تقدیر

1. هردن باش وئرن اولایلارا دقت وئرنده بیر عجاییب و اینانیلماز سئیری گؤرورم. یانی اتفاقلار ترتیبی صورتده بیر زنجیر کیمی دال با دال دوشور و آخیرده بیر اولای باش وئریر، مثبت یا منفی! هردن بو اولایلار او قدر اینانیلماز شکیده بیربیرینین آردیندا اتفاق دوشورلر کی آدام فیکر ائلیر بیر برنامه اوزونن بو ایشلر اولور! بیر قاباخجادان تؤکولموش برنامه. بو اولایلار زنجیری تصادفی صورتده او قدر دقیق زمانبندی اولورلار کی اگر بو زنجیردن بیری دقیق و دوز زامانیندا اتفاق دوشمه‌سه، امکانسیزدیر کی زنجیرین سونو اتفاق دوشسون! بو زنجیری اولایلارا «تقدیر» آد وئرمیشم.

----

 1 و 2. ...

علی: کاظم آقا نین اوغلی حسین ده کربلایا گئتدی هااا.

کریم: پییی، اوغلان بو ایل هاممی کربلیا گئتدی هااا، بی بیز قالدیق تبریزده!

افشین: سن اونی نیه دییرسن! کوکه‌چی شاهبازین اوغلی بئهزاد دا گئتدی باااا.

کریم: گده بیر بیز قالدیق هاااا! اوغلان باغریم چاتدادی. گلین بیز ده برنامه تؤکاخ کربلیا گئدنمه‌دیخ هئچ اولماسا 28 صفری گئداخ مشهده. نجوردی؟

علی: دؤره جمع اولسا بتر یاپیشار هااا... دؤره جمع اولسا من وارام.

افشین: هن دؤره دوز اولسا من ده وارام. ماشین دا منن با، اؤزوزدن سورا بیر نفر ده تاپین، امین ده واردی، بئش نفری با هم گئداخ بیر زیارت ائلیاخ، خوش گئچر.

کریم: اولان ناصر اولماسا خوش گئچمز!

افشین: اوندا ماشینا یئرلشمه‌روخ!

علی: گلین ائله ناصیره ده دییاخ، مصطفی یا دا، گئداخ بیر کوپه‌نی دربست توتاخ قاطار نان گئداخ مشهده، بو لاپ بتر یاپیشار.

کریم: به به ...

3. قاطاردا:

-اولان دؤره‌میز نه جوردی، بوراجان کی بتر خوش گئچیپ فقط بیرآز هاوانین سویوقلوغی کیریخدیریپ، انشالله هاوا دا تئزلیغینان قیزیشار اوردا بیر ترپشه بیلروخ.

-هن، بتر خوش گئچیر، قوی بیر سئلفی سالاخ قویوم گروها آخشام اوستی اوبیری اوشاخلار دا بیزی گؤرسون . هاممی باخسین بورا .... شاک

4. هاوا سابقه‌سیز سویوق اولور. اولور 15 درجه صفردن آشاغی. تاریخده سمناندا بوجور بیر شئی اولمامیشدی! هاوا شخته‌سینه گؤره قاتارین ترمزلاری دونور. ایستگاها بئش کیلومئتر قالان خلوت بیر یئرده ساخلیرلار کی اونا باخسینلار و کنترل مرکزینه اطلاع وئریرلر شرایطی.

کنترل مرکزی او خطین وضعیتین قرمز ائلیر تا خطر قاباغا گلمه‌سین

5. سحر ساعات یئتدی اولور و کنترلچی نین شیفتی قوتاریر. شیف دگیشیلیر و اوبیری کنترلچی یئتدی ده گلیر ایش اوسته.

6. تازا گلن کنترلچی گؤرور قرمز خطر چراغی یانیر فیکر ائلیر بو سابقه‌سیز سویوقلارا گؤره اشکالی اولدوغونا گؤره یانیر. اولاری خاموشلور (اول اشتباه)

7. دالیدان گلن قاتار کنترل صفحه سینده چراغلارین یئشیل اولماسین گؤرور و کنترلچی نان بیر تماس تاپیر.

8. کنترلچی یئشیل اولماغی تایید ائدیر و دییر کی اشتباه امیش

9. دالیداکی قاتار نهایی تاییدی گرک گؤزلیه کی گؤزله‌میر و نهایی تایید اولمادان یولا دوشور (ایکینجی اشتباه).

و بیزیم اوشاقلارین سون یولجولوغی، اؤلوم قاتاریندا اولور.

----

* عکس و آدلار گرچکدیر آما متن داستاندیر.

