پرگار

1. «در دایره قسمت ما نقطه تسلیمیم

لطف آنچه تو اندیشی، حکم آنچه تو فرمایی»

حافظ

2. ای تانریم یاشاماقدان پاییمیز نمنه اولسا اونا تسلیمیک. نمنه بیزیم اوچون دوشونسن تام لوطف‌دور و حکم سنین حکموندور.

تام حئیران

1. دایی اوغلوم یولداشلاری جمع‌نن گؤروشور تا اولاردان آیریلسین. "ائوه گئدیسن؟" سوروشورام. "یوخ، گئدیم بیر عمه گیله خداحافظ له‌شیم، سورا". "دور منده گلیم" دئدیم. جمع‌له بیر اوزدن گئچمه خداحافظ له‌شیرم, آما امیدله اؤزل گؤروشورم و "گذشت ائلیین من ائله ایندی ماجرانی بیلدیم، گلنمه‌دیم." دییرم. "وار اولاسان، ائله گلمیش قدر وارسان". چرخی الیمده گؤتورورم و دایی اوغلومون دالیسیجا منده یولا دوشورم. یولدا فیکیرله‌شیرم و امیدین ماشین‌نان تک نفری یئنه‌بیلمه‌دیگی گلیر گؤزومون قاباغینا - ایکی نفر قولتوقلاری آلتدان توتموشدی زور ایله یئریییردی - و "اینسان مینلر ایلدیر دونیا اوزونده یاشییر، هله بیلمییپ وارلیق یانی نمنه؟ نییه یاشییر؟" دییرم دایی اوغلوما و ادامه‎ده اؤز ذهنیمده "هله بیلمییپ کی وارلیق ندیر، وارلیق‌دان آماج ندیر؟ بیر مدت وارسان و بیر آن فاتحه خداحافظ". اومیدین باج اوغلوسی‌نین بیردن بیره اؤلمه‌سی گلیر گؤزومون قاباغینا. حئوان او قدر آغلامیشدی کی، لمس اولموشدی. وارلیغا بیرآز فیکیرلشنده اولورسان تام حئیران! بو ماجرا یاخجی دوستلار فیلمینه باخماسیندان بیر نئچه گون سورا ایدی.

2. اوزانمیشام فیلمه باخیرام. یاخجی دوستلار*. فیلیم اوزون فیلیمدیر. ایکی ساعات‌دان چوخ. بیلیرم بیر سئریده بو فیلمی بیتیرنمیه‌جگم. بو فیلیمده بیر اوغلان اوشاقینین نجور گانگستر اولماغین گؤرسدیر. فیلمی باشلامامیشدان قاباق بیر بسته چیپس و بیر بسته پوفک آلدیم، اوزون زامان دان سونرا. بیرآزین وئردیم آنام گیله و بیرآزی دا قالدی منه.  آبام پوفک و چیپسی ائله سئور کیییی حددی یوخ! اؤز پاییمی تؤکموشم مژمئیینه و فیلمه باخیرام. فیلمی اوزون زامان "وارلیق ندیر؟" دییه سوروسونا گؤره بیر سیرا آغیر مصاحبه‌یه قولاق آساندان و بیر نئچه پاراگراف اوخودوقدان سونرا ذهنیمه استراحت اولسون دییه باشلامیشام. فیلمین آلت‌یازیلارین اوخویوم دییه استوپ ائلیرم، یازینی اوخویوپ آنلیاندان سونرا هردن مژمئییده‌کی چیپس‌دن و هردن ده او رنگسیز پوفک‌لردن ییرم. فیلمده اوغلان اوشاغی یاشاییشدا گانگستر اولماغا گؤره نه‌لر ائتمه‌سین تعریفلینده، "وارلیق ندیر؟"، "یاشاماق ندیر؟"، "نئجه یاشامالییق؟" سورولارینین قارماقاریشیق و بولانیق بیر ملغمه‎سی ذهنیمده دولانیر. ایرما فیرتیناسی‌نین بورولقانی دولانیر یا، تام اوجور...

