1- گؤزلیم ایندی تام 23 گوندور کی گول اوزونو گؤرمه‌میشم. آما فیکرین قافامدان چیخمیر. میخ کیمی تاخیلیپ قالیر! میخ کیمی. بیر آن یادیمدان چیخمیر. قافامداکی فیکرین اؤلدوروجودور. هردن اؤلدوروجولوگو چوخالیر هردن ده بیرآز آزالیر. هردن بیر دنیزه دؤنور و من آز قالیرام ایچینده بوغولام!
ایندی او آنلارداندیر. نولور گل ده قورتار...
«من» 1395/01/08 15:37
دونندن موتلو سونسوز آهنگی دالبادال 400-500 سئری قولا آسمیشام. هر شئیی اورگه یاتیر. سؤزلر، چوخ گؤزل. آهنگ چوخ گؤزل. چالینان بوتون انسترومنت‌لر آرامش و دینجلیک وئریر آداما. چوخ ملایم اهنگی وار. آهنگ‌ده چالینان فیشقالار دا چوخ گؤزل. آهنگیم وسطینده آزجا چالینان پیانو نوتلاری دا چوووخ گؤزل. چوخ سئویرم بونو.
«...
نولور بو ائودن کیمسه گیتمه‌سین،
بو حیکایه‌ده هیچ کیمسه کیمسه‌یی ترک ائتمه‌سین.
موتلو سون اولماسین،
موتلو سونسوز اولسون.
دوعالاریم اؤرتسون بیزی،
حسرت اوشوتمه‌سین.
آه اؤلوم یالان،
آیریلیق آمان.
...»
بو آهنگ دلی بال آدلی فیلمه اوخونموش. آهنگین آراسیندا فیلمدن اولان دیالوگلاردا گؤزل. آهنگین آخیرلرینده فیلمدن بیر دیالوگ وار: «بانا دلی بال دیورسون. دلی بالین فاضلاسی زهیر دیورسون. دلی بال زهیر.» آریلارین زهرلی چیچکلردن ییغدیغی بالا «دلی بال» دییرلر. آجی بال. فیلمین آدی دا «دلی بال» دیر. چوخ ایستیرم بو فیلمه باخام.
1 . «اویو عئشقیم قوینومدا قایقیسیز میشیل-میشیل». بو جومله، بیر انسان‌ین سئودیگینه سونا بیله‌جگی ان دگرلی شئیلردن بیرین توصیف ائتمک ایستیر. بیرینین قوینوندا عئشق اولاراق اولماق، او زامان دونیانین هئچ بیر شئی مهم اولماماق، و راحاتجاسینا یاتماق، بیر اوشاق کیمی آنا قوینوندا. آما بو جومله‌نی سوراکی محتشم جومله تام کامیلله‌دیر: «منه امانت، گول اوزونده گولومسه‌ین حضور». گولومسه‌ین حضورلی اوزونو دایمی گؤرمک ایچون نه ایش الیمدن گلسه ده گلمه‌سه‌ده گؤررم. مطمئن اول. سئومک یانی بو.
2. یوخاریداکی عکس «سئزن آکسو»نون عکسیدیر. و یوخاریداکی محتشم جومله‌لر اونا عاییددیر. سئزن آکسو تورکیه موزیکی یوکسک زیروه‌لرینده یوخ دا، ان بؤیوک اقیانوسونون ان درین نوقطه‌سینده یئر آلمیشدیر، سوی آدینا تای! او نوقطه‌دن داها درین باشقا بیر یئر یوخ. احساسات پرنسسی دیر سئزن، آدینا تای. و احساسی توصیفلر ایمپراطورلوغونون شاه‌ی‌دیر سئزن آکسو، آدی و سوی آدینا تای ...
3. ... و من بونلاری «سن»ین قولاغیوا پیچیداماق ایستیرم ...
----
ی.س.: بو سؤزلر «موتلو سونسوز» اوخوماغینداندیر. چاغاتای اولوسوی اوخوموش.
1. چوووخ تعجب ائلیر اینسان، بیر چووووخ گؤزله‌نیلمز ایلیشکی گؤرنده آنلاملار آراسیندا، شعرلر آراسیندا، اوخوماقلار آراسیندا ...
