بؤیوک تصمیم

1. بو هفته بیر بؤیوک ایش گؤرمه زوروندایدیم. گرک قاباغا گئدیپ و بیله‌سینن دانیشئیدیم. شنبه تصمیم توتدوم کی گئدیم و دانیشیم. سحر گئتدیم، او مندن قاباخ گلمیشدی. بیرآز اوردان بوردان دانیشدیخ، س. یینه گؤره بیر ایکی دانا سوال سوروشدوم، جواب وئردی. اونون ایشینه مربوط اولان بیر ب. یی گؤرستدیم بیله‌سینه و تاکید ائله‌دیم کی بو سیزین ایشیزین ب.یی دیر. بیر دانا سوال دا سوروشدوم کی اؤزوم ده کیتابا باخمالی اولدوم اونا گؤره، سونرا اوشاقلار گلدیلر شلوغ الدو گئتدیم دئدیم کی او سوالا باخیپ دییه‌رم و چیخدیم.

2. یک شنبه گونو گئتدیم بئواخت یئتیشدیم، 11 دؤره بری. بئش اون دقیقه گئچمیشدی گؤردوم منیم اوردا اولمامی یوخلاماق ایچون گلدی اوتاغین قاباغیندان رد اولدو و بیر چوخ قیسا باخیش اوتاغا سالدی، سوالی واردی دییه‌سن. سئوینج اولدو اورگیمده گیزلیندن. ایکی اوچ دقیقه سونرا گلدی و بیلگیسایاری یانیندا سوالین سوروشماغا. کناریمداکی صندله ایشاره ائلیه‌رک "ایله‌شینیز لوطفن" دئدیم و او دا ایلشدی. دونن آچیق قالان سوالی سوروشدو و منده دئدیم کی باخدیم دا بیر آز تعریفلری مرور ائله‌مه زوروندا قالماقدان دولایی بیرآز یوباندی. کیچیک تقویم ورقلرینین دالیسیندا یازدیغیم نوتلاری آختاردیم و دونن یازدیغیم ایکی نوتو تاپیب اونا گؤرستدیم. او دا آنلادیم آنلامیندا اشاره ائتدی. سونرا و.یه گؤره سوالی واریدی، او بوراجان اوچ دانا اؤنملی اولان و. دن فقط بیرین نظره آلمیشدی آما من دئدیم کی اوچو باهم اولماسا ب. معنیسی حفظ اولمایاجاق. بو قونودا بیرآز دانیشدیق. سونرا دونن گؤستردیگیم ب.یی دئدی کی بیرآز باخدیم "چوخ چوخ بؤیوک اولور! نظیز ندیر؟" اصلینده دونن اؤزوم دئمیشدیم کی بونون اوستونده ایشله‌مک بیرآز چتین اولاجاق. دئدیم اولمازسا بیر بؤلومونون اوستونده ایشله‌یین، نتیجه‌نی دیین سونرا گؤرسک کی یاخجیدیر ادامه وئررسینیز. دئدی: یاخجی. نهایت منیم یانیمدان گئتدی و گئدنده برگه‌لری قالدی منیم یانیمدا. برگه‌لرینه بیر گؤز دولاندیردیم چوخ تمیز و سلیقه‌ ایله منظم صورت ده بیر بیرینه میخکوبلامیشدی. دالیسیجا گئتدیم کی برگه‌لری وئرم آما گؤوردوم اوتاغیندان چیخدی و تئلفون الینده دانیشماغا مشغول اولدو. دئدیم موزاحیم اولماییم. سونرا وئررم کی اؤزو اون دقیقه سونرا گلدی دئدی کی برگه‌لریمه گؤؤه گلمیشم.

3. ایستیردیم گئدم بیله‌سینه دییم کی "سنی سئویرم"، نجور ائلیردیم اولموردی.

----
بلکه آردین یازدیم!

یوخوسوز هر گئجه!

1. یوخوم دییپ بیر بیرینه، بونونلا بئله کی تئز گیررم یئریمه آما گئجه‌لر چوخ بئواخت یوخوم توتور، 2-3 دؤره بری. سئودالانمانین ایلک علایم‌لری دیلر بونلار. بو آرادا "او"نون فیکری گیریر قافاما و چیخمیر. بو یوخوسوزلوق ساده‌جه سئودالانمانین سونوجو دگیل، بلکه منیم تیپ‌ده آدامدا اول سئودالانیپ دا سونرا قاباغا گئتمک قرارینا گلمکدن دولایی دوغان چلیشکی دیر منجه. دونن فیکیرلشیردیم کی تانریم منی نیه یارادیپ؟! بو یاشا یئتیشدیکدن سونرا گئدیپ قاباغا بیری ایله دانیشماق منه چوخ چتین گلیر! هئچ ایش گؤرنمه‌میشم بوراجان!