3. آما بو آرادا پوفک‌لری چیپس‌دن چوخ بگندیم.

----

* goodfellas

عفو ائت بو گئجه اؤلمک ایسته‌دیم...

1. گئچن هفته تصادفی بیر تلگرام کانالیندا مودئل گروهونون بیر اوخوماغینا راست گلدیم. اوخوماغین آدی پمبه مزالیق دیر. اؤز دیلیمیز: صورتی قبرستان! نئچه گوندور سالمیشام لوپا* و دال با دال قولاق آسیرام. اوخوماغین ایچینده اؤلوم، قبر، آسماق، و.س. کیمی کلمه‌لرین ایشلنمه‌سینه باخمایاراق گینه قولاق آسماق ایستیریم، اؤزوده کئیفینن! بونون علتی اوخوماغین آهنگی، سؤزلرین ریتمی، و ووکالین سسی‌دیر. ووکالین او سس تونونون یئنیپ قالخماسی.

2. فاطمه تورگوتون، "پمبه" کلمه‌سینین تلفظی دا ایلگینجدیر.

3. آاااه، یادیمنان چیخمیشدی، نئچه ایل قاباغیدی گؤره‎سن؟ مودئل گروهونون بیر آهنگی تازا چیخمیشدی «دگمه‌سین اللریمیز» آدیندا، او گونلرده بو آهنگه وورولموشدوم، او قدر کی آهنگین ناکاراتلارین اؤز سسیمنن اوخویوپ و ضبظ ائتمیشدیم!: دگمه‌سین اللریمیز، بولوشماسین او گؤزلر ...

4. «بیتتی می حیکایه‌میز؟ بو نه بیچیم سون بؤیله؟ ...»

----

* loop

هاردان گلمیشدی؟

1. سحر ساعاتی قورموشدوم تئز دورام بیر ایشیم واریدی دونن گئجه‌دن، اونی بیتیرم. ساعات چالدی. قطع ائله‌دیم و بیر ده گؤزومی آچاندا گؤردوم بیر ساعات یاریم قوردوغوم ساعاتدان گئچیپ! ندنسه ایکی اوچ گوندی یوخوم چوخالیپ.

2. یوخودان دوردوم و پنجره‌دن خیاوانا باخاندا بیر آن پیاده رو دا بیر پیشیک‌دن کیچیک حئیوان گؤردوم. اوولده اخچه سیچانیدیر ساندیم. بیر آز دقت ائدن‌دن سونرا گؤردوم سنجابدیر. نارنجی رنگده بیر یئکه سنجابیدی. یاریسی بدنی‌ایدی یاریسی دا قویروغی. بیر گئدیپ بیر دوروردی، سانکی احتیاط ائدیر یا فیکیرله‌شیر. "مامان گل باخ سنجاب، سنجابدی"دییه سسلندیم. آنام دا او همیشه‌کی شوقونان او الدن اؤزون یئتیرماغا چالیشیرکن "حیطده دی؟" دئدی. آنامین اؤزون پنجره‌یه  یئتیرماغا گؤره شوقون یئره دگن آیاقلارینین سسیندن دویدوم. سون آن گؤزدن ایتمک ایسترکن آنام اؤزون یئتیردی و گؤردی. "گؤردون؟" دییه سوروشدوم. "هن، ائله گؤردوم کی بیر شئی قاشدی". بیلیردیم گؤروپ آما ایسته‌دیم اؤز دیلیندن بیر شئی ائشیدم. آنامین دانیشماغین ائیشمه‌گی سئورم. 

3. دوشونوردوم کی بو سنجاب هاردان گلیپ. طبیعتدن، اوردان بوردان گلیپ؟ یا بیرینین ائویندن قاچیپ؟ ایکینجینین احتمالین داها چوخ گؤروردوم.

