بیر گون2

1. پنجشنبه ائوده‌ایدیم. ذهنیمده واریدی چیخارام ائشیگه بیر دؤر ووررام ناهار اوستو گلیپ ایشلریمی باشلارام کی مهدی زنگ ووردی، "کامپیوترینده متلب وار می؟" سوروشدو. "وار" دئدیم. "بیر دانا چوخ بتر اشتباه ائله‌میشیم، حتمن گرک شنبه‌یجن دوز نتایجی اله گتیرم و اوستادا گزارش وئرم" دئدی. "آهان" دئدیم. "4 دانا ران‌دیر منیم لپ تاپیمدا هره‌سی 40 ساعات چکیر، لپ تاپ شنبیه ال وئرمز، زحمت اولماسا وئریم سن کامپیوترینده قوی" دئدی. "منیم کامپیوتریم سنینکیندن قوی دگیل، فیکر ائلیرم منیمکینده 50-60 ساعاتا یئتیشه" دئدیم. دوغرداندا اونون لپ تاپی core i5، مینم کامپیوتریم Dual core. بونی ائشیتدی و او ذره‌جه اومودی ده آرادان گئتدی. اومودسوزجاسینا دئدی "اولوسن هئچ اولماسا بیرین وئریم سنه، بیرین ده اؤزوم قویوم، گؤروم باشقا بیر ایکی نفر ده تاپا بیلرم"، سورا آرتیردی "منیم دؤرمده کامپیوتری قوی اولان آدام یوخ". "اوکی" دئدیم و خداحافظلشدیک.

2. ایکی دقیقه سورا گؤرودوم مهدی نی بو شرایطده بیراخماق انصافدان اوزاقدی. زنگ ووردوم بیله‌سینه و دئدیم کی "حللدی، یولون تاپدیم. سن دؤردونده یوللا منه. شنبه نتایجی مندن ایسته". حالی بیرآز یئرینه گلدی. سورا باشلادی تعارف ائله‌ماغا. "هئچ زحمت دگیل" دئدیم. دوردوم گییندیم و ایمیلیمدن فایلاری گؤتوردوم، یولا دوشدوم ... و نهایت هر ران‌ی بیر کامپیوترده قویدوم. سرعتلری یاخجی ایدی تقریبا هر ساعات 9 دانا SS گئدیردیلر. مهدی‌نین لپ تاپی هر SSی 40 دقیقه ده گئدیردی!

3. بوگون اؤزوم گئدنمه‌دیم، اوشاقلارین بیرینه دئدیم او فایلاری او کامپیوترلردن ییغ یوللا منه.

بیر قیسا سفرنامه

1. سحر تئز، چوووخ تئز یولا دوشدوم. هاوا گئجه یاغماغینا گؤره بیرآز سویوق ایدی. ماشینا یئتیشینجن اوشودوم بیرآز، باشیم اوشودو.

2. اوولده ائله یولون بیرآزی قارلی ایدی، قورخوتدی. 3-4 کیلومتر گئدندن سونرا دوزلدی، یولون چوخو یاغیشلیق ایدی، برف پاک کن اکثر اوقات ایشلیردی.

3. یاتمیشدیم، بیر یئرده یوخودان آییلدیم گؤؤوردوم کی نه!!! بیر آغیر دومان ایچینده گئدیریک، بو صحنه‌نی سئودیم. یولداشلاریم شوفر ایله بیرلیکده دققت ایله ائشیگه باخیردیلار و هردن دانیشیردیلار.

4. قاییت باشدا گینه بتر آغیر یاغیش یاغیردی. آخیرلرده گینه دومانا دوشدوک، آغیر بیر دومان...

5. گؤزل حیسلر یاشادیم بوگون ایچیمده...

حیرصلنمه

1. بوگون بیر اولای اوستونده بیرینه حیرصلنمک پتانسیلیم واریدی، آما اؤزومو ساخلادیم و حیرصلنمه‌دیم. حیرصلنمه‌دیم کی هئچ، هئچ بیر کلمه ده دئمه‌دیم کی کاش بوجور ائله‌میه‌یدین و "اولسون دوزلدریخ" دییه دییه نهایت او ایش 3 ساعات چالیشاندان سونرا حل اولدی. ایندی ایکی ساعات او ایشدن گئچیر و بو حیرصلنمه‌مه‌گیمه گؤره او قدر اؤزومنن راضی‌یم کییییییییی، گل گؤره‌سن. چوخ شوکور تانریم.