2. گئچن هفته شنبه گونو اوشاقلارین ارائه‌سی واریدی و منیم اطلاع‌م یوخیدی! سوروشمامیشدیم کیمسه منه دئمه‌میشدی! د. بیله دئمه‌میشدی! سحر تانریم لطف ائلیندن سونرا نهایتده بیر وضعده ارئه‌لره یئتیشدیم بیردن بیره! ایچه‌ری گیرنده گؤردوم کی "او"دا اوردا وار! د. اونا دئمیشتی ده منه دئمه‌میشتی. نه ایسه. آما قاپیدان گیرنده د. سئویندی دییه‌سن دئدی "تام واختیندا گلدین"! :)

3. آخشام گلدیم ائوه و بیر اس ام اس یوللادیم اونا کی "فیلان شئیی گتیره‌بیلرمیسینیز؟" سونرا تبلتی آچدیم و تلگرامدا گؤوردوم "او"ندان بیر پیام گلیپ، س.ین اطلاعیه‌سین یوللامیشتی کی صاباح ایدی 1:30 دا. منده جوابدا باشاریلار دیله‌دیم ده، اطلاع وئردیگی ایچون تشکور ائله‌دیم. انتظاریم واریدی اودا بیر جواب یازا آما یازمادی! سونرا اس ام اس‌ه باخدیم گؤوردوم جواب یازیپ کی"چوخ ممنون لطفونوزدن، بله اولار" سونرا من یازدیم کی بیلمیردیم صاباح س. واریز "بوروسو گونه گتیره بیلرمیسینیز؟" سونرا او یازدی کی "بله، البته صاباح دا گتیره بیلرم." من یازدیم کی "صاباح س. یه یئتیشین سونرا آلارام."

4. صاباح اولدو و س. ده اولدو و من ده س. یه گئتدیم. مخاطبی من ایدیم تقریبا. قوتولاندان سونرا تبریکلر دئدیم و بیر ایکی دانا فایل آلدیم........

5.نه ایسه، بونلاری نیه و کیمه یازیرام کی؟!!!!!!!!!!!!!!!!

داریخیرام

1. داریخیرام...

بیلمیرم نیه! آمان تانریم...

ایندی بیر ایستیکانا بیر آز بنؤوشه-گؤی زبان سالدیم، لنبکینی چئویردیم اوستونه بخاری اوسته قویدوم دملنسین. بیم او تاثیر ائلیه...

سانیرام دئپرس اولموشام. سانیرام... سانیرام جامعه‌نین بیر فایداسیز عضویم... بیلمیرم نیه! آمان تانریم...

2. بوگون مئهدی-ه دئدیم کی "او"نو سئویرم.

مندن اؤنجه مئهدی یئنی ایلیشکیسیندن دانیشدی منه، ایکی گون ایچینده بؤیوک ایلیشکی قورولوپ آرالاریندا! مئهدی ایله چوخ صمیمی‌یم. 7 ایلدی ایندی. آرالاریندا بوتون اولانلاری منه دئدی. بیرآز فیکیر قاتدیم مئهدیه. سونرا منده دئدیم کی بیریسی وار نئچه گون اولار - اصلینده نئچه آی اولار - دوشوندورور منی. شرایطین سوروشدو. دئدیم، بوجور. دئدی بو شرایط ایله موقتی دیر دییه دوشونمزسن-اصلینده هئچ واخت موقتی بیر ایلیشکینی دوشونمه‌میشم. قایتمیشدیم گلک بیزیم او طرفه بیردن بیره "او"نو ساختماندان چیخماسین گؤردوم. مئهدیه اشاره ائله‌دیم بودور دییه. مئهدی تصمیم توتدو بیرآز زاویه‌نی دییشک. دییشدیک بیرآز گئتدیک بیرآز باغلی زاویه‌دن مئهدی ده گؤردو. سونرا مئهدی دئدی: چوخ بی حئس یئرییر! دئدیم نه یانی؟ دئدی: سایمادی! دئدیم: گؤرمه‌دی کی. بیرآز دا اوتانجاقدی...