4. صبحانه ییرکن "سحر چؤرکدن گلنده یولدا بیر یئکه تاری دوه‌سی گؤردوم، ایستیردیم توتام گتیرم ائوه سورا دا توتمادیم" آنام دئدی. "سن اوشاق اولارکن تاری دوه‌سی زات توتاردین آخی، چؤپونن سیگار چکدیرردین" آرتیردی. "من چوخ چکیرتگه توتاردیم" دئدیم. تاری دوه‌سین ائشیدن‌دن سونرا گینه فیکیرلشدیم کی گؤره‌سن او سنجاب هاردان گلمیشدی؟ اؤزی بیر یئردن چیخیپ گلمیشدی یوخسا بیرینین ائویندن قاچمیشدی و بو دفعه اوولمینجی‌نین احتمالین داها چوخ گؤردوم!

نه‌لر اولور؟؟؟

اوزون زامان بوش قالماسین دیه...

1. ذهنیمده بیر تاخیم سورو وار. سانیرام هله‌لیک بو سورولارا جوابیم یوخ. بلکه سونرالار تاپدیم، بیلمیرم. آما چتین سورولاردیلار...

-نیه یاشییریق؟

-یاشامیندا باشاریلی اولان آداملار اؤز یاشاملاریندان راضی‌دیرلار؟

-حیاتدا گئتدیگیمیز یولدا بونجا چتینلیگی ندن چکیریک؟

-من یاشامیمدا بوندان بو یانا بوندان قاباقکینا تای ادامه وئرمه‌لییم؟ یوخسا بیر انقلابی تصمیم توتمالیام؟ بو گئدیشی دگیشمه‌لییم؟ من عؤمرومی بوجور بیتیرمه‌لییم؟

-انقلابی تصمیم منیم اوچون نه اولابیلر؟

-من یاشامیمدا باشاریلیام؟

-باشاری منیم اوچون نه اولابیلر؟ جامعه‌ده بیریسینه مثلا دکتر دئسه‌لر بو آدام اوچون باشاریمی؟

2. اما شوخلوقسوز، "یاشاماق" نه دئمک؟ بو دونیادا 80 ایل عؤمور سورمک "یاشادیم" دئمگه یئترلیمی؟ یوخسا باشقا مختصاتی وار یاشاماغین؟

هفته آهنگی: برایان آدامز - جنت

1. بو هفته‌نین آهنگین برایان آدامزین جنت آدلی اثری سئچمیشم. برایان آدامزین قشنگ آهنگلری وار و اونلار ایچینده جنت شاه اثر سایلابیلر منجه. بو آهنگ 1984 ده اوخونموش، دئمک ایللر اؤنجه. تقریبا 34 ایل قاباخ! قدیمی اولماسینا باخمایاراق تایسیز آهنگلردندیر منجه. سؤزلرین اینگیلیزجه اولاراق آشاغیدا گتیریرم*. سسینده بیر خاص خیشیلتی وار،  بو حالتین سئوریم.

2. برایان آدامز تانیماغیم قاییدیر حدودا 10 ایل قاباغا. بلکه سورا نجورلوغون یازدیم بورا. هله‌لیک یازمیرام.

Oh thinkin' about all our younger years
There was only you and me
We were young and wild and free

Now nothin' can take you away from me
We've been down that road before
But that's over now
You keep me comin' back for more

Baby, you're all that I want
When you're lyin' here in my arms
I'm findin' it hard to believe
We're in heaven

And love is all that I need
And I found it there in your heart
It isn't too hard to see
We're in heaven

Oh once in your life you find someone
Who will turn your world around
Bring you up when you're feelin' down

Yeah nothin' could change what you mean to me
Oh there's lots that I could say
But just hold me now
'Cause our love will light the way

I've been waitin' for so long
For somethin' to arrive
For love to come along

Now our dreams are comin' true
Through the good times and the bad
Yeah I'll be standin' there by you

You're all that I want
You're all that I need

----

* دانلود Bryan Adams - Heaven

* بو هفته‌دن یازیلاری آچیق قالیبدن چیخارداجاغام و چالیشاجاغام قالیب اوسته اولسون گلن یازیلار. 4-5 دانا باشلیق کی یازیلاری او باشلیقلارا سیغدیراجاغام. قالیب باشلیقلارین هله دوشونمه‌میشم و راست گلدیکجه فیکیرلشه‌جم، آما هله‌لیک بیری «هفته آهنگی»دیر.