2. "نولار ایشدی دا، اولار. آدامین باشینا گلر. هئچ اوزونه‌ده گتیرمه" بو تازا جهان بینیمدی. چتیندی آما کاش ساخلیا بیلم.

3. بوندان سونرا چالیشاجاغام قیسسا یازام، اگر سؤزومو توتا بیلسم ... :)

هر شئیی یاخ...

1. «...

منی یاخ، کندینی یاخ، هر شئیی یاخ

بیر قیویلجیم یئتر، من حاضیریم باخ

ایستر اؤپ-اوخشا، ایستر اؤلدور

عئشق ایچین اؤلمه‌لی؛ عئشق او زامان، عئشق

...»

2. «...

منی یور حسرتینله، سئوگینله یور

سئوگیسیزلیک آیریلیقدان داها زور

دیله‌دیگین قدر آجیت جانیمی

وارلیغین دا، یوخلوغوندان، یئتمیور.

...»

----

* بیر شاه اثر سئزن آکسودان. دومان یئنیدن سسلندیرمیش. عکس دومان وکالینین کیدیر: تان کانگؤزه.

** بو پست وئبلاقین یوزومونجو پستودور! نه تئز ...

***   سئزن آکسو - هر شئیی یاک

**** دومان - هر شئیی یاک

چوخ یورقونام...

1. یورقون-آرقینام. آما کاش فقط یورقون اولایدیم.

2. بوگون گلدیم ساعات 6 دؤره بری یئتیشدیم ائوین قاباغینا، سحر تئزدن ائودن چیخاندا آچارلاریمی میز اوسته گؤردوم آما اؤزوم گؤتورمه‌دیم کی لازیم دگیل. ایکی اوچ سئری ائوین زنگین ووراندان سونرا گؤردوم کی ائوده کیمسه یوخ. زنگ ووردوم، دئدیلر «ایندی چیخمیشیق، چای تازا دمدی گئت ایچ». دئدیم کی «آچاریم قالیپ ائوده آما تلسمیین بوردا پارکدا صندلده اوتوررام». گئتدیم پارکدا اوتورماغا بیر یئر یوخیدی. اصلینده اوتورماغا چوخ دا قصدیم یوخ ایدی. باشلادیم یاواش یاواش قدم وورماغا. اوردان یاواش یاواش گئتدیم ایچریه طرف. بیر خاص صمیمیت وار ایچریده. وسطده چای احسانی واریدی. چای ایچمک گؤنلومده واریدی آما قاباغا گئتماغا اوتاندیم. رد اولدوم گئتدیم. مسجیدین دالیسیندان دؤر ووردوم گلدیم. گینه همانکی چای احسانینا یئتیشدیم. بو سفر گئتدیم قاباغا. بیر تازا چای تؤکدو و سماوردن داغ سویون تؤکدو. دئدی ایسسیدی، الین یانماسین. ال ووردوم، چوخ چوخ ایسسیدی. اوردا میزین بیر طرفینده دوردوم و گؤزله‌دیم بیرآز ایسسیسی آزالسین. جماعته باخیردیم. و هپ دوشونوردوم  و قافامدا سواللار.

3. چایی پوفلیه-پوفلیه ایچدیم و «الله قبول ائله‌سین» دییپ یولا دوشدوم گینه. دوشگون و دالقین. یولدا بیر پیشیک بالاسی گؤردوم ماشین آلتیندا اوتورموشدو. بیر ایکی سئری پیش پیش ائله دیم بیله‌سینه، دوشدو منیم دالیمجا، اوینیا اوینیا گلیردی. هردن دورودوم، او دا دوروردی و اؤزون کناردا اولان آغاجلارا، جدوللره سورتوردی و منه سیرتیلیردی. ایکی قدم گئدیردیم گینه گلیردی، دوروردوم، دوروردی. کی تلفنیم چالدی کی بیر گلدیخ، گل ائوه.