3. مئهدی دئدید آرتیق دوشونمه گئت قاباغا! آما بیلمم نهیی وار بیلمم نهیی وار...........*

4. آمان تانریم. داریخماق اؤلدورور... ایندی گؤی زبانیم دملنر، گئدیم اوندان ایچیم. 

----

*یازماغا حالیم اولمادی، سورا یازارام.

سویوق دییپ

ایکی گوندو منده شدید وضعده سویوخ دیمه علایمی او جمله‌دن آسکیرماق، بوروندان سو گلمک، بدن آغریسی و سایره وار. بوگون دیشاری چیخانمادیم و ائوده بیر مفید ایش ده گؤرنمه‌دیم! ایندی بیرآز یاخجیدیر وضعیت. یئریمدن چیخمادیم، و او اولدو کی تیلویزیون قاباغیندا قالدیم. و توفیق-ی اجباری اولدو تا شعبانین "آتلا گل شعبان" فیلمینه باخدیم. چوخ دا سئودیم.

----

* چوخداندی یازمیردیم. آرادا بیر ایکی دانا یازدیم آما یایبنلامادیم ائله اوجور قالیر.

*بیر آیری قونو یازاجاغدیم حؤصلم اولمادی بونو یازدیم. :)

دارماداغین

1. دارماداغینام! گئرا-می ایتیرمیشم! بیلمیرم نئینیرم.

2. دونن گئجه مولانایا گؤره بیر مطلب اوخوردوم، یوخوم توتتدو و قوتولانمادی. گؤره‌سن مولانا دوشن اوت نه‌ییمیش کی بو بئیت‌لری آرد آردا دوزدورور اونا؟ مولانا هر بیر شئی‌یندن ال چکیر، هر بیر موقعیت‌یندن ال چکیر، دلی کیمی اولور، هئچ بیر شئی‌ی اؤنمسه‌میر ...

مرده بدم زنده شدم گریه بدم خنده شدم      دولت عشق آمد و من دولت پاینده شدم

...

گفت که دیوانه نه‌ای لایق این خانه نه‌ای      رفتم و دیوانه شدم سلسله بندنده شدم

...

گفت که سرمست نه‌ای رو که از این دست نه‌ای       رفتم و سرمست شدم وز طرب آکنده شدم

...

گفت که تو زیرککی مست خیالی و شکی         گول شدم هول شدم وز همه برکنده شدم

...

گفت که شیخی و سری پیش رو و راهبری         شیخ نیم پیش نیم امر تو را بنده شدم

...

گفت که با بال و پری من پر و بالت ندهم         در هوس بال و پرش بی‌پر و پرکنده شدم

3. گؤره‌سن مولانا عاشیق می اولموشدو؟ بیزیم زمانه‌ده انسانلار عاشیق اولان کیمی یوخسا چوخ فرقلی‌می؟

4. تانریم من نئینییم؟ لطفا جواب وئر. لطفا یول گؤستر منه...

----

* او قدر دارماداغینام کی ایندی فریدون دوزآغاج آهنگلری قولاق آسیرام...

**اوخوجوسوز بلاگ‌دا یازماق دا چوخ توهاف بیر شئی...

هانکی دیل ایله دئییم، "سنی ایسته‌میریک...!"

1. "زال" آددا بیر آختاریش موتورو دوزلدیللر ایراندا. آدرئیسی ده زال.ایر دیر. سیته‌سینده یازیپ "زال"ین سونوجلارین فقط سلام.ایر سیته‌سیندن قوللانابیلرسینیز. گئتدیم بیرآز آختاردیم، سونوجونون کئیفیتینه یاخمیاراق بیر شئی‌لر گتیریر!

2. هر ایکی سیته ده (زال.ایر و سلام.ایر) بیان.ایر شیرکتی طرفیندن دوزلدیلمیشدیر. دئمه‌لییم بو من یازدیغیم بلاگ دا بیان.ایر شیرکتی طرفیندن مدیریت اولور. اؤز اؤزومه دئدیم حتمن اؤز بلاگ سیستمینین مطلب‌لرین لاپ تئز ایندئکس ائدرلر. بودور کی گئتدیم بلاگیمین باشلیغین اوردا اختاردیم و چوخ گؤزلنیلمزجه‌سینه "متاسفانه هیچ موردی یافته نشد" گؤستردی!