2. گئچن پوستلارین بیرینده (بوردا) موراد گؤیه‌باخان‌دان جانلی بیر ایجرایا ایشاره ائله‌میشدیم. موراد گؤیه باخانین اوخوماق آراسی چوخ هیجانلی دیکله‌مه‌له‌ری مشهوردی. او اوخوماقدا دا بیر هیجانلی دیکله‌مه‌لر یاپدی هم آهنگین باشلانقیجیندا و هم آهنگین وسطلرینده. آهنگین وسطلرینده «آدیلوش به‌به*» دییه بیر سؤز دئمیشدی. او گون او آدیلوش به‌به منه چوخ ماراقلی گلدی. آنلامین تام بیلمه‌دیم آما گئچمیشده ده بو سؤزو ائشیتمیشدیم کیمی گلدی منه. او گون اینترنتده آختاردیم قوقول ساندی بیر بیلمیرم اسپانیاجا یا نم هارا سؤزجوگودور (تورکجه کیبورد نصب ائله‌مه‌میشم اونا گؤره). آختارماقدان تئز وازگئچدیم.
3. دونن بایرامین بیری، بیزه بیر چوخ قوناق گلدی. آخشام اوستو ده بیر ایکی یئره واخت اولدو کی گئدک. قاییداندان سونرا کیتاپلاریمدان اوچون گؤتوردوم و تلویزیون قاباغیندا اوزاندیم کی کیتاپلارا دا بیر باخیم. کیتاپلارین بیری فضولی سئچیلمیش غزللری و اوبیریسی احمد عاریف‌ین «حسرتیندن پرانقالار اسکیتتیم»ایدی. فضولی‌دن بیر غزل اوخودوم و یورقونلوقدان ائله اوردا یاتدیم.
4. سحر یوخودان دوراندان سونرا گئجه یئریمده اولاندا یاریمچیلیق قالمیش فیلمین آردینا باخدیم و سونرا احمد عاریف‌ین کیتابین واراقلادیم. کیتابین آخیرلرینده بیر صفحه واریدی یئنی بیر بؤلومون آدین یازمیشدی اوردا: "دیاربکر قلعه‌سیندن نوتلار و آدیلوش به‌به‌نین نیننیسی". بوردا او سؤزجویه راست گلدیم و چوخ تعجب ائله‌دیم! بیر جالیب ایکی گوشه‌لی ایلیشکی قورولدو موراد گؤیه باخانین دیکله‌مه‌سی و احمد عاریف‌ین شعریندن!!! یادیما دوشدو کی شاید قاباخجالار بوردا او سؤزجوگو گؤرموشدوم! آما تام مطمین اولمادیم. شعری چوخ بگندیم. بیر یاشاماق فلسفه‌سین ایستیردی آنلادا، دگرلریوی (ارزشلریوی) نجور اوشاقلارا انتقال وئرمک. آشاغیداکی عکسده دؤردونجو خط. (عکس: اؤزومدن)
5. بوگون بایرامین ایکیسی، بایرام گؤروشلریندن قاییداندان سونرا گینه اینترنتده "آدیلوش به‌به"نی آختاردیم و بو سفر تاپدیم. آنلامین آچیقلامادان یازمیشدی کی جم کاراجادا سسلندیریپ!!! جم کاراجا آلوبوملارینین هاممیسی منده اولدوغوندان آختاردیم و بیر آهنگ تاپدیم آدی "آدیلوش به‌به"!!! بو سفر بو ایلیشکی‌یه بیر گوشه داها آرتیریلدی: جم کاراجا. موراد گؤیه‌باخان، احمد عاریف و جم کاراجا. جم کاراجا احمد عاریف‌ین بئش بؤلوملو شعرینین فقط دؤردونجو بؤلومونون یوخاریداکی عکسده اولان بئیت‌لرین سسلندیرمیش.
6. و من شاشقین...
7. و نهایت «سن»...
بو شعری اوخویاندا دا گینه سنین ایزلرینی بولدوم. هم ده چووووووخ درین ایزلر...
«...
زمهری ده اوزادیقجا اوزادی،
سنی، باهارمیشسین گیبی دوشونویوروم،
سنی، دیاربکر گیبی،
نه‌لره، نه‌لره باسقین گلمز کی
سنی دوشونمه‌نین تادی...
...»
«احمد عاریف»
(عکس: اؤزوم، سون بئش خط)
----
** احمد عاریف‌ین "آدیلوش به‌به" آدلی شعرینین کامیلی: بوردا
*** زمهری: قیش فصلی
**** آدیلوش به‌به : Adiloş Bebe
ی.س.: ... و هاممیسی دا اؤلموش!!! موراد گؤیه باخان، احمد عاریف و جم کاراجا.
الله اؤلنلره رحنت ائله‌سین.
1. هپ بیر حسرت وار گؤنولده،
بؤیوک یا کیچیک.
انسان یاراتیلدیقدان بری...