4. یوخوم گلیر، دییردیم بوگون شاخسئیه چیخیپ باخاجاغام. آما دییه‌سن اولمیاجاق. چوخ یورقوننام، آرقینام. آما کئشگه فقط یورقونلوق اولایدی...

اؤلوردوم سنین ایچین...

1.

«بیل کی دورماز قوشاردیم، تک سئوه‌نیم سن اولسان

قاناتلانیر اوچاردییم، گل دییه‌نیم سن اولسان»

...

«سورما قلبیم نه ایچین، آغلییر ایچین ایچین

اؤلوردوم سنین ایچین، تک سئوه‌نیم سن اولسان»*

2. بو پست دا باشقا بیر شئی یازماغا نییتیم یوخ ایدی. آما گولدن‌ین سسی منی بو ایشه مجبور ائله دی. او سس و سسین آهنگی آدامی تفاوتسوز بیراخمیر.

----

* بیر شاه اثر گولدن کارابؤجک‌دن.

گولدن کارابؤجک - تک سئوه‌نیم سن اولسان

10:10

1. خوابگاهین آشاغیسیندا بیر توکان واریدی، توکاندا دوران دا ائله خوابگاهین اوشاقلاریندانیدی. درس ایشلرین قوتارمیشدی آما هله دفاع ائله‌میردی کی آیری ایشلره فرصت اولسون. بیرآز داستان کتابی واریدی و بیر قوطودا، ساخلادیغی تافئل کارتلاری. مطالعه اهلی ایدی، کیتابلاریندان بللی ایدی. چالیشیردی خاریجه گئتسین، تافئل کارتلاریندان بللی ایدی.

2. گئتمیشدیم آشاغیدا توکانا، بیرآز شاما وسایل آلام. نم نجور اولدی ساعاتی سوروشدوم بیله‌سیندن، باخدی قولونداکی یئکه و گوبود ساعاتا "10 ی 10 دقیقه گئچیر" دئدی. "دقیق؟" سوروشدوم. "دوز!" دئدی. "سنین خوش شانسلیق ساعاتیندی!" دئدی. من تعجب‌له "نیه؟!" سوروشدوم. "هر ایکیسیده بیر عددی گؤرسدیر دا!". داها باشقا بیر شئی سوروشمادیم. آما اوندا او نظریه‌نی سئودیم. خاص منطقی بیر دلیل ده آختارمادیم نیه کی منیم ساعاتلاریما بیر خوش شانسلیق دا باغیشلادی و بو گؤرردی. عئنی اولماسادا ذهنی بیر خوش شانسلیق باغیشلامیشدی.

3. اوندان سونرا بیر نئچه مدت او فیکر باشیمدا قالمیشدی و هر ساعاتا باخاندا، اگر ساعات و دقیقه ایکیسیده بیر عددی گؤرستسئیدی و یا اگر بیر آنلاملی ترکیب راست گلسئیدی مثلا 12:13 سئوینردیم. او اوغلان دئمیشکن، بیر خوش اتفاق گؤزلردیم. اتفاق دوشمه‌سه‌یدی ده! ذهنیمده بیر خوش اتفاق دوشردی!

4. ایندی باخدیم سون پستوم 7-8 گون قاباغیدی، آما ذهنیمده بیر ایکی آی فیکر ائلیردیم!!! و چون بیر ایکی آی واقعیتده چوخ زاماندی، اؤز-اؤزومه دییردیم کی دا چوخداندی یازمیرام و چون چوخداندی یازمامیشام یازماق ذهنیتیمده آزالمیشدی (در حالی کی واقعیتی یوخدور فقط 7-8 گوندور!). ساده دئسم: یازماغا الیم گئتمیردی نیه کی ذهنیتده چوخ قدیم گؤردوغوم ایشیدی یازماق، نه تازا بیر ایش. تازا ایشلریم ذهنیتیمده بو 7-8 گونون ایچینده گؤردوقلاریم اولموشدی، زامانی بیلمه‌یه‌رک! یازماغین ذهنیمده سیلینمه‌سینین بیر علتی بودور. بیر آیری علتی ده بو کی ... نه ایسه، اوزاتمییم. بیرآز چوخ فلسفی اولدی دییه‌سن :)

