گوله گوله...

1. دؤرد ایل بیر موسسه ده مدعو اولاراق ایشلیندن سونرا بوگون همکارلیغی قطع ائله‌دیم. هئچ ده ناراحات دگیلدیم، چوخ دا سئوینیردیم. سانکی چیینلریمدن بیر یوک گؤتورولموش!

2. اؤنجه‌لر اوستادیمیز تعریفله‌میشدی کی "من اورا گئتماغی سئوردیم و دوشونردیم کی اورانین اؤزون سئویرم، آما سورا آتام و آنام اؤلندن سونرا گؤردوم کی من آتا آنامی سئوردیم کی اورا گئدردیم. نیه کی اونلاردان سورا اورا بیر داها آیاغیمی قویمادیم"*

3. بعضا بیر مکانلاری خاص سئوه‌ریک. اوردا اوره‌گیمیز آچیلار، شنلیک دوغار ایچیمیزده. و بو سئوماغی او مکانا نسبت وئره‌ریک سانیرام تام بیر یانلیش حیس دیر. بیز مکانلاری اوردا اولان آداملارا گؤره سئویریک و یا اوردا اولان خوش خاطیره‌لره گؤره. بونو بوگون او موسسه‌دن آیریلاندا گؤردوم، من سئودیگیم انسانلارین بیر تعدادی اوردان گئتمیشدی و بیر تعدادینین دا اوزوندکی ماسکی دوشموشدی!

4. چالیشاق بیر جور یاشایاق کی اطرافیمیزداکیلار بیزدن آیریلاندا و یا آیریلماغا مجبور قالاندا ناراحات اولسونلار نه اینکی سئوینه سئوینه گئتسینلر!

----

* بعضی حاشیه متندن داها فایدالی اولار. او اوستادیمین منه اؤرگتدیکلری اکثریت یادیمنان چیخابیلر آما بو سؤزو او گوندن قافاما تاخیلیپ و تا عؤمروم وار یادیمدا قالاجاق. بیر عؤمور یاشاییپ و دوشونمک نتیجه‌سینی اؤزتن بیر سؤزدور بو، قولای قولای تاپیلماز بولاردان.

زنگ

1. من چیراغ دالیسیندا اولاندا، بیرخانیم موبایلدا حیرصلی دانیشا دانیشا خط کشیدن منیم قاباغیمدان آددارکن:

-من...من...من...

-[تلفن دالینداکی دانیشیر]

-آللاها چوخ شوکور کی همیشه من زنگ ووراندان سورا ایسترسن منه زنگ ووراسان!

2. الف) یالان دانیشمایاق کی ایندی ایستیردیم زنگ وورام!

     ب) زنگ وورماق ایسته‌دییمیزه سیاسی اولاراق اؤزوموزی توتمادان زنگ ووراق، چوخ ساده.

چتین بیر گون

1. ...

حادثه خانیم

1. قالسین هله...

تک صبیر

1.

- صبیر بوجور اولار ها!

-نجور؟

-ائله بوجور [اشاره ائلییر آز اؤنجه قاپاغین سینماغینا]، مثلا دییرسن کی گئدیم بیر یئره، صبیر گلر، گرک گئتمیه‌سن.

-ایندی بیر یول نظرده توتاسان کی فلان یئره گئتمییم، تک صبیر گلسه نجور اولار؟

-اوجور اولماز!

لوطف سنسن، قهر سنسن

1.

«یــار مرا غار مــرا عشق جگرخوار مرا

یار تویی غـــار تویی خواجه نگهدار مرا

...

قطـــره تویی بحــر تویی لطـف تــویی قهــر تویی

قنــد تـــویی زهـــر تــویی بیــــش میـــازار مرا»

مولانا

مهدی ایلن دونن

1. دونن مهدی گلمیشدی تبریزه. زنگ ووردی دئدی هارداسان. ائودئیدیم. دئدیم اولسون سن ایشلریوی گؤر من گلرم گؤروشروخ. گئتدیم ساعات 11:30 دا آبرساندا گؤروشدوخ. بو نئچه مدتده بدنسازی ایشلییپ بدنی تام بللی ائدیر. دولاندیقجا گؤردوم کی قیزلار و خانیملار مهدینین دقتین جلب ائدیردی :). منده اونون یانیندا اولاندا منه ده سرایت ائلییر! یولداشینان دولانماغین بیر آیری کئفی وار. او نئچه ساعاتدا دونیایا مهدی نین گؤزو ایله باخدیم.

2. گئتدیک بیر آبمیوه ایچدیک. طالیبی سویی ایدی. ایچیه ایچه لیوانین یاریسینا یئتیشنده شیرینلیغینا توجه ائله دیم. چوخ شیرین ایدی. یوزده یوز شکر قاتمیشدی. اوردان چیخدیق بیرآز دولاناندان سورا گئتدیک طوبی پارکیندا بیر گؤلگه لیقدا صندل تاپیپ اوتوردوق و همیشه‌کینه تای انواع و اقسام موضوعلارا گؤره تحلیلی دانیشماغا باشلادیق. بیر دندان پزشک قیز دوستی تاپیمیشدی آیلار قاباق. اوننان منه دانیشدی چوخلو. ذهنینده او قیزینان بیر جوره چلیشکیده‌دیر مهدی. بیر جوره مطمئن دگیل او قیزلا ایلگیلی سونراکی آددیمی نه اولمالیدیر. وارلیق باخیمیندان ایکی متضاد قطبین ان اوزاق اوجلاریندادیلار!*

3. اوول گؤروشندن سونرا پایان نامه‌سیندن دانیشدی. رشته‌میز بیر اولماماغینا رغمن بیر مسئله قاباغا گلمیشدی اونو منه دئدی بلکه بیر یاردیم ائده بیلم. دئدیم «بو مسئله نین بیر آیری جورو منیم ارشدیمده واریدی من آنتروپی ایله حل ائتدیم.» بیرآز بونا گؤره دانیشدیق، چالیشیردیم آنتروپی نی اونون مسئله‌سینه اویقون ائدیم ذهنیمده، هئی سوال سوروشوردوم بیله‌سیندن کی دئدی مسئله‌نی اؤتور بابا. سونرا باشلادیق یاشاماغا دایر دانیشماغا. قیز دوستوندان دانیشدیق. یاشاماغین چتینلیکلریندن. سانیرام مهدی ایله اولان زامان مسئله‌لری ان درین باخدیغیمیز زامانلاریمدان بیریدیر و سانیرام مسئله لری ان دوز تحلیل ائتدیگیمیز زامانلاردان بیریدیر. سانیرام هئچ گیزلی شئییمیز یوخ آرامیزدا. اولسا بیله بیر الین بارماقلاری ساییسیجا اولماز! اصلینده مسئله لری دوز تحلیل ائده بیلمک ندنینین بیری بو گیزلی بیر شئییمیز اولمادیغیندان دولایی دیر. گیزلی اولوب اولماماغین اهمیتی او زامان بللی اولور کی داها هئچ بیر ایسته‌ییپ ده دیله گتیره بیلمه‌دیگیمیز قونو اولمور. هر بیر شئی وار دونیا اوزره اونی سؤزه چکیریک! هئچ بیر شئی دن چکینمیریک! بیر آیری ندنی بو کی هره‌میز اؤز ساوادیمیز آچیسیندان مسئله یه باخیریق و بونون برآیندی منه چوخ ایلگینج اولور.

4. مهدی دن آیریلاندان سونرا داها اطرافیمدا اولان قیزلار ایلگیمی چکنمیردیلر!!!

----

* مهدی اؤز زمینه‌سینه اؤزل اولان risk assessment متخصصی دیر.

فیلسوف کیشی

1. بوگون خط واحدده، بیر قوجا کیشی مینمیشدی. دییردی: «آللاه بیر شئی یارادیپ کی نه ایسسیه دوامی وار نه سویوغا. نه غصیه و نه آغریا!». بولاری یانیندا اولان بیر آیری قوجا کیشیه دییردی. بو سونراکی قوجا کیشی خط واحده میننده ییخیلدی. من ایسته‌دیم الیندن توتام کمک ائلیم مندن قاباق بیر آیری نفر تئز ال آتدی یاردیم ائتدی بیر آیریسی تئز یئرین وئردی اونا. یازیق اندیشه‌لی و دوشکون نظره گلیردی یانی قیافه‌سی اوجوریدی.

2. او قوجا کیشی بیله‌سینه دییردی «اؤزوه بیر عصا آل، کمک اولسون». او دا فقط باشینان تایید ائدیردی. دینمیردی. دییردی «دا بیز قوجالمیشیق، جوان دگیلیک کی، هئچ غصه لنمه کی قوجالمیشام! ائله بوجور نوبتینن هاممی گلیر قوجالیر. هاممی اوشاق اولور، جوان اولور، پهلوان اولور، آخیرده ده گلیر قوجالیر. هئچ غصه‌ن اولماسین. آللاه بیر شئی یاردیپ کی نه ایسسیه دوامی وار نه سویوغا. نه غصیه نه ده آغریا!». او بیریسی ده دینمیردی فقط قولاق آسیردی.

3. دییردی «آدام آللاه دان هر شئی ایستیر! دییر گوناهلاریمی باغیشلا. منی پوللاندیر. منیم الیمدن توت. منه کمک ائله. منی ساغ-سلامت ائله و ... . آما اؤزو هئچ کیمی باغیشلامیر! اؤزو هئچ کیمین الیندن توتمور!». دییردی «آدام الدن توتان اولار، چؤرک کسن اولماز!» سوراکی قوجا کیشی ده دییردی «دا اولارین زامانی قوتولوپ!».

4. بو فیلسوف کیشینین سؤزلری منی چوخ دوشوندوردی اؤزللیکله سون جمله‌سی.

خاطیره‌ن خار اورگیمه...

1. «...

گئدیرم گؤزوم یاشلی

خاطیره‌ن خار اورگیمه

...»*

----

* بیر شاه اثر شبنم فراح دان.

** شبنم فراح - یاغمورلار

قافام بولوتلار ایچینده

1. یازماغا حالیم یوخ، اصلینده هئچ ایشه حالیم یوخ! دییرم ائله بوردا اوتوروم و بو آچدیغیم آهنگی دال با دال قولاق آسیم و مبهم بیر شئیلره فیکیرلشیم!

«نه یاپارسان اولمویور، اولمویور اسکیسی گیبی

گولدورمویور، آغلاتمییور کیمسه سنین گیبی»

بوگون دانلود ائله‌میشم. امره آیدین و مودئل اوخوموش.

2. هاوانین ایسسیلیغی آز اولسا دا، رطوبتی چوخدی. بیاخ اصلا داریخدیریردی. ایندی بیرآز یاخجیلاشیپ.

3. سانیرام بیر فیلیمه باخاسیم وار.