1. یازماغا حالیم یوخ، اصلینده هئچ ایشه حالیم یوخ! دییرم ائله بوردا اوتوروم و بو آچدیغیم آهنگی دال با دال قولاق آسیم و مبهم بیر شئیلره فیکیرلشیم!
«نه یاپارسان اولمویور، اولمویور اسکیسی گیبی
گولدورمویور، آغلاتمییور کیمسه سنین گیبی»
بوگون دانلود ائله‌میشم. امره آیدین و مودئل اوخوموش.
2. هاوانین ایسسیلیغی آز اولسا دا، رطوبتی چوخدی. بیاخ اصلا داریخدیریردی. ایندی بیرآز یاخجیلاشیپ.
3. سانیرام بیر فیلیمه باخاسیم وار.
1. ایکی گون ایدی اینترنتیم قوتارمیشدی، چالیشیردیم اینترنته ربطی اولمایان فعالیتلر ائلییم، تلویزیونا باخدیم، رادیو قولاق آسدیم، کامپیوترده لازیم اولمایان فایلاری سیلدیم، فیلمه باخدیم هم سریال و هم سینمایی و نهایت دونن ومپایرین ایکینجی سئزونون باشلادیم.
2. اینترنت اولمادیغیندان موبایل هاوا دورومی سون گونجلنمه تاریخی 3-4 گون قاباغیدی و هاوا دوروموندان دقیق بیلگیم یوخ ایدی. دونن یولداشلارین بیری مندن بیر فایل ایسته دی مجبور اولدوم آخشام ساعات 7-8 ده اینترنت آلام. اینترنتی آلدیم و هاوا دورومون گونجلتدیم: هاوا سیجاقلیغی 41 درجه!!!
3. دونن سحر چاغی هاوانین قیزیشماسین گؤروردوم و چون دقیق بیلگیم یوخ ایدی حدس وورودوم کی 38 زاد اولمالیدیر. دوز ناهار چاغی چیخدیم ائشیگه و دوز ساعات 2:30جان، ایکی ساعات گونون آلتیندا دولاندیم!!! بو پیش فرض ایله کی هاوا 38 دیر.
4. آما بونونلا بئله ائشیکده‌یکن هاوا ایسسیلیغین اوقدر ده احساس ائلمه‌مه‌دیم. آما آخشام هاوانی بیلندن سونرا گؤروردوم کی ائوده پنجره لردن ایسسی یئل گلیر، تندیر کیمی. بو او آنلاما دگیل کی اوندان قاباق ایسسی یئل اسمیردی! اسیردی، آما فرقینده دگیلدیم...
5. انسان، عرمرونده ائله چتین شرایطدن خبری اولمادان گئچیپ کی اکثرا خاریجی ناظر طرفیندن اینانیلماز و بیر مؤعجیزه حئساب اولا بیلر. کی شاید شرایطین چتینلیگیندن خبری اولسایدی، هئچ عؤمورنده او ایشی گؤره بیلمزدی.
1. «
زیتون گؤزلوم سانا مئیلیم ندندیر؟
بو سئومه‌نین قباحتی کیمده‌دیر؟
...
زیتون گؤزلوم اؤزلم اکدیم یوللارا!
راست گلیرسن حالیمی سور اونلارا!زیتون گؤزلوم اوزاقلاردا ایشین نه؟
شارکیلاری دوشوروروم پئشینه!
»----
1. چرخ ایله یولا دوشدوم، گئتدیم گئتدیم یئتیشدیم چهارراه‌لارین بیرینه. چراغ قیرمیزی ایدی صبر ائله دیم سبز اولا. ائله او زامان منیم روبرو طرفیمده استاد ب.نی گؤردوم. پیاده ایدی. او دا اوردا او آرام و صبرلی رفتاریلا چراغین سبز اولماسین گؤزلوردی. مئهربانلیق و خوش اخلاقلیق قیافه‌سیندن یاغیر. چوخ دا آرام آرام حرکت ائلیر. البته قوجا دا دییل، قیرخ-نئچه یاشیندا جوان بیریدیر. الینده نایلوندا سوت و آیری وسایل واریدی. چراغ سبز اولدو آددادی و منده اونون مخالف جهتینده چرخ ایله گئتدیم. منی گؤرومه‌دی. سانیرام گؤرسه بیله تانیمازدی. من او طرفه یئتیشندن سونرا ساخلادیم و دؤندوم باخام گؤرم هارا گئدیر. تازاشدان آددادی چهارراهین اوبیری طرفینه و او الده پیاده گئتماغا باشلادی. گؤزدن ایتندن سورا منده یولا دوشدوم گئتدیم.