خسته‌لیک

1. یولداشلارین بیری عمل اولموشدی، عیادتینه گئتدیم. عملدن تازا چیخمیشدی و چوخ آغیر بیر وضعیت‌ده ایدی. آغرینی تحمل ائتسین دییه مورفین وورموشدولار بیله سینه. آییلمیشدی آما دانیشا بیلمیردی، سو ایچمگی باشیلا دییردی. بیریسی گرک بیله‌سیندن سوروشایدی کی سو ایچیرسن؟ او دا باشیلا بی قولای، چووخ بی قولای دییه‌یدی هن. اوتاغیندا باشقا خسته‌لرده واریدی. اونلارین دا سورونلاری باشقا بیر شئی ایدی. آما اوست اوسته اولارین دا دوروملاری آغیریدی. بیریسی کی یاتمیشدی و اؤزوندن خبری یوخ ایدی! آنورمال نفس آلیردی و ملاقاتا گلنلرین  های سسی ایله او شلوغ اوتاقدا بئله آنورمال نفس آلماغینین سسی بللی ایدی. کؤینگی‌نین دوگمه لری کامیل آچیقیدی و بوتون قارنی و سینه‌لرینین نفس آلماق ندنی ایله شیشیپ یاتماسی گؤرونوردی. بیر آیریسینین بوغازینا لوله زات باغلامیشدیلار و اونون دا دورومی آغیریدی. آییق ایدی آما دانیشا بیلمیردی.  کولر آچیق اولماغا باخمایاراق، ملاقاتا گلنلر باعث اولموشدولار اوتاغین هاواسی قیزیشسین و هم قیزیشما و هم هاوا آزلیغی سورونو یارانمیشدی بیله‌سینه (البته ملاقاتچیلارین چوخی اونون آداملاری ایدی) و ایکی نفر بیله‌سین یئلپیک‌له یئللیردیلر کی بیری اوغلی ایدی دییه‌سن. بو آرادا معده‌سی یا گؤبک اطرافیندا بیر یئری ده آغریماغا باشلامیشدی و هاراسی‌دی دییه دیینمیردی. اوغلونا بنزتدیگیم یئلله‌مگی کسمیشدی و سوروشوردی کی هاران آغریر اما اوندا دیل یوخ ایدی جواب وئرمگه. سورا باشلامیشدی الین معده‌سی، گؤبک دؤره‌سینه وورماقلا سوروشوردی کی "بورادی" و او دا باشیلا علامت وئریردی.

2. الله بوتون لاعلاج خسته‌لیکلرین درمانین تئز، چوخ تئز، بشریته یئتیرسین. الله بوتون خسته‌لره عاجل شفا عنایت ائتسین. آمین.

