیتی اولمایاندا دییرلر کی «سول زادیماجان کی!». گؤره‌سن بو یوخارداکی مسئله ایله ایلگیسی وار می؟ نیه اهمیتی چوخ اولان زادا دایوئرت ائلیپ؟

***divert

دؤن دئسم

 

2. گؤنلوم ایستیر یازام، آما هله یازمیرام. بو آهنگه قناعت ائلیرم. نه گؤزل اوخویور، یوموشاق، اورگه دوخونور...

 

اورهان اؤلمز - دؤن دئسم

داریخماق

دییر: قدیم ایندی‌لردن بتر ایدی.

دییرم: هن، آما ائله ایندی ده بتر دی. بیر تک داریخماق اولماسایدی...

سو گلیپ آخار گئدر

1. ایندی اوتورموشام آبامین یانیندا، اسکیلردن (حدودا 10 ایل اؤنجه) موبایل ایله چکیلمیش بیر ائو فیلمینه باخیر. اؤلنلری گؤرور، اوندا جوان، ایندی نسبتا قوجالمیشلاری گؤرور، آه چکیر و اوخویور:

«بیر آیریلیق، بیر اؤلوم، هئچ بیری اولمایایدی!»

و

«سو گلیپ آخار گئدر

وریانی* ییخار گئدر

بورا جننت باغیدیر

هر گلن باخار گئدر»

----

وریان (vəryan): ایکی تارلا و اکین آراسیندا اولان سینیر

روحونلا یاشییرام...

 

 

1. بیر گؤزل و درین قارا نئی. حتما دینلیین.

بو آهنگ زاهد صابیرآبادلی داندیر. بو تازالیقدا اللهین رحمتینه گئتدی. هله قیرخی چیخمییپ. الله اؤلنلره رحمت ائله‌سین.

 

 

یادسیماق

1. یئنی گؤزل بیر سؤزجوک اؤیرندیم بوگون: یادسیماق.
یادسیماق: (1) یاپتیغی ایشی، سؤیله‌دیگی سؤزو و یا تانیق اولدوغو بیر شئیی یاپمادیغینی، بیلمه‌دیگینی سؤیله‌مک، یاپتیغینی گیزلتمک و یا انکار ائتمک. (2) ایلگیلی، باغلی بولوندوغو بیر شئیه یابانجی قالماق.

2. سانیرام بیزیم قدیم آداملاریمیزین  اؤزگه آنلامیندا ایشلتدیگی «یاد» سؤزجوگو ایله مستقیم ایلگیسی وار. مثلا دییرلر «او یاد آدامدی. تانیمیرام بیله‌سین. بورالاردا گؤرمه‌میشم.»

3. بیزیم دیلده، بو «یاد» سؤزجوگو بیر طورلو یئنی نسلین دیلینه گیره‌نمه‌میش. البته تورکیه لهجه‌سینده ده هئچ دویمامیشدیم، تا کی بو یاخین گئچمیشلرده «یادیرقاماق» دییه بیر کلمه‌نی اؤیرندیم و ایندی ده بی آیریسین «یادسیماق».

دلتنگ

1.

«

دلتنگم و دیدار تو درمان منست

بیرنگ رخت زمانه زندان منست

بر هیچ دلی مباد و بر هیچ تنی

آنچ از غم هجران تو بر جان منست

»

مولانا

2. من.

