قارلی گون...

کلاس‌دان ایندی چیخمیشام. چیخاندا قارین نارین دانالاری یاغدی اوستومه. بؤرکوم کیفده‌ایدی و ایسته‌میردیم بؤرک تاخام. آما قار دانالارین گؤرونجه و کلاسدان داغیلان اوشاقلار جیبلریندن بؤرکلرینی چیخاردینجا، من ده بؤرکومی کیفدن چیخارتدیم و باشیما قویدوم.
پیاده گلدیم خط ایستگاهینا. 15 دقیقه‌لیک یولدور پیاده. کارتیمین شارژی یوخ ایدی، اونا 3 مینلیک شارژ ووردوردوم. مندن قاباخکی اوغلانین کارتی یوخ‌ایدی. مندن ایسته‌دی، کارت ووردوم بیله‌سینه. پولون وئریردی، ایسته‌میردیم، آما اصرار ائله‌دی، آلدیم. ایستگاه قالابالیق‌ایدی، خانیم‌لار و قیزلار آراسیندان "گذشت ائدین" دییه‌رک یولومی آچدیم و گئتدیم صفین آخرینده دوردوم. بیرآز دوراندان سونرا بیر خط گلدی، دوپ-دولی! یانیمدا دوران کیشیه "چوخ شولوغدی، بوندان قاباخکی بوجور دپیلدی آخی!" دئدیم. "هن! اونا یئتیشه‌نمه‌دیم" دئدی. شولوغ اولسایدی دا، بیر چوخلی آدام یئندی خطدن. یئنمکلری زامان چکدی، شوفر مینمگه گؤزلمیردی داها! قاپینی باغلیا باغلیا زورونان اؤزومی آتدیم ایچریه! شانسدان ایکی دانا بوش صندل واریدی، چوخ آدام دا آیاق اوسته دورموشدی، بیلمیرم گؤرموردولر بوش صندللری و یا ایسته‌میردیلر اوتورسونلار! بیردانا دیل اوجوندا تعاروف ائله‌دیم و تئز گئچدیم اوتوردوم! سون ایکی ساعاتدان چوخ آیاق اوسته‌ایدیم. اوسته‌لیک سحر صبح‌دن ائودن چیخمیشدیم و یورقوندوم. پنجره کناری‌ایدی، قولاقلیق‌لاریمی تاخدیم، FMی آچدیم، بیر کانالی توتموشدی. بیلمیردیم هانکی کانالدی اما بیر گؤزل، گیزم دولی، ترنسه اوخشار بیر آهنگ سالمیشدی...
یورقون و آرقین بیر گون آردیندان باشاریلی چیخما، قارلی و بولوتلی، نسبتا سویوق بیر پلمه هاوادا او شولوغ ایستگاهدا ماشینا مینه‌بیلمک و ائوه دوغرو گئده-گئده گؤزل بیر آهنگی دینله‌مک سئونجی...
بیر رضایت حیسسی دولدی ایچیمه.
آه، چوخ شوکور ...