گئچن هفته

1. آخشامدی. اوتورموشام. رادیونی آچمیشام آهنگ کانالینا قولاق آسیرام. بوراجان اوچ-دؤرت دانا ابراهیمین آهنگلریندن چالیپ کی باشقالاری اوخویوپ. او قدر گؤزل کی اونون آهنگلری، آدام قدرین بیلمیردی. یئنیدن کشف ائتمیشم من ابراهیمی. الله بیله‌سینه ساغلیق عطا ائله‌سین گینه بیزه اوخوسون.
2. گئچن هفته‌ده بؤیوک و فرقلی اولایلار اولدی. بیرینجی آتئنا قیزیمیز. انسان بونجا داش اورک اولانماز. آتئنانین قاتیلی یوزه یوز انسان دگیلمیش. انسانلیقدان سادجه بیر ظاهیری وار. بیر مریض موجود. آما بیر قونو دا وار. اگر مریض صفتین او قاتیله قوللانساق، بو قتلین بؤیوک قیسمی اونون بوینوندان دوشور. اونون بوینوندان دوشور ده جامعه نین بوینونا دوشور! نیه کی جامعه اونون مریضلیغین تئزلیکله تاپیب و درمان ائلهمه ییپ. بیلمیرم نه دییم. کیچیک آلتی-یئدی یاشیندا اوشاغی او نیت‌له دوشونمک هانکی سالیم انسانین ذهنینه خطور ائلر؟! یا گرک مریض اولاسان یا دا کی انسان اولمایاسان...
3. ایکینجی اولای اؤلن ریاضیات دانشمندی مریم میرزاخانی. چوخ زامانسیز اؤلوم اولدی بونونکی. قیرخ یاشینا یئتیشمه‌میش بونجا ایش گؤرن انسان بوندان بو اله نه ایشلر گؤره بیلردی، بیر دوشون! الله ایکیسینه ده رحمت ائله سین.
4. ایکی گوندی قوللاریمین دریسی سویولور. آراز قیراغینا گئدنده یاریم قول گیمیشدیم قوللاریمی گون یاندیرمیشدی.

سفرنامه کیمین مثلا

1. بیر آغیر ترافیکلی گون یولا دوشمکدن سونرا، آخشام گون باتان چاغی یئتیشدیک بورایا (یوخاری عکس). ناهار چاغی هاوا چوخ ایسسی ایدی، ایسسی و تر آدامی اذیت ائلیردی. ایسسی یورموشدی بیله‌می. آما آخشام هاوا فوق العاده‎ایدی. سرین و مطبوع هاوا. داها گونون ناهار اوستونده‌کی شیدتلی حرارتیندن اثر یوخ و آدامی نشاط‌لاندیران ملایم و سرین بیر یئل اسیردی. منظره ده وصف اولونماز! گون باتاندا رنگلرین ترکیبی چوخ گؤزل و سحر ائدیجی اولور. فیلیم‌لر کیمی. بویولندیم گرچکدن.

2.  بو آرادا گون باتارکن گئجه اوردا قالماغا چادیری قورماق ایسته‌دیک. یئل گئتدیکجه بترلشیردی و چادیردا قالانمیاجاغیق دیه نگران اولموشدوق. بو اوزدن چادیری دالدا بیر یئرده قورماق ایسته‌دیک. قوراندان سونرا عمیم بیلدیگی بیر بیلمیرم دوعا یا آیه‌نی اوخودی و پوفله‌دی تا یئل آراملاسین دیه!

3. چادیرلاری قوردوق و گیردیک ایچینه، آنام گیل باشلادیلار شاما بیر شئی حاضیرله‌مگه و من همیشکی کیمی موبایل رادیوسی ایله موج‌لاری آختاردیم. یئدی سکیز دانا کانال توتوردی، یاریسی آذربایجان جومهوریتی و یاریسی تورکیه، ایراندان بیر کانال اثری یوخدی! نم نیه منیم موبایلیم هاممیدان یاخجی توتوردی اولاری! عموغلوم لا بیلیکده بیرآز قولاق آسدیق، هره‌میز هئدفونون بیر قولاغین تاخمیشدیق.

4. شامی بیز یونگول یوغورت چؤرک یئدیک، چوخدا یاپیشدی. عمیم گیل آما بیر شئی پیشیردی و پیشیرماغا گؤره بیرآز یوباندیلار بیزه نسبت. بیز شامی قوتاراندان سونرا بیر بشقاب دا بیزه وئردیلر. اوندان دا یئدیم.
----

یازیدان سونرا:

* عکس اؤزمدن

* گئجه 12 اولمامیش یاواش یاواش یئل یاتدی!، هئچ انتظاریم یوخ ایدی!!!

سنت استپانوس کیلیسه‌سی

1. عکس: اؤزومدن. سنت استپانوس کیلیسه‌سنین اطرافیندان بیر منظره