داش داش اوستونده

یئسلاو میشلیسکی نین داش داش اوستونده اثرین اوخورام. عجیبه روایتی وار. مثلا ایندی بیر داستان تعریفلیر، هئچ بیلمیسن بو داستان هاواخت باشلادی و اؤزوی بیردن بیره اوبیری داستان ایچینده گؤروسن! 20-30 صفحه اوخوموشام، بوراجان 5-10 دانا داستانی لاپ ائله بوجور روایت ائلییپ. هر ماجرانین ایچینه گیرمیرسن، ان دقیق روایت و توصیفی مشاهده ائلییسن و نم نجور، ائله یوموشاق بو ماجرانی بیتیریر ده اوبیری ماجرانی باشلیر کی هئچ روحوون دا خبری اولمور. او اندازه نامحسوس بو ایشی گؤرور کی ایلک صفحه‌لرده هئچ بیلمیردیم داستان بوجور قاباغا گئدیر ایندی 2-3 صفحه‌دیر کی بیلمیشم مجرا بؤیله‌دیر.

----

* بو یازینی ایکی گون اؤنجه تلگرامدا یاییملامیشدیم. تاریخی اورادا یاییملادیغیم تاریخه سئت ائتدیم.

 

کورونا

بوگون اوزاقدان اولاراق ایشلریمی ایشلیردیم، بو کورونا فاجعه‌سی یادیما دوشدی و بیردن بیره دوشوندوم: بو کورونا یوزده یوز چینین اؤز آزمایشگاهلاریندا دوزلینمیشدیر. گئجه قوشی یا دا پورسوخدان اینسانا سیچراییپ دییه افسانه و بهانه‌دیر. یوخسا نه آنلامی وار طبیعی اولاراق گئجه قوشی و یا پورسوخدان بیر خسته‌لیک اینسانا سیچرایا و بیر اؤلکه باشچی‌لاری اونی 2 آی گیزلده؟!!!  و یا نه آنلامی وار بو خسته‌لیک طبیعی یوللارلا یارانمیش اولا و بیر اؤلکه‌نین باشچیلاری، اؤلنلرین و یا توتانلارین ساییسین گیزلده؟!!! اؤزوده نه قدر فاصله‎ایله؟! 45000 اؤلموش اولان یئرده اونی 3000 ادعا ائلیه‌‌سن؟!!! یوزده یوز راسیست چینلیلر بو مرضی آزمایشگاهدا تؤره‌دیپ و ایندی اینسانلاری گیریفتار ائدیپلر.

چؤملمیش قافلان، گیزلی اژدها

1. دونن‌دن باشلامیشام «چؤملمیش قافلان، گیزلی اژدها» فیلمینه باخیرام. چینین بو سبک فیلم‌لرین سئوه‌رم. اسکی‌لردن قالمیش، بیر گیزملی و گوجلو کلاسیک سیلاح، مثلا بیر اسکی قیلینج؛ همده توخ یاشیل رنگده یازیلاری/نقشلری اولان قیلینج. قیلینجین آدی دا وار اوسته‌لیک، سانکی جانلیدیر: یئشیل تقدیر. قیلینج‌ین گوجو بیلینمز یئردن قایناقلانیر. بلکه بیر سئودالی دمیرچی دوزلتمیش. بیزیمکیلر سئودالاناندا داغ دلرمیشلر، چؤللره دوشرمیشلر، چینده ده قیلینج دوزلدرمیشلر! قیلینجین ایکی اوزو وار. بیرینجی اوزو گؤزللیک و گیزمله سوسلنمیش دورومو نورمال زاماندا. ایکینجی اوزو اینسان جانینی آلمیش دورومدان سونرا؛ قیپ قیرمیزی قان قیلیجدن آخارکن! همده قیلینجی وئر بیر ماهیر اوستا الینه. یئر گؤیو سارسیتیر!
2. فیلمی هله بیتیرمه‌میشم. فیلمین بیر یئرینده کاراکتئرلرین بیری اوخوماغا باشلیر! نه دیلده اوخوسا یاخجیدیر؟ من ائشیدنده چوخ شاشیردیر. تورکجه اوخویور! اوخویاندا ایلک و سون دیزه‌لری بیلمیرم نه دییر آما آرادا دییر «... گؤردوم شو گؤزل قیز هاوار گولی (؟) ... ائی گؤزل قیز، هاوالی قیز».
3. بو تورکجه اوخویان کاراکتئر فیلمین بیر یئرینده سئودیگی قیزین باشقا آداملا تویونا گلیر، توی مراسیمی بیرآز قاریشدیراندان سورا قیزا دییر «گل گئدک شین‌جان ا» شینجانی ائینی قولاق ائشیتدیگی کیمی یازدیم. فیلمین آلتیازیسیندا یانیلماسام «جین کیانگ» یازیر. بیر زامانلار بیر چیندن جینس گتیرن بیریسی دییردی که چینین شین‌جان بؤلگه‌سی اویغورلارین یوردودی.
4. بدنیم چوخ ضعیفلییپ. ایچیم تیترییر. تاب و تواندن دوشموشم. بیلمیرم بو کومونیست چیندن گلن سوغاتدان توتموشام یا باشقا بیر شئی...  بو وضعیتده اوسته‌لیک بیر چین فیلمینه ده باخیرام. هن؟ نئجه‌دیر؟!