2. نه گؤزلدی انسان تانیدیقلارینا و سئودیکلرینه بیردن-بیره یولدا راست گله.
1. یولداشلاردان بیری تلگرام گروهلاریندا یوللویوپ کی
"هردن اؤزونله خلوت ائله،
یاز، قارالا، دوشون،
گله‌جگیوی یارات بئینینده،
یاشام اؤیکونو یاز"
(ترجمه‌سی)
بورانین ایلک آچیلما هدفی بو سؤزلردن چوخ دا اوزاق دییل‌دی، آدیندان دا بللیدیر: "چای ساعاتی". چایی دملیپ خلوتده چای ایچه ایچه دوشونمک.
2. اصلینده بو "چای ساعاتی"نین کؤکو، ایکینجی اونیوئرسیته ایللرینه قاییدیر. تئهراندا اوخویان زامان، یورد* و اونیوئرسیته آراسیندا فاصله چوخ ایدی** و من معمولا ناهاری ییندن سونرا، ایکی دؤره بری سئرویس ایله یوردا قاییداردیم. او ساعاتلاردا اوتاغیمیزدا کیمسه اولمازدی معمولا. چایدانی آتاردیم اوسته و 15-20 دقیقه ایچینده بیر چای دملردیم و سورا یالنیزجا او خلوتده، او آرامش ده، چایی ایچردیم. چوخ گؤزل حیس ایدی. تئهراندا عاییله‌دن اوزاق اولماق و غریبلیک حیسسی، بیرآز دا دویقوسال روحیه‌م اولدوغوندان دولایی؛ ناهارچاغی چای ساعاتلارین بوجور گؤرونجه، بیر یوز برگ دفتر گؤتوردوم و چای ایچینجه هر گون بیرآز اوردا او گونون اولوپ-بیتنلری و یا دوشونجه‌لرین یازاردیم. دفترین آدین "یوخو کیمی" قویموشدوم. چوخ چکمه‌دی ایلک دفتر بیتدی و ایکینجی دفتری باشلادیم. آدین دا قویدوم "یوخو کیمی 2". ایندی هئچ بیلمیرم هاردادیلار! نه ایسه ...
3. بو منیم بلاگ آچماق ماجرام همان "یوخو کیمی" و "یوخو کیمی 2" جریانینین آردیدیر. آما بو سئری آدی "چای ساعاتی" اولموش. آما آرادا بیر فرق وار. "یوخو کیمی"نین تکجه اوخویانی من اؤزوم اولاجاغیدیم اونا گؤره اوردا اؤزومو سانسور ائتمزدیم. آما بوردا مندن سونرا آیری مخاطبلریم ده اولدوغونا گؤره هر قونودا یازمیرام. بعضی یازدیقلاریمی ایسه پایلاشمیرام ائله اوردا اوجور قالیر!
4. بوگونکی پست چکدی تام "یوخو کیمی"نی یازان ساعاتلارا :)
----
* خوابگاه
** اصلینده چوخ چوخ چوخ ایدی!
1. سس فوق العاده دی. دیلین بیلمیردیم نمنه‌دی. سانیردیم روسجادیر (هئچ روسجایا دا بنزتمیردیم!). چوخ قولاق آساندان سونرا آختاردیم هم سؤزلرین تاپدیم و هم ده بیلدیم کی ایتالیانجادیر. شعرین تاپاندان سورا، شعرینه وورولدوم. هم چوخ ساده و هم چوخ آنلاملی، سئودالی ...
2. “Il dolce suono
Mi colpi di sua voce!..ah, quella voce…
M”e qui nel cor discesa
Ester! lo ti son reso
Ester! ah Ester mia!
Si, ti son reso!
Fuggito io son da” tuoi nemici…
Nemici…”
3. “The sweet sound
Of his voice I hear!
That voice
So deeply embedded in my heart!…
Ester! I’m yours again;
Ester! Ah! My Ester!
Yes, I’m yours again!
I’ve escaped from your enemies…”
4. "اونون سس‌ینین شیرین
رنگین ائشیدیرم!
او سس
چوخ درینجه گؤنلومه گؤمولموشدور!...
ائستئر! من گینه سنینم؛
ائستئر! آه! منیم ائستئریم!
هن، من گینه سنینم!
من سنین دوشمانلاریندان قاچمیشام...