5. بو پستون محرک پستی اوخودوغوم وئبلاگلارین بیریسی اولدی کی انسانلار آراسی گؤزل احساسلاری پایلاشماق دان یازمیشدی. بوجور کی امکانی واریدی من ائشیکده اولان زامان بیردن بیره یاغیش باشلاسایدی، ایسلانماغیما گؤره او لحظه یاغیشدان خوشوم گلمیه آما منیم کناریمداکی بیری بیر خوش ذهنیتله منه دئسه کی "نه گؤزل یاغیش یاغیر، نمنه ایندی الله دان ایسته‌سن وئره جاقدی". منیم پیس ذهنیتیمی یاغیشا گؤره دییشه‌جاقدی. و شاید عؤمور بویو بو احساس منیمله اولا. بوجور اولدی کی منیمده گئچمیشده بیر آیریسی طرفیندن آلدیغیم مشابه خوش احساس یادیما دوشدی.

6. بودا گؤزل بیر احساس اولدی او وئبلاگ طرفیندن، ساغولاسینیز!

----

* باشیم او قدر شلوغدی کی، 7-8 گون بیله‌مه ایکی آی گلیر!

* او ساعاتا گؤره اولان ذهنیتیم آرادان گئتمیشدی چوخداندی، هئچ یادیمدان چیخمیشدی دییه‌بیلرم. نیه کی هر ...

* بلکه ده او وئبلاگ هئچ بولاری ایسته‌میردی دئسین! ایسته‌مه‌سه‌ده منیم فعلی برداشتیم بودور و بو منی گؤرر هله‌لیخ :)

* گینه بو پست اوزون اولدی، اوول باشلایاندا دییریم 2 سطیر هئچ اولمایاجاق! :)

امیر

1. بیر یئرده ایدیم ایکی دانا خانیم دانیشیردیلار

«

...

-امیر بیزیم وام آلماغا ضامن لازیم اولاندا هئچ بیر کلمه دئمه‌دی گلدی ضامن اولدی. تانیانلار ضامن اولموردولار!

-هن، منده یاتاندا ممد ایله امیر گلدیلر قان وئردیلر!

...

»

بیرآز فیکره گئتدیم. داها سونرا نه دانیشدیلار متوجه اولمادیم. اؤز اؤزومه دئدیم امیر نه بؤیوک انسانیمیش. بیلمیرم امیر ایندی آللاهدان نه ایستیر*، ائی بؤیوک تانریم امیرین گؤنلونون مرادین وئر.

2. ائ آللاه اطرافیمیزدا بو یاخجی انسانلاردان بول ائله.

----

* بلکه ده بیلیرم...

هانکی شارقی...

1. «هانکی شارقینی دویسام،

بیزیم ایچون سؤیلنمیش سانکی.»

جمال ثریا

من سانا مجبورام

1. بو گونلر باشیم شلوغدی و یازماغا وقتیم یوخ. البته یازماغا انگیزه‌م چوخ چوخدی هااا، نیه کی اوخوجولار چوخ مشتاقدیلار. بونی کامنتلر گؤستریر، اوخوماقدان دویمورلار!!!

2. یازیق بو دیلده کیتاب یازانلار!

3. آما نئلمک اولار کی بوینوموزادیر. شاعیر دئمیشکن "من سانا مجبورام"!

4. سانیرام بیر علت ده بلاگین عؤمرونون بیتمه‌سیدیر. بلاگ سون نفسلریندهدیر. نیه کی ایندی سوسیال مئدیا دؤنمیدیر: فئس بوک، تویتر، اینیستاقرام، تئلقرام و سایر. گئچن اون آیدا 85 دانا پست یازمیشام و محتوی باخیمیندان چالیشمیشام اوراجان کی الیمدن گلیر بوش اولماسینلار. هر آیا دوشور 8.5 پست. اگر بولاری بیر سوسیال مئدیادا پایلاشسایدیم سانیرام ایندی 40-50 نفر ثابیت اوخوجوم واریدی! سانیرام بو زاماندا بلاگ یازماق بو ایندیکی مدرن ماشینلار کناریندا آت-قاتیر سورمک دئمکدیر...

----

ی.س. 1: آما اؤز آرامیزدی یازاندا آدام ائله یازیر. حالیم یوخ، وقتیم یوخ دییه‌سن بهانه‌دیر :)

ی.س. 2: نه بیلیم؟!!!