----

چؤملمیش قافلان، گیزلی اژدها اوخوماق

بوگونلر

0. 4 گوندور کی نوخوشلامیشام. اوولده تب، بدن آغریسی و خفیف اؤسکورمک واریدی. خلاصه نمنه کرونایا ساییرلار منده وار. الله اؤزی کمک ائله سین...

1. ایندی دوز بئش گوندور ائوده یاتمیشام! نه یاخجی کی هله ایشیمین فرمتی بو اجازه‌نی وئریر. اوزانمیشام بخاری یانیندا، لپ تاپ قاباغیمدا هردن تلگرامدا یازیلارا باخیرام، یورولاندا بیر فیلملریمه باش چکیرم. فیملدن یورولاندا بیراز خبره باخیرام. خبردن یورولاندا بیراز رئدیتده دولانیرام و هاممیسیندان یورولاندا چالیشیرام کیتابدان، PDFدن اوخویام.
2. بوگون راست گله شکونتلا آدلی بیر هیندیستان پیئسینن تانیش اولدوم. اینترنتده آختاردیم، وبلاگلارین بیرینده پیئسین خلاصه‌سین بولدوم. پیئسی سئودیم. بیرآز آهتاراندان سورا PDFین بولدوم و یاواش یاواش اوخورام. کیتابین باشلانقیجیندا بؤیله بیر بئیت وار:
«از محبت سرشته گوهر هند / سبز و آباد باد کشور هند»
بونو اوخودوقدان سونرا نم نیه دونن تورکیه کاناللارینداکی هیندیستان خبری یادیما دوشدی: هیندیستاندا هیندولار مسلمانلارا حمله ائلیر! وحشیجه‌سینه! بوراجان 20-30 نفر آدام اؤلوپ....
3. نیه بؤیله اولدی؟! سیاست می بؤیله ائتدی می؟ سیاست اینسانلیغی هارا گتیریپ چیخاریپ!

جوکئر 2019

1. بیر هفته اؤنجه ناهار ییندن سونرا باشلادیم جوکئر فیلمینه باخماغا، یاریم ساعاتلیق باخاندان سونرا فیلم منی چوخ آلمادی. بو دا نرمال بیر فیلمدیر دییه ظن ائتدیم. یوخوم توتدی و فیلمه داها باخانمادیم یاتدیم. بیر هفته آرادان سونرا، دونن آخشام چاغی فیلمی قالدیغی یئردن ادامه وئردیم. بو سفر فیلم منی نه آلدی، نه آلدی، گل گؤره‌سن! یانیلمالسام سانیرام هئچ بیر فیلم، بو حیس‌لری دوغورمامیشدی منده کی جوکئر دوغوردی! فیلمه باخدیقجا «سؤکولمک» حیسسی واریمیدی. فیلمی هله قوتارمامیشام...

2. اوچ پست آشاغیداکی عکس و بو پستون عکسی بیر آدامدی، اینانمالی‌می؟! تک کلمه اینانیلماز!