3. هانکی دیلله دئییم، "سنی ایسته‌میریک...".
----
ی.س. اول عکس مربوط اولور بیان.ایر شیرکتی باشقانین منه گؤستردیگی عکس العمله او زامانا کی من "چای ساعاتی"نی سلام.ایر ده آختاردیم!

قردشیم...

1 - خط واحید ده گلیردیم بیر کیشی شوفره دانیشیردی دییردی "چتین زمانه اولوپ"، نئچه سئری دال با دال بو جمله‌نی دئدی. سؤز قونوسو: چتین قازانیلیر، و چوخ چوخ چوخ راحات، سو کیمی خرجلنیلیردیر. آدام دوشوننده گؤرور کی "چتین" دئدیگین بیر کلمه‌دیر آغیزدان چیخیر گئدیر. فوق العاده چتیندیر. احمد کایا نین بیر اوخوماغی وار دییر "گئچمیور گونلر گئچمیور"، ایندی بیزیمکی ده "گونلر گئچمیر قردشیم، گئچمیر". کئشگه فقط بو اولایدی کئشگه فقط پولسوزلوق اولایدی ...

2 - "بئله گلیپ بئله گئده‌جک" دیین‌لردن اولماسان پولسوزلوق دردینین کنارینا قوی توپراغیمیزدا باشقا اولومسوز و جان یاندیریجی اولایلاری: دنیزیمیزی، جوانلاریمیزین ایشسیزلیک دردین، اوغلان قیزلاریمیزین حسرت‌لرین، و سایماقلا قوتولماز بیزیمکی قردشیم. نهایت ان آغیری دا دیلسیزلیگیمیزین دردی. آدامی یاندیریپ یاخیر. غئیرت‌، قایقی دئدیگین اولورسا، آدامی یاندیریپ کول ائلیر قردشیم ...

3 - او خط واحید ده کی کیشی دییردی «بو الله‌ین امتحانی‌دیر! الله بوندان چوخ امتحانا چکمه بیزی...»

۴- تانریم بیزی بوندان چوخ و بوندان چتین امتحانا چکمه یا ربیم ... آمین.

عئشقسن

ایندی یاریم ساعاتدیر کی ایستیرم بو پستی یازام! بیرآز مطلب آختاردیم اونو اوخویوم سورا یازیم! بیرآز دا آهنگلریمی آختاردیم کی آهنگدن بیر عکس قویوم، سؤزلریندن یازیم بلکه ایسته‌دیگیمی داها راحات آنلاتابیلیم! نئچه آهنگ ایلگیلندیردی، آما نهایت موراد گؤیه باخان نین "سانا اولان عئشقیم شاهید"ی و ییلدیز تیلبه نین "عئشق بیر قهقه"سین سئچدیم. بلی، سؤز قونوسو عئشق‌دیر.

"بیرینی سئومک" نه دئمک؟ اونو دایما گؤرمک ایستیرسن، اونون سسین دائما ائشیتمک ایستیرسن. اونون گولومسه مه‌سین و سئوینمگین ایستیرسین دائما.

بیر ایکی ساعات قاباق چیخمیشدیم بوشونا خیاوانلاردا دولانیردیم. سویوقدا، قارانلیقدا، یالنیز. بیردن تاخیلیردی قافاما ایسته‌مه‌دن: "ایندی  گؤرسم اونو..."، "گؤروپ ده دانیشسام..."، "یانیمدا اولسایدی و ده ال اله ..."."بو سویوق هاوادا اللرین نه ایسسیدیر..." دئسئیدیم اونا.

ایندی ده ائوده بئله...،

شماره‌سین تلگراما آرتیردیم، قویدوغو عکسی یوخلادیم. هئپسی یو قدر.

کئشگه بو قدر قورخاق و محافظه کار اولماسایدیم ...

----

ی.س. ایندی باشلیغا باخیرام، یالین ین آهنگینین آدیدیر. اوول‌ده بو اوخوماغی سئچمیشدیم. اونا گؤره ده بو پست دا اونون عکسین قویدوم.

یئمکلر اؤنملیدیرلر

بو هفته یئدیگیم یئمکلری بوردا یازیرام، سانیرام اؤنملی ترکیب‌لر یئمیشم.

بوگون چهارشنبه سحر ساعات یئدی دیر. شنبه‌دن بو گونه 4 گون دور.

شنبه: صبحانه (پنیر چؤرک + 5 دانا شیراز خورماسی) ناهار (قیمه + یوغورت) شام (؟؟؟)

1 شنبه: صبحانه (پنیر چؤرک + 5 دانا شیراز خورماسی) ناهار (یاریم جوجه کباب + یاریم دانا کیچیک کره + دؤرد قاشیق قورمه سبزی) شام (؟؟؟) + بیر لیوان یئرکؤکو سویو + 2.5 م.ل. مولتی ویتامین

2 شنبه: صبحانه (پنیر چؤرک بیر جزئی کره + 5 دانا شیراز خورماسی) ناهار (کدو) + شام (یئر کؤکو خوروشی تویوغونان) 2.5 م.ل. مولتی ویتامین + بیر موز و قیرمیزی آلما

3 شنبه: صبحانه (سنگک پنیر) ناهار (بالیق +کره+ یاریم دانا تورش لیمو) شام (کدو) + 3 دانا بم خورماسی + 2.5 م.ل. مولتی ویتامین + بیر زنجفیل چایی سحر

و بولار ائتکیلیدیمی یا یوخ، سونوجدا بیر کره 3 شنبه گئجه و بیر کره ده 4 شنبه گئجه ی.ر. گؤردوم. :)

البته بولارین بیرآزین ائله هر هفته ییئه‌رم. فقط بو هفته یئدیکلریمی هایلایت ائلیرم. آرتیق یئدیکلریم اوست اوسته 15 دانا شیراز و 3 دانا بم خورماسی، بیر لیوان یئر کؤکو سویو، بیر موز، بیر آلما و مولتی ویتامین‌لر اولموش. مولتی ویتامینی دالبادال ایچمزدیم. گئچن ایکی هفته سویوق دیمه‌دن چکدیگیم چتینلیکلرین قورخوسوندان دالبا دال ایچدیم!

----

ی.س.: بیریسی وار سانیرام اونو گؤنولدن سئویرم، دونن 10 ثانیه ده اونو گؤردوم، بیلمم ائتکیسی وارمی؟!

عصیان - خلیل سئزایی

1. خلیل سئزایی‎نی "عصیان" آهنگ ایله تانیمیشام. یادیما گلمیر ایلک عصیان آهنگین، خلیللین اؤز سسی ایله ائشیتمیشم یا آیدانین سسیله! بو دا آیدانین باشاریلی اولدوغونون گؤسترگه‌سیدیر منجه.

2. عصیان چوخ گؤزل آهنگدیر. هم سؤزلری هم آهنگی و اونون بو ریتمده سؤیلنمه‌سی، فوق العاده دیر. آما خلیلین سسی تونوندان دولایی یوکسک توندا اوخومامیش، خلیلین وئرژنی بیرآز دئپراسیون سیزدیریر آداما، دونیادان دویماق. آما آیدا تام فرقلی اوخودو، او ایل او سس تورکیه ده بیر فیرتینا یاراتدی. آیدا وئرژنی دئپراسیون دگیل ده تام بیر "عصیان" خاطیرلادیر آداما، اطاعت‌سیزلیک، چیلقینلیق. قالارقی بیر وئرژن اولدو.

3. گئچن هفته او سس تورکیه 2015 ده، بیر اوخوماغین حاشیه‌سینده، آتنا گؤکهان دان دولایی "عصیان"دان یئنی بیر وئرژن اورتایا چیخدی، بونو احمد پارلاق آدیندا بیر کافه ایله ایلگیلی بیری تقریبا بیر ایل قاباق سؤیله‌میش. احمد پارلاق "عصیان"ا تام بیر آرابئسک پالتار گییدیرمیش. بو دا فوق العاده اولموش.

4. بیر آهنگین نجور دیلدن دیله دالقا کیمی دولانماسین گؤروروک، آما ان اساس ایشی سؤزلری و موزیکی یازان گؤرموش. دئمک خلیل بو آهنگی ایله بیر سونامی یاراتمیش ...

----

ی.س.

* سونرالار اؤیرندیم کی خلیل سئزایی بیر فیلم ده اوینامیش آدی "اینجیر رچلی"، اورادا بو آهنگی بیر ده اوخوموش.

** عصیان - آیدا

*** عصیان -  احمد پارلاق

احمد پارلاق = احمد پارلاک

عصیان = ایسیان