یئر اوزونده تانرییا ان یاخین اینسان

موبایلیمین آلارمی چالدی. یوخودان دوردوم. سحر 4:45دیر. ائوده هاممی شیرین یوخو ایچینده یاتیپ. هفته‌نین بو گونو منیم ایچون ان چتین گونلردن‌دیر. سحر بو ساعاتدا یوخودان دورماق، اؤلوم گلیر. گئجه موبایلی بو ساعاتا قوراندا، بو ساعاتدا دورمانین نواخت بیته‌جگین دوشوندوم. یوخولو یوخولو دوروپ چایدانین تکینه اوچ-دؤرت ایستکانلیق سو دولدوروپ گاز اوسته آتدیم. ایسسی بیر چای ایچ‌مه‌دن ائودن چیخامغی سئومه‌رم. منیم ایچون گونون ان گؤزل ساعاتلاردان بیری، گونون ایلک چایین ایچمک‌دیر. آدامی جانلاندیریر. سانکی یوخودان تام قوپماق و چالیشماغا باشلامانین سینیریدیر، ایسسی بیر چای. بوگون بیرآز وقت آزدیر. ائودن چیخماغا یوبانمییم دییه زنجفیللی داغ سو ایچمگه قرار وئردیم. طبیعیدیر کی چای کیمی اولمور، آما هئچ‌زاددان یاخجیدیر. ایکی ایستیکان زنجفیللی داغ سو ایچندن سونرا تئز گیینیپ ائودن چیخدیم. هاوا ایشیقلانماسیندان خبر یوخ‌ایدی هله. گون حدودا بیر ساعات سورا چیخاجاق. گئجه‌دن شئحلین یاغیش یئری ایسلادیپ و آسفالتین قارارتیسی چوخراق بیلینیر. یاش یئر، اویان بویاندان یانان چیراغلارین خفیف ایشیلتیسین گؤزه یانسیتیر. قاپینی برکیدیپ و یاواش یاواش سئرویسه مینن یئره طرف حرکت ائدیرم. ائشیکده هئچ کیم یوخ. هر کس‌دن اؤنجه گونه باشلاماق حسسی یارانیر آدامدا. چئوره‌ده سسیزلیک حاکیمدی. یئریدیکجه یئلین یاواشجا اسینتیسینین سرینلیگی اوزه ووروپ و قولاقلارین کناریندان گئچنده یاواشجا فیشیلتیسین ائشیتمک اولور. بو دوروم اینساندا بیر چوخ گؤزل دویقو یارادیر. بیر معنوی دویقو. اؤزوی دونیاداکی تانرییا ان یاخین آدام حیس ائدیرسن. یول بویوجا ایکی-اوچ دقیقه بؤیله گئچیر. سئرویس یئرینه بیرآز قالاندا باخیرام، ماشین اوردادیر. بونو ماشینین دالیداکی قیرمیزی چراغلارینین یاش آسفالتدا یانسیماسیندان بیلیرم، قاچیرام سئرویسه طرف...

بو قلم می یوخسا ایلدیریم؟!

1. آلبئر کامونون یابانجی اثرین بیر داها اوخویورام. رومانین ایلک صفحه‌سینین بئشینجی آلتینجی سطیرینده اوخوجویا منتقل ائده‌جگی حیسسی، تماما منتقل ائدیر! تام بیر ایلدیریم کیمی. ماجرا بوجوردی کی طرفین آناسی 80 کیلومتر اوزاقلیقدا اولان باخیم ائوینده اؤلوپ و اورا گئتمه‌لیدیر، یازیپ: «ساعات ایکی‌ده اوتوبوسا مینه‌جگم و ناهاردان سونرا اوردا اولاجاغام. بؤیله‌لیکله گئجه‌نی آنامین تابوتی باشیندا گئچیره‌جگم، صاباح آخشام دا دؤنموش اولاجاغام» بو جمله‌نی اوخورکن آدام دییر به کی طرف چوخ فورمال، صوری و هر گون گئچیردیگی بیر ایشی تعریفلیر، بونو آناسی هر گون اؤلور، بو دا بؤیله ائدیر! دالیسی‌جا یازیپ: «رئیس‌دن ایکی گون اذن ایسته‌دیم، بؤیله بیر معذرت قارشیسیندا [آناسی اؤلمک] اذن وئرمزلیک ائده‌مزدی. ... حتی اونا "[آنامین اؤلمگی] منیم سوچوم دگیل کی" دئدیم». یئر گؤی قان آغلیر، بو قالیپ رئیسینین فیکرینده کی منه اذن وئرمیه‌جک! بو یئتمز ده، من سوچلو دگیلم، بلکه آنام سوچلودی کی اؤلوپ‌دور گؤستریپ! آردینجا آناسی‌نین اؤلمه‌سیندن دولایی اؤزونه بیر حاق قازانمیش کیمی بیلیر و یازیر: «... اونون [رئیس] منه باش‌ساغلیغی دیله‌مه‌سی گرکیردی. فقط بونی هر حالدا اوبیری گون، منی یاس توتارکن گؤرونجه یاپاجاق». بو سوال آدامین ذهنینده ایجاد اولور کی یاس توتمایینجا آدام یاسلی اولمور می؟ نهایت ایلک صفحه‌نین سون سطیرلرینده آلبئر کامو اوخوجودا ایجاد اولان حیس‌لر و سورولارا یانیلمامیسان دییه تایید دامقاسی وورور و یازیر «ایندیلیک آنام سانکی اؤلمه‌میش کیمی» و ادامه وئریر «گؤمولدوکدن سونرا ایسه، ترسینه، بو ایش سونا ارمیش و داها رسمی بیر حال آلمیش اولاجاق»!