دوشمانلاریندان ..."
ترجمه:«من»
----
* اینترنتده آختاردیم یازمیشدی ائستئر قیز آدیدیر. آما بوردا ائستئری his خطاب ائلییپ، دئمک بورادا ائستئر اوغلاندی و اوخویان قیزین سؤزلرین اوخویور.
1. تانیشلارین بیرینین بورنی بیر دوستلوق (!) شوخلوقلاشماسیندا سینمیشدی، بورون عملینه گئتمیشدی. گئتدیک اونون عیادتینه. حئیوان چوخ آغری چکیردی. آغری ندیر؟! زجر چکیردی!!! بیرآز اوتوردوق آخشام اولدی و جمعیمیز جمع اولدی. هر قونودان دئسن سؤز آچیلدی و من ده بیر قونونی بیله قاچیرمادیم! هاممیسیندا نظر وئردیم :).
2. تبریزین مئتروسوندان سؤز آچیلدی. بیری دئدی «منجه تبریزین مئتروسی تام یئرسیز بیر ایشدی، بوردا بیلمیرم مئترو، فرودگاه، هر نمنه وورولسا هئچه گئتمک‌دیر؛ چونکی بورا بیر بن بست یئردیر*». بیر آیریسی دئدی «مته قره‌ملیکدن چیخیپ ائشیگه، یانی قازماق ایشی قوتاریپ». من سوروشدوم «بیر خط دی؟». دئدیلر «ائله‌بیل ایکی خط دی». بیر آیریسی دئدی «لاله ده قازاندا بیر سو چیخمیشدی، سویو ییغیشتیرماق اولموردی!». اونون آتاسی دئدی «تبریزین آلتی دریادی، بابا**»
3. «سؤز سؤز آچار، سؤز گؤز آچار» سید حیدر بیات
----
ی.س:
* او لحظه علی رزاقی‌نین بو مقاله‌سی گلدی گؤزوم قاباغینا، ایسته‌دیم بیر مطرح ائلیم آما بیر شئی دئمه‌دیم!
** ایندی کی بونی یازیرام بیر زامانلار 7-8 یاشیندا اولان عمی اوغلوما اؤرگتدیغیم «تبریز دومان آلتیندا» بئتلری یادیما دوشدی! بو بئتلری «ایستانبول سولار آلتیندا» اوخوماغیندان بیر تقلید اولاراق دوزلتمیشدیم. یادیما دوشن شئی «تبریز سولار آلتیندا»یدی اصلینده، ایکیسیندن بیر قاریشیم.
*** متن: عیادت، حاشیه: هر شئی
1. دونن گئجه تیلویزیوندا بیر فیلمه راست گلدیم، چیزگی فیلم* اولماسیندان دولایی دئدیم کی حتمن بونا آتام و آنام یانیندا راحات باخا بیلرم و اوتانماغا گؤره چوخ چوخ باخماقلارینا وازگئچدیگیم فیلملره تای اولماز دئدیم. فیلمین آدی بئووولف*دی. چوخ گؤزل چیزگی فیلمیدی و چوخ چوخ گؤزل دوبله سی واریدی، تورکیه‌لیلر دئمیشکن دوبله‌سینه باییلدیم. او قدر گؤزل کی آتامین او آغیر ایلگیسینی بیله چکمیشدی. بیرآز باخاندان سونرا سولطان سئوگیلیسینه «یاستیق کاوگاسی» اولان ترکیبلی بیر جومله ایشلتدی. بیلمه‌دیم آتام دا باش تاپدی یا یوخ. گئتدیخجان گؤردوم وضع درامدی! هله باخدیق باخدیق تا گرندئل* اؤلدو و گرندئلین آناسی اؤج* آلماغا باشلادی. نهایت بیر یئرده گرندئلین آناسی سودان چیخدی و بیزیم گؤزوموزو او محتشم وجودویلا ایشیقلاندیردی! سودان چیخاندان سونرا گرندئلین آناسی بئووولف لا بیر ایکی کلمه دانیشار دانیشماز اوتاندیم. «یوخوم گلیر، گئدیم یاتیم من» دئدیم! :)
----
*انیمیشن
*Beowulf
*Grendel
*اؤج: انتقام
*چیزگی فیلم اولماسینا رغمن سودان چیخان لحظه گرندلین آناسین آنجئلینا جولیه بنزتدیم. بوگون گوگل دا باخدیم، اؤزویدی. ایندی کی فیکرلشیریم، گرندئلین آناسینین بدنی تام تامب رایدئر فیلملرینده اولان کیمیدی. بیر آنجلینا جولی برندی(brand).