* عکس گؤره توضیح: آخرین سلفی. #قطار_مرگ.!
علی وهابی، ناصر باغبان، کریم جنتی، افشین شکوری، امین شکوری، مصطفی علیزاده/روحلاری شاد!

یاواش یاواش سورکلی

1. انسانین صبری و دؤزومی ذاتا آزدیر. گؤردوگی هر بیر ایشده، دؤزومسوزلوکله ته‌له‌سیر تا سونوجون گؤرسون. سونوج و نتیجه‌نی ملموس گؤرمه‌ینده تئز مایوس اولور، ایشدن ال چکیر و باشقا بیر قولدا چالیشماغا گیریشیر. آما باشاری‌نین تک یولو بیر ایشی یاواش یاواش یورولمادان سورکلی (مداوم) گؤرمک‌دیر. امکانی وار نتیجه‌نی بو تئزلیگه گؤرمیک یا نتیجه‌نی گؤرک ده ایسته‌دیگیمیز دوزئده (سطح) اولمایا، بونا باخمایاراق ایشی سورکلی دوام ائده‌جه‌ییک و بیر گون، بیر لحظه‌ده، دوشوندوگوموزده بوگونکی دورومی زامانلار اؤنجه‌ ایله مقایسه ائدنده، آراداکی فرق بیزیم باشاریمیز دئمک‌دیر.

----

* صبر ایله حالوا پیشر ائی قورا سندن/بسله‌سن اطلس اولور توت یاپراغیندان (آذربایجان خالق ماهنیسی)

** رهرو آن نیست که گه تند و گهی خسته رود/رهرو آنست که آهسته و پیوسته رود (سعدی)

4 ریشتئر دپرم!

1. جالیبدی،ایکی اوچ گون قاباق آغیر بیر هفته سونوندا، بئکارلیغا چیخدیغیم گونلرین بیرینده ناهار چاغی ایسته‌دیم بیرآز یاتام. یاتاندا بیردن اؤلمک فیکری قافامدان گئچدی: «ایندی اؤلسم نولار؟!». بو آغیر گونلریمدن دولایی بیر جور استرسه قاپیلمیشام. نیگرانام. اونا گؤره استراحت ائلینده ده راحت اولمورام. اوستادیمیز دئمیشکن «سانکی تیکان اوستونده یاتمیشام»!

2. بوگون گئجه یوخوم توتموردی. گؤزومو آچدیم و هاوا قارانلیق اولماسیندان و او بیری طرفدن یوخودان دورماغیما گؤره بیر لحظه ساندیم سحر ساعات 6 دؤره بری اولمالیدیر. سونرا موبایلین ساعاتینا باخدیم گؤردوم کی ساعات هله 3 دور. یاریم ایستیکان سو ایچدیم و گیردیم کی یاتام آما دییه بیله‌رم ساعات 4جن یوخوم توتمادی. سورا هئچ بیلمه‌دیم هاواخت یوخوم توتدی. بو بیر ساعات یاتانماماق، سحر چاغی بیرآز یوخویا ساخلیاجاغیدی منی.

3. یوخودا یئریمین ایچینده ترپنماغا باشلادیم! یوخودان دیسکیندیم. اوولده ساندیم کی کنار خیاواندان یئکه ماشین گئچیر! آخی آغیر ماشین گئچنده ده ملایم ترپنمه احساس اولاردی. سورا ائله یوخولی-یوخولی گؤردوم کی بو ترپنماق فرقلیدیر! هم بونون شیدتی چوخدور همده زامانی چوخ چکدی! بیرآندا گؤردوم کی ائوده هاممی اویاندی دوردی اویان بویانا قاچماغا باشلادی. «زلزله‌دی، قاچین» دئدیم یئریمدن دورا دورا. هاممی باشلادی گیینماغا من آما باشلادیم کامپیوتئری و اینتئرنتی آچماغا! «نه ایش گؤوروسن به؟! گیین دا!» آنام دئدی. «دؤز گؤروم نئچه ریشتئردی» دئدیم. آخیرده ده سایت دوز ایشله‌مه‌دی و او قدر لنگیدیم کی ائودن ائشیگه چیخماق هاواسی باشیمدان چیخدی. هئچ بیریمیز ائشیگه چیخمادیق!

4. مرکز زلزله سایتینا بیردن چوخ آدام هجوم گتیرمیشدی، اونا گؤره 20 دقیقه چکدی تا اوول نتیجه‌نی گؤسترسین! اول سئری ده ده گتیرمیشدی سایتی آما اوندا هله بیزیمکی ثبت اولمامیشدی!