«من»
1394/12/28
1. چالیشاجاغام بوندان سونرا داها چوخ پستلار قویام. یانی هر زامان بؤیله ایسته‌میشم، آما نه اولسون کی ایسته‌دیگیم آن قافامداکی‌لاری توپلاییپ بیر یئره ییغماق بیرآز چتین اولموشدور. ثانیا ده، سانیرام بو جور یازیلارین بیر "گلمه" زامانی یوخ. یانی گؤزله‌یه‌سن بیر آندا ایچینده بیر دوشونجه پارلایا و او آن یازماغا باشلایاسان، یوخ بؤیله بیر شئی. بو پروسس ساده یازیدان و نثردن چوخ شئعر یازماغا متعلقدی سانیرام.
2. بو سون هفته کی بئکار اولموشام، و یاشامیم او روتین شکلیندن چیخیپ، آنلامیشام کی منه گؤره ان دوشونجه‌لی ساعاتلاریم (یانی دوشونجه دوغا بیله‌جک ساعاتلاریم) گئجه یاتماق ایچون چیراقلاری ووروپ یئریمه گیرندن سونرا و یاتمادان اؤنجه دیر. یئتر کی او آن یانیمدا بیر کاغاذ و بیر قلم اولسون. او آنلار ان سئودیگیم آنلارداندیر.
3. ...
و دون گئجه گینه سنی دوشوندوم یاتمادان اؤنجه،
«یا اللاه، یا کریم، یا رحیم و یا رحمان» دییه‌رک،
بؤیوک بیر کرم دیله‌دیم تانریمدان.
نولور گؤنلومون عزیزی،
بیر بونلاری دوشونسنه
...
بودا «من»دن
1. «سورانین اولماز، آغلارسان گؤزیاشین سیله‌نین اولماز»
بو جمله‌نی ال کاغاذلاریمین بیرینین اوستونده یازمیشدیم. بیلمیرم نه زامان، نه مکان، و نیه؟!!!
2. گئچن پوست‌لا ایلگیسیز ده اولمادی (اشکیم فیشاندیر).
3. بایرام سیل سوپوری سونوجوندا ائشیگه آتیلماق اوزره اولان کاغاذیدی، دئدیم بوردا یاییم. خاطیره اولسون دییه.
1. «نم اشکم مکدر خاطریمدن دفع غم قیلماز،
بو روشندر که، نم آئینه‌دن زنگار کم قیلماز.»
«محمد فضولی»
2. اؤیله چتین دوروم‌دایام کی هر نه اوخویورام شعردن، فلسفی بیر شئی‌دن، دینی بیر شئی دن سانیرام تام بو بئیتین یا بو جمله‌نین یا دا به آیه‌نین مستقیم مخاطبی منم! یوخاریداکی بئیت محمد فضولی دن منیم شرح-ی حالیم‌دیر ایندی (نه فقط بئیت بلکه یوخاریداکی غزل تام منله ایلگیلیدیر بو اندا). عکسی اؤزوم سالمیشام. کیتابین آدی: «فضولی غزللر».
3. سحر بیر متن اوخوردوم اورادا یازمیشدی کی «دونیا امتحان یئری‌دیر». یا تانری منی بوجور سیناغا چکیرمیسن؟ یا تانری بو چوخ چتین بیر سناقدیر دؤزوموم یوخ. لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا، لوطفا منی معاف قیل بو چتین سیناقدان، نولور دا لوطفا...
4. گینه اومودوم سنه دیر ای بؤیوک تانریم...
بیر فیرتینایا دوشموم کی قورتولاجاغیم یوخدی. یاری قانع ائلینمیرم...
ایکی آیدی یئر و گؤی آراسیندا تعلیقده قالمیشام. بو قدر چتین یارمی ایدین سن؟!!!
بوتون حوزونلو اوخوماقلار ایندی آنلام وئریر منه. الله آخیرین خئیر ائله‌سین. دونن ت.ر.ت. موزیک ده رحمتلیک موراد گؤیه‌باخان دان بیر ضبط اولموش جانلی ایجرا یاینلاندی، فوق العاده ایدی. ایشین اصلی ائدیپ آک بایراک* یندیر آما موراد بگ فوق العاده سسلندیرمیش.
حسرتینله یاندی گؤنلوم
حسرتینله یاندی گؤنلوم
یاندی یاندی سوندو گؤنلوم
اول یوکسکلرده اوچدو
دوزه ایندی، شیمدی گؤنلوم
***
گؤزلریمده قانلی یاشلار
حسرتین باغریمدا قیشلار
باشا گلدی اولماز ایشلر
یوخلوغوندا سولدو گؤنلوم
***
آرامیزدا قارلی داغلار
حسرتین باغریمدا قیشلار
باشا گلدی اولماز ایشلر
یوخلوغوندا اؤلدو گؤنلوم
***
گله‌جکدین گلمز اولدون
حالیمی هیچ سورماز اولدون
یارالاریمی سارماز اولدون
یوخلوغوندا اؤلدو گؤنولم
چاغاتای اولوسوی - موتلو سونسوز (mp3)