1. بوگون داریخیرام
2. دونن آخشام اوستو شانسان گؤکسل* ین "دنیزه بیراکسام*" اوخوماغین آچدیم و او اولدو کی گئتدیم گؤکسلین بیر نئچه کلیپینی دانلود ائله‌دیم. دقیقا 11 دانا کلیپ دانلود ائله دیم.
3. گئجه یئریمه گیرندن سونرا ومپایر سئریالیندان 19 و 20جی قیسمتلرینه دالبادال باخدیم! نادیر بیر اتفاق دیر. بیر قسمتدن چوخ باخمارام! یاتاندا گئجه ایکی اولموشدو!
4. سحر یوخودان دورانمیردیم!
5. سحر گئتدیم صبحانیه کوکه آلدیم و صبحانه ییندن سونرا گلدیم "سورونور*"ون اوستونده ایشله‌دیم و ایندی دییه بیله‌رم کی "سورونور" سورونور! توتماسان باش آلیر گئدیر بیلینمز یئرلره :)
6. آخشام لیگین ایلک اویونون گؤزله‌دیم. برابر اولدو. اویون منه یاپیشمادی، بیلمیرم میئیدان‌دانیدی یا کامئرالاردان و یا هر ایکیسیندن. گزارشگری ده هئچ بگنمه‌دیم.
7. آخشام 9:30 چرخ ایله چیخدیم ائشیگه و 10 جان قاییتدیم، هاوا فوق العاده ایدی. آی یاپیشدی، آی یاپیشدی کی دئمه. ائوه یئتیشن کیمی آخشام اوستو آلدیغیم دوندورمانی آنام دئدی گؤتور یئ. منده بلافاصله گؤتوردوم ووردوم بدنه و هئچ آرا وئرمه‌دن گلدیم بو پوستی باشلادیم یازدیم.
8. گؤکسلی سئویرم. اوخوماقلارین دا سئویرم. بیر خاص ازیله-ازیله اوخویار، ازیلمه‌سینده سئویرم. قیافه‌سینده سئویرم. گییدیغی پالتارلارین دا سئویرم. اوخوماقلاریندا بیر خاص دورقونلوق، ساکینلیک وار، اونلاری دا سئویرم. اصلا هر بیر شئی‌ین سئویرم *...
9. و گینه بوگون داریخیرام ...
----
ی.س.:
* Göksel
*Denize Bıraksam
* Sürünür
*پوستون عکسی گؤکسلینکیدیر.
* 85 ینده! :)
1. بو گئجه بیر قاریشیق یوخو گؤردوم. بیر تانیش توپراقلیق مسیرده گئدیردیم، او مسیرده گ.موزدان اولان نئچه نفری یول اوسته گؤردوم. بیر یئره ییغیشمیشدیلار. دؤرد-بئش نفر اولاردیلار. دانیشیردیلار. سئت آبی گییمیشدیلر*. کنارلاریندان سایمازدان گئچیردیم. گئچه گئچه، بیردن بیره دالیسی منه طرف اولان آبی مانتولی قیزی سن‌سن دییه آنلادیم! اوزون و قیافه‌سین گؤرمه‌دیم، سادجه حیس اولاراق آنلادیم. بیر آن اؤزلم و پئشمانلیق وجودومی بورودی .... گئتدیم میندیم مسیرین آخیرینده دوران خط-ی واحیده و اوزاقدان گینه سنی گؤرمه‌یه چالیشدیم اوتانا اوتانا. خط-ی واحید‌ده‌کیلرین شماتتیندن اوتانیردیم کی ایستیر قیزا باخا حیاسیز! متاسفانه گینه اوزونو گؤرمه‌دیم ...
----
ی.س.
* سانیرام رویالاریم رنگلی دییل ده آغ- قارادیر! سادجه آنلام اولاراق رنگی آنلادیم نه تصویر و گؤرسل اولاراق.
** بوراجان سندن ایکی رویا گؤرموشم و هر ایکیسینده ده اوزونو گؤرمه‌میشم!
*** دونن آخشام چاغی ائشیکده اولارکن سون نقطه‌نی قویدوم بیتدی سانیردیم. بلکه ده بیتیرمیشم. چوخ مفصل بحثه احتیاجی وار بیر ی.س. ایله اولماز.
تارکان - زئیتون گؤزلوم