5. بو سئری یوخودا زلزله اولدوغونا گؤره، زلزله نی چوخ حیس ائتمه‌دیک و او همیشه‌کی قورخو یوخوموزدی.

----

سحر ساعات یئتدی نی بئش دقیقه گئچنده 4 ریشتئرلیق بیر زلزله اولدی، شانسدان زامانی آزیدی، هئچ ایکی ثانیه سورمه‌دی. ساغول تانریم.

یالانچی دوستلار

1. آدامین اطرافیندا بیر سیرا آیری آداملار اولور، آدام اولاری بیر دوست، یولداش کیمی تانییر. ایلیشکیلر چوخ نورمال اولور، هردن گؤروشورسونوز، ال وئریسینیز. دانیشیسینیز، بعضن بیرلیکته ناهار ییرسینیز. هر شئی نورمال نظره گلیر. آما اصلینده نورمال دگیل. بیر شئی نورمال دگیل. نورمال اولمایان بو کی سنین اونا اولان دوشونجه و احساسین اوندا سنه گؤره یوخدور. یوخدور و بعضن ده تام عکسینه دیر، او سنه بیر دوشمان کیمی باخیر! بؤیوک نکته بوردادیر کی او سنه دوشمان کیمی باخیر دا بللی ائتمیر!

2. دوران دؤنور دؤنور و ایش بیر یئره یئتیشر کی او اطرافینداکی دوست یا یولداش بیر حرکت ائتمک زوروندا قالیر. بیر ایش گؤرمه‌لی اولور سنین له ایلگیلی. یولداشلیغیوا گؤره بیر داورانیش اوموسان اوندان و او «دوست» تانیدیغین آدام اومدوغون داورانیشین تام عکسین گؤستریر!

3. بو آداملاری یاشامدان سیلیپ آتمالیسان، بیر قلمده. «اورکدن، صادیقجه منیمله دوست اولماسان، ظاهیری دوستلوغو دا من ایسته‌میرم».

4. ایشته گونده‌لیک سلام کئف احوال، گؤروشمه، دییپ گولمه یئترلی دگیلمیش. باشقا بیر شئی لازیمدیر... آدام آلدانمامالی...

----

* ایندی کی بو یازینی بیر سئری ده اوخودوم، اسکیدن اونوتدوغوم نئچه خاطیره داها یادیما دوشدی.

** حقیقی دوست ساییسی چوخ آزدیر، چووووووووخ...

دونالد ترامپ

1. ایللر بویو امریکانین سئچیمی منه بیر سوالیدی کی نجوردی بولارین سئچیمله‌ری. فقط بیلردیم فرقی وار باشقا اؤلکه‌لرله آما جزئیاتین بیلمزدیم. بو هفته بونی اؤرگشدیم. آمریکادا ایالت‌لر وار، هر ایالتین «ائلئکتئرال» آدیندا بیر مشخص تعداد اویی (oy) وار. و جریان بوجوردی کی هر ایالتده آخیرده بوتون ائلئکتئراللار بیر آدایا وئریله‌جک. اولماز کی مثلا بیر 20 ائلئکتئراللی ایالت، 15ین بیر آدایا و 5 ین بیر باشقا آدای وئرسین. اگر او 20 ائلئکتراللی ایالت ده، جمعیت 51% اوول آدایا اوی وئرسه، او ایالتین بوتون ائلئکتئراللاری اوول آدایا گئده‌جک و ایکینجی آدایین بیر پایی اولمایاجاق او ایالتدن. جالیبدی. گؤره‌سن نجور فیکیرله‌شیپلر و بونا یئتیشیپلر؟!

2. قالمیشام، 2 ایل بوتون نظرسنجی‌لرده بلا استثنا کلینتون قاباق اولا، آخیرده گله دونالد ترامپ چیخا! نجور اولار آخی؟! سانیرام بیر علتی قاییدیر ائلئکتئرال مفهومونا.

بیر گون3

1. خط واحیدده گلیردیم. بوگون ائشیکده اولان ایشلریم بیتمیشدی و قالان ایشلریم ائوده اولاجاغیدی. صندللر دولموشدی. بیر جوان اوغلان چلیک الینده میندی خطده و منیم قاباغیمدا اوتوران یئنی یئتمه اوغلان بونو گؤرونجه، دوروپ یئرین اونا وئرمک ایسته‌دی. او آما قبول ائتمه‌دی. اوولده تعارف نظره گلدی، یئنی یئتمه گینه اصرار ائلیینجه، جوان اوغلان اییلدی یاواشجا قولاغینا دئدی کی «بئلیم آغریر اوتورانمیرام، یاشا».