گئجه گوندوز یوللاردا

1. اوردا دی کی شاعیر دییر«گئجه گوندوز یوللاردا، آجی غوربت سانجی‌سیدیر»

2. ایندی یادیما دوشدی، بوگون یولدا بیر تیرئلی دالیسیندا یازمیشدی «یوکوم درد، یولوم غوربت*»

 

----

*yüküm dert, yolum gurbet

چوخ اوزاق، چوخ یاخین ...

1. Hadise او سس تورکیه ده دئدی کی «من غوربتده یاشامایی ان اییی بیلیرم ... غوربتده اوخولدا منه "پیس تورک" دیین اولدو ... اوخولدا آلمانجا قونوشوردوق، ائوه دؤننده تورکجه قونوشوردوق. آلمانجادا اولان بیر ایکی خاص حرفی دوزگون تلفظ ائده‌بیلمیردیم، او اوزدن لاغا قویولاردیم ...»

 

2. تانیش بیر حیکایه دگیل می؟ هر نقطه‌سی تانیشدیر. فقط فرقی بوردادیر کی Hadise اؤز مملکتیندن چیخیپ، بیر نئچه مملکتی گئچندن سونرا بیر باشقا مملکتده اوخولا گئدیپ کی او سؤزلری ائشیدیپ آما بورداکی اؤز مملکتی ایچینده بو سؤزلری ائشیدیر! جالیب دگیل می؟!

او 2013

بو هفته «او» (Her, 2013) آدلی فیلمه باخدیم. بیر بیلگی-قورقو فیلم. فیلمین قونوسی مصنوعی هوش گلیشمیش بیر دونیادا باش وئریر. مصنوعی هوش او قدر گلیشمیش کی اینسان قونوشان بیلگی‌سایارین فرقین اینساندان داها آییرت ائده‌نمیر. بو اولای سونوجوندا باشقا اینسانلارلا ایلگی قورا بیلمه‎ین اینسان اینسانلاردان اوزاقلاشیر و مصنوعی هوشه طرف چکیلیر. بو اولای اؤزللیکله ارکک و قادین آراسیندا اولان عئشق رابطه‌لری ایچریر. اینسان داها ایلیشکیلرده اولان فرقلیلیکلره قاتلاشانمیر، هر شئی آغ یا قارا گؤرور و بو اوزدن ایلیشکیلر تئز بیتیر، بوردادیر کی مصنوعی هوش آرایا گیریر و فوق العاده هوشی ایله اینسانین الیندن توتور و دادلی و اوزاق بیر یالنیزلیغا آپاریر. «او» فیلمی، جالیب فیلم‌ایدی، آما منجه «نه فیلم‌ایدی» دئدیردین فیلم‌لردن دگیل. بو آرادا فیلمین موزیکلرین بگندیم.

ائله بئله

1. ایندی بو آهنگین دؤردونجو سئریسی کی دالبادال قولاق آسیرام، بیلیرسن ذهنیمدن نه گئچیر؟؟! «ایندی بو لحظه سنده بوردا منیم یانیمدا اولسایدین دا، بو آهنگه بیر اوتاقدا قولاق آسسایدیق! من سس‌سیز قولاق آسیپ دا سنه باخاردیم هردن، سن سئودیگین ایشی یاپاردین دا... بیلیرسن دا اوندا نولاردی؟! ...».

2. ذهندن می گئچر یوخسا اورکدن می؟ سانیرام بو استثنا اولاراق اورگیمدن گئچدی.

3. آهنگ ایندی 10-12جی تکرارینا یئتیشیپ!

ندن؟

1. اؤنجه‌کی پستی تام یوللارکن آنام الینده بیر تره (حالوا) و بیر خرما یانیما گلدی و اونلاری منه وئردی. اوولده سئویندیم. اونلاری آلارکن دئدی: «قوجا آروادینکیدی»! بیردن بیره تعزیه‌یه گئتدیکلرینی خاطیرلیرام و هئچ گؤرمه‌دیگیم قوجا خانیم یادیما دوشور و منده تکرار آما بیرآز یاواش «قوجا آروادینکیدی!» دیه دیه اوره‌گیم توتولور، اوره‌گیم سیخیلیر! ندن تانریم؟! بو نه گئدیش؟!

2. بوغازیمدان آشاغی گئتمیرلر... الله اؤلنلره رحمت ائله‌سین.