2. خط واحیدده گلیرم و اوتوردوغوم صندلین شوشه‌سیندن دیشاری باخیرام. آما هئچ بیر شئی قافامدا یوخ! بو دونیادا دگیلم سانکی. باشقا بیر یئرلردیم. بیردن بیره هپ فیکیرلشدیگیم او قونو گلدی ذهنیمه!* کی گینه بیردن بیره او همیشه‌کی تک صبیرلردن گلدی!**

3. کی نه تانریم؟!

----

* اوست-اوسته ملایم اولاراق منفی دوشونوردوم قونو ایچون

**قاباغیمدا منه طرف ترسه اوتوران یاشلی کیشی آسکیردی.

مین اوچ یوز دوقسان بئش

1. بو ایل مهر آییندان دیلیم اونیوئرسیته‌یه «زبان و ادبیات ترکی آذری» آدیلا یول تاپابیلدی. 29 اؤیرنجی تبریز اونیوئرسیته‌سینده تورکجه اوخوماقدادیر، عئشقنن.

2. گئچن هفته مجلیسده «فراکسون مناطق ترک نشین» یوز عضونن اولوشدی.

3. اوچونجوسی نه اولابیلر ائ آللاهیم؟!

----

* 1395 شمسی ایل تاریخده قالارقی اولاجاق.

** بو میللت هاریکا...

*** تشکورلر تانریم.

باخیش آچیسی

1.

-رحیم ایندی اوردا اولار با. هاوا سویوقدی، بو سویوقدا هارا گئده‌جاق کی؟!

-رحیم ایسسی گون اوردا اولمور، سویوخ گونده هئچ اولماز!

2.

-«بو جمله‌نی نیه یازیپلار بورا؟! بو بیر خاص جمله دگیل کی! بونی هاممی بیلیر دا. »

-«بوجور ایستیرلر سویون اهمییتینه اشاره ائلییه‌لر.»

-«هن، منیم یاخیش آچیمدان بوجور جمله اوردا بوردا یازاندا، یانی ایستیرلر او جمله صاحبی‌نین بؤیوکلوغون گؤسترسینلر. آما، سنین باخیش آچین او طرفدن دیر. بوجور دانیشاندا یاخجی اولور ها، آدام باخیش‌لارلا تانیش اولور». بیر آز سورا ادامه وئریر «آهان، بو جمله‌دن منظور بو کی یانی بو فردین بؤیوکلوغون دئفالت قبوللوغوموز وار، پس جمله‌نین ایچینده کی مفهوم دا اؤنملی اولمالیدیر. من اوولده بو جمله‌نی بونا اوخشاتدیم کی بیر نفر گله دییه آغاج یاخجیدیر. بونو هاممی بیلیر کی آغاج یاخجیدیر. بونو دئماخ لازیم دگیل کی.... آما ماجرا اوبیری طرفدنیمیش»

----

*ایکی دانا دیالوگ فرقلی مخاطبلرله، بیر هفته‌ده.

** باخیشلار انسانلار آراسیندا چوخ فرقلی اولابیلر. و بو باخیشلارلا تانیش اولمانین تک یولی دانیشماق دیر.

یوخ اولماق زامانیدیر ایندی ...

1. «...

وازگئچدیم گؤزلریندن

وازگئچدیم سؤزلریندن

بیر آه دئ یئتر

سسسیسزجه کیمسه‌سیزجه

...»*

2. من ده وازگئچدیم. اؤزوده دلیجه‌سینه ایسترکن بیر شئیی وازگئچدیم. بیر آه لا دگیل، مین بیر آه‌ه‌ه‌ه لا وازگئچدیم. و بوراخیپ گئتدیم، بیر غریب مسافر کیمی. .وازگئچیپ گئتدیم...

3. ... و یوخ اولدوم.

----

*بیر شاه اثر سئزن آکسودان.

** سئزن آکسو - وازگئچدیم

من اولسایدیم...

1. بو جریاندان سونرا فیکیرلشدیم کی من اولسایدیم بیر قوی مادربرد آلاردیم مثلا ایسوس ماکسیموس و بیر قوی سی پی یو مثلا core i7 6700k. سونرا بو سی پی یو یا بیر قوی سو سویوتما سیستمی ده آلاردیم و سورا او سی پی یو نی آوئر ائله‌ماغینان سرعتین 6500-7000 GHzه یئتیرردیم. سونرا قویاردیم اؤیرنجی‌لرین الینین آلتیندا او 40 ساعات سوره‌جک رانلاری 2 ساعاتدا بیتیرردیلر.

2. هر ایل ایکی دانا بوجور سیستم آلماغینان هیچ کیمه هئشزات اولماز، هره‌سی باخسین 3-4